எண்ணத்தின் வர்ணங்கள்

நேர்காணல் - ஆசிரியை ஆயிஷா இப்ராஹீம்

2011-07-29T23:28:00.000-07:00

நேர்கண்டவர் சமீலா யூசுப் அலி

புகைப்பட உதவி அப்ரா நிவாஸ்

2011 ஜூலை 24 ஆந்திகதி மாவனல்லை வரலாற்றில் ஏடுகளில் குறிக்கப்பட வேண்டிய ஒரு பொன்னாள்.அன்று தான் மாவனல்லை நகரத்தின் வரலாறு பற்றிய ஒரு பொக்கிஷம் ‘பொற்கலசம்’ என்ற நூலாக மாவனல்லை சாஹிரா தேசிய பாடசாலையின் பிரதான கேட்போர் கூடத்தில் வெளியிட்டு வைக்கப்படுகிறது.நூலின் ஆசிரியை சாஹிராத்தேசிய பாடசாலையின் ஓய்வு பெற்ற ஆசிரியராக இருந்து இன்று அதே பாடசாலையின் பழைய மாணவியர் சங்கத்தலைவியாக இன்னும் ஓய்வு பெறாமல் இயங்கிக்கொண்டிருக்கும் ஆசிரியை ஆயிஷா இப்ராஹீம் அவர்கள்.வாழ்க்கையில் 70 வது படியில் இருக்கும் அவரது இந்த உற்சாகமான முயற்சி 20 களிலே சலித்துக் கொள்ளும் எமது பெண்களுக்கு சிறந்த முன்மாதிரியாகும்.

மழை சூழ் கொண்டிருக்கும் பின்காலைப்பொழுதொன்றில் ,பெண்கள் தேசத்திற்காக ஆசிரியை ஆயிஷா அவர்களை சாஹிரா வீதியில் அமைந்திருக்கும் அவரது வீட்டில் சந்தித்தோம்.

கனிவான வரவேற்பு

எமது வேர்களை விசாரித்து சொந்தம் கொண்டாடும் உரிமை

வயதின் தள்ளாமை மறைக்கும் ஆர்வமும் உற்சாகமும்

இது தான் ஆசிரியை ஆயிஷா இப்ராஹீம்

· இப்படியானதொரு நூலை எழுத வேண்டும் என்ற ஆர்வம் உங்களுக்கு எழுந்ததன் பின்னணி என்ன?

நான் ஓய்வு பெற்று வீட்டில் இருக்கும் சந்தர்ப்பத்தில் எங்களுடைய ஆங்கில ஆசிரியரான சஹாப்தீன் என்பவரைச் சந்தித்தேன்.அவர் எனக்கொரு போட்டோவைக் காட்டினார்.அது 1932 ஆம் ஆண்டு பிடிக்கப்பட்ட போட்டோ,அதில் உயிருடன் இருந்தவர் அவர் மட்டும் தான்.’இதை வைத்து கொண்டு போய் சமூகத்திற்கு ஏதாவது செய்,புத்தகம் ஒன்று எழுத ஆரம்பி’என்று சொன்னார்.அது எனக்குள் ஆர்வத்தை ஏற்படுத்தியது.

· பொற்கலசம் என்ற தலைப்பை என்ன காரணத்திற்காக தெரிவுசெய்தீர்கள்?

ஏற்கனவே ‘முதுசம்’ என்ற பெயரைத் தான் தெரிவு செய்திருந்தேன்.ஆனால் ஏற்கனவே அந்தப்பெயரை வேறு ஒரு சகோதரி தனது நூலுக்காக எடுத்திருந்ததை அறிந்தேன்.

‘கலசம்’ என்றால் குடம் என்று அர்த்தம்.பொற்கலசம் எனும் போது பொன்னான விடயங்களைத் தாங்கி நிற்கும் ஒரு நிறைகுடம் என்ற அர்த்தம் வருகிறது.அதனால் தான் பொற்கலசம் என்று பெயரிட்டேன்.

· வாழ்க்கையில் எல்லாம் முடிந்து விட்டது என்ற பலர் ஓய்வெடுக்கும் காலத்தில் நீங்கள் இந்நூலுக்கான தகவல்களை திரட்டி உள்ளீர்கள்.உங்கள் உற்சாகத்தின் இரகசியம் என்ன?

என்னுடைய கணவர் இறந்து 10 வருஷங்கள்.தனிமை என்ற உணர்வை நான் அனுபவிக்காமல் என்னை எனது சகோதரிகளும் பிள்ளைகளும் நன்றாகப்பார்த்துக் கொண்டார்கள்.இப்படியான ஒரு காலத்தை வீணாகக்கழிக்காமல் சமூகத்து ஏதாவது செய்ய வேண்டும் என்ற விருப்பம் எனக்கு உற்சாகத்தைக் கொடுத்தது.

· 50 வருடங்களுக்கு முன்னிருந்த மாவனல்லை-இன்றிருக்கும் மாவனல்லை என்ன வித்தியாசங்களைக் காண்கிறீர்கள்?

பொற்கலசம் நூலிலே,50 வருடங்களுக்கு முன்னிருந்த மாவனல்லை சம்பந்தமான பல படங்களைத் தந்திருக்கிறேன்.

அன்றிருந்த பாதைகள்,பாலங்கள்,மக்கள் வாழ்ந்த முறை பற்றியெல்லாம் நான் அந்த நூலில் குறிப்பிட்டிருக்கிறேன்.

· இந்நூலுக்கான தகவல் திரட்டும் காலத்தில் ஏற்பட்ட மறக்க முடியாத சம்பவம் எது?

நான் தகவல் திரட்டச் சென்ற இடமெல்லாம் தங்கு தடையில்லாமல் எல்லா மக்களும் ‘என்ன வேண்டும் டீச்சர்’ என்று ஆர்வத்தோடும் ஆசையோடும் கேட்டு அன்போடு உபசரித்து தகவல்களைத் தந்தார்கள்.மற்றும் இப்போதுள்ள எனது சிறுவயது மாணவர்கள் கூட’படம் வேண்டுமா டீச்சர்’எனக் கேட்டு பாலங்களையும்,வீதிகளையும்,தக்கியாக்களையும் படம் பிடித்து என்னிடம் கொண்டு வந்து தந்தார்கள்.இவைகள் எல்லாம் மறக்க முடியாத சம்பவங்கள் தான்.

· அரிய புகைப்படங்களை இந்நூல் தாங்கி நிற்கிறது.இவை எங்கிருந்து பெற்றுக் கொள்ளப்பட்டன?

இந்தப்புகைப்படங்களெல்லாம் ஆறு வருடங்களாக நான் ஊரில் ஒவ்வொரு இடங்களுச் சென்று பொற்றுக்கொண்டவை.நான் 1942 ஆம் ஆண்டு பிறந்தவள் என்பதால் நான் பிறந்த பின்னான 10 வருட காலம் சம்பந்தமான தகவல்கள் எனக்கு ஓரளவு தெரியும்.அவற்றை ஞாபகப்படுத்தி வைத்திருந்தேன்.எமது பாடசாலையின் கட்டடமான ஓலைக்கொட்டகை எனக்கு நன்றாக ஞாபகம் இருக்கிறது.அதன் போட்டோ தான் முதலில் கிடைத்தது.அதைக்கட்டுவதற்காக நான் கூட ஆற்றிலிருந்து மணல் கொண்டு வந்தது நினைவிருக்கிறது.இதை டப்ளியூ டப்லியூ கன்னங்கரா அவர்கள் இதைத் திறந்து வைத்தார்கள்.இந்தக்கட்டடத்திக்கு முன்னர் இருந்த ஆரம்பப் பாடசாலைக்கட்டடத்தைக் கட்டியவர்கள் யார் என்று விசார்த்தேன்.அப்போது காலஞ்சென்ற நியாஸ் ஏ மஜீத் அவர்களின் தந்தையான மஜீத் அவர்களும் ஒபீஸர் அப்பா என்று சொல்லக்கூடிய அப்துல் ரஹ்மான் அவர்களும் என்று அறிந்து கொண்டேன். டொக்டர் ஹமீத் ஏ அஸீஸ் அவர்களது தந்தையான வைத்தியத்திலகம் அஸீஸ் அவர்களது பட்டமளிப்பு விழா போட்டோவிலிருந்து மஜீத் அவர்களின் போட்டோவைப்பெற்றுக் கொண்டேன். அது தான் முதலாவது போட்டோ.அதன் பிறகு பலரைச் சந்தித்து வேறு போட்டோக்களைப்பெற்றுக் கொண்டேன்.என்னிடமும் பழைய போட்டோக்கள் இருந்தன.இவ்வாறான போட்டோக்களை ஸ்டூடியாக்கு கொண்டு சென்று சீரமைத்து எடுத்துக் கொண்டேன்.

· உங்களது குடும்பம் பற்றி?

தாயார் மாவனல்லையைச் சேர்ந்தவர்.தகப்பனார் உலப்பனையைச் சேர்ந்தவர்.எமது வீடு தான் மாவனல்லையில் முதலாவது கட்டப்பட்ட புது வீடு என்று சொல்வார்கள்.அந்த வீட்டில் ஐந்தாவது பரம்பரையில் வந்தவர் நான்.1969 ஆம் ஆண்டு எனக்குத் திருமணம் நடந்தது.அவர் கடுகன்னாவ முஸ்லிம் மகா வித்தியாலத்தில் அதிபராகஇருந்தார்.ஹஜ்ஜுக்குப் போய் வந்து ஒரு சுகவீனம் காரணமாக மரணித்தார்.எனக்கு நான்கு பிள்ளைகள்.மூத்த மகள் பஸீஹா பீ.எச்.டீ முடித்து பேராதனைப் பல்கலைக்கழகத்தில் புவியியல் துறை விரிவுரையாளராக இருக்கிறார்.இரண்டாவது மகள் பரீஹா மாவனல்லைப்பிரதேச சபையில் கணக்கியல் துறையில் வேலை செய்து கொண்டிருக்கிறார்.மற்றயவர் மகன் பஹ்மி சொந்தமாக மாவனல்லையில் ஒரு நிறுவனம் ஆரம்பித்திருக்கிறார்.அடுத்த மகன் பஸ்மியும் அதற்கு உதவியாக இருக்கிறார்.

· உங்களுக்கு இன்னும் நிறைவேறாத கனவுகள் ஏதேனும் உள்ளதா?

பொற்கலச வெளியீட்டின் போது படித்தவர்களின் வருகை குறைவாகவே இருந்தது.படித்தவர்கள்,இங்கு பாடசாலையில் படித்து முன்னுக்கு வந்தவர்கள் கட்டாயம் வந்திருக்க வேண்டும்.அது எனக்கு கொஞ்சம் கவலையாகத் தான் உள்ளது.

· இந்நூலை எழுதும் போதும் ,தகவல் சேகரிக்கும் போது நீங்கள் எதிர்கொண்ட சவால்கள் எவை?

தகவல் சேகரிக்கும் போது எந்த விதமான சவால்களையும் எதிர்கொள்ளவில்லை என்றே சொல்ல வேண்டும்.திரட்டிக் கொண்டு வந்த நேரம் எனது சகோதரி ஆயிஷா ஹாஷிம் அவர்கள் நூலில் ஒரு பகுதியை எழுதித்தந்தார்,அது பேருதவியாக இருந்தது.

· வேறு ஏதேனும் நூல் வெளியிடும் எண்ணம் இருக்கிறதா?

இனித்தான் யோசிக்க வேண்டும்.எனக்கு வயது 70,இனியும் என்னால் எழுத முடியுமா என்பது தெரியவில்லை.ஆனால் என்னால் முடிந்தளவு செய்வதற்கு ஆர்வமாக உள்ளேன்.

(மென்மையாகச் சிரிக்கிறார்)

· ஏன் வரலாறு எழுதப்படுவது அவசியம் என நீங்கள் நினைக்கிறீர்கள்

நாங்கள் இன்று ஊரில் பிறந்து வளர்ந்து புதிய வசதி வாய்ப்புக்களுடன் வாழ்ந்து கொண்டிருக்கிறோம்.சில சந்தர்ப்பங்களில் அல்லாஹ்வையே மறக்கும் சந்தர்ப்பம் வருகிறது.ஊருக்காக யார் யார் உழைத்தார்கள் என்னென்ன சேவைகள் செய்தார்கள் என்பதெல்லாம் எங்களுக்குத் தெரியாது.அவர்களுக்கு ஒரு துஆவை கேட்கவாவது அவர்கள் யார் என்பதை நாங்கள் அறிய வேண்டும்.அதனால் தான் வரலாறு எழுதப்படுவது முக்கியமாகிறது.

· உங்கள் குடும்பத்தினரின் ஒத்துழைப்பு எவ்வாரிருந்தது?

எனக்கு நான்கு சகோதரிகள்.அவர்களில் இருவர் வீட்டுக்குப்பக்கத்தில் இருக்கிறார்கள்.அவர்கள், நான் மணம் முடித்து வாழ்ந்த காலத்திலிருந்து எனது சமையல்,குழந்தை வளார்ப்பு அனைத்திலும் தாய் மகளுக்குச் செய்வது போன்று செய்திருக்கிறார்கள்.

(அவரது குரல் தழுதழுக்கிறது)

அதே போல் எனது பிள்ளைகளும் எனக்கு எல்லா விடயங்களிலும் ஒத்துழைப்பாக இருக்கிறார்கள்,அல்ஹம்துலில்லாஹ்.

· மாவனல்லை நகரில் ஏற்பட்டு வரும் இஸ்லாமிய விழிப்புணர்ச்சி பற்றி உங்கள் கருத்து என்ன?

பொதுவாக இயக்கங்கள் வந்ததால் எமது சமூகம் ஏதோ ஒரு அமைப்பில் மார்க்க விடயங்களில் ஈடுபடுவது சந்தோஷமாக இருக்கிறது.இஸ்லாமியக் கட்டுக்கோப்புக்குள் சமூகம் வரும் போது அல்லாஹ்வைப்பயந்து சேவை செய்யக்கூடிய நிலை வரலாம்.அதே நேரத்தில் தீவிரமான இயக்கங்கள் வந்து சமூகத்தைப் பிளவுகள் ஏற்படுத்தாமல் இருப்பது வரவேற்கத்தக்கது.

· உங்கள் வாழ்க்கையில் மிக சந்தோஷத்துடன் ஞாபகிக்கும் கணம் எது?

ஆசிரியப்பணி 41 வருட காலம் செய்திருக்கிறேன்.இப்போதும் வளர்ந்த மாணவர்கள் எங்கு கண்டாலும் டீச்சர் என்று கெளரவப்படுத்தி,நடந்து போல் வாங்க டீச்சர் என்று வாகனங்களில் அழைத்துச் செல்வார்கள்.

நான் சாஹிராவில் 25 வருடங்களாக ஒழுக்கக் கட்டுப்பாட்டு ஆசிரியையாக இருந்திருக்கிறேன்.இன்றும் மாணவர்கள் கண்டால்;டீச்சர்’ என்று சொல்லி கொஞ்சம் மரியாதையாக ஒதுங்கிச்செல்லும் அளவிற்கு கட்டுப்பாட்டோடும் அன்போடும் நடந்திருக்கிறேன்.

· நீங்கள் எழுதுவதற்காக தேர்ந்தெடுத்துள்ள நேரங்கள் என்ன?

அஸர் தொழுகையின் பின்னரான நேரத்தில் தான் அதிகம் எழுதுவேன்.ஆனாலும் இரவில் ஒரு மணி என்றாலும் விழிப்பு வந்தால் எழுதுவேன்,சமயங்களில் சுபஹ் தொழுகை நேரம் வரும் வரை எழுதுவேன்.

· இன்றைய இளைய சமுதாயம் பற்றி உங்களுடைய பதிவு என்ன?

இன்றைய இளையவர்கள் முன்னிருந்தவர்களை விட மார்க்க விடயங்களில் ஆர்வமாக இருக்கிறார்கள்.ஒழுக்கக் கட்டுப்பாடு நிறைந்தவர்களாக வாழ்கிறார்கள்.இனியும் சமூகம் முன்னேற வேண்டுமானால் மார்க்கக்கல்வியுடன் சேர்ந்த கல்வி தான் தேவை என்பதை பெற்றோர்களும் மாணவர்களும் உணர்ந்திருக்கிறார்கள்.ஆனாலும் இன்று பலவிதமான வசதி வாய்ப்புகள் தொலைத்தொடர்பு சாதனங்கள் இருப்பதனால் மாணவர்கள் கெட்டுப்போவதற்கான வாய்ப்புக்கள் இருக்கின்றன.பெற்றோர் அதிலும் குறிப்பாக தாய்மார்கள், இவற்றைப்பற்றி கவனமாக இருக்க வேண்டும்.மாவனல்லையில் இஸ்லாமிய நிறுவனக்கள்,மார்க்க அறிஞர்கள்,இயக்கங்கள்,.பயான்கள்,மஜ்லிஸ் தாராளமாக இருக்கின்றன.இவைகளை பயன்படுத்திக் கொள்ள வேண்டும்.

· இன்றைய பெண்களின் துறைரீதியான பங்களிப்பு பற்றி?

அல்ஹம்துலில்லாஹ்,இன்று பெண்கள் பல துறைகளில் சிறந்து விளங்குகிறார்கள்.ஆசிரியர்களாக ,வைத்தியர்களாக,சட்டத்தரணிகளாக இருக்கிறார்கள்.மாவனல்லையைப் பொறுத்தளவில் ஆகக்கூடியளவு கல்விக்கு முக்கியம் கொடுப்பவர்கள் பெண்களாகத்தான் இருக்கிறார்கள்.அவர்கள் தான் அதிகமாகப் பல்கலைக்கழகம் செல்கிறார்கள்,வேறு துறைகளில் பிரகாசிக்கிறார்கள்.ஆண் மாணவர்கள் படிப்பது குறைவு.ஓ.எல் பாஸ் பண்ணியவுடன் ஒரு கோர்ஸை செய்கிறார்கள்; பின் லண்டனுக்கு பறந்து விடுகிறார்கள்.

எழுத்துத்துறையில் பெண்கள் ஈடுபடுவது பற்றிய உங்கள் கண்ணோக்கு என்ன?

கட்டாயம் பெண்கள் எழுத்துத்துறையில் ஈடுபட வேண்டும்.பெண்சமூகத்திலுள்ள குறைப்பாடுகளைச் சுட்டிக் காட்ட,சமூகத்தை அறிவூட்ட,சமூகத்தின் தேவைகளை இனங்கான என சமூகத்தின் பலநிலைகளை எழுத்தின் மூலம் தான் அறிய முடியும்.இஸ்லாமிய அமைப்பில் இப்போது பெண்கள் எழுத்துத்துறையில் ஈடுபட்டு வருகிறார்கள்,அது மிகவும் வரவேற்கத்தக்கதே.

வேறு ஏதாவது சொல்ல விரும்புகிறீர்களா?

எனது பாடசாலையான சஹிரா தேசியக்கல்லூரியை எடுத்துக்கொண்டால் ஆண் ஆசிரியர்கள் குறைவாகவே உள்ளார்கள்.நாங்கள் இணைந்து பாடசாலைக்கு சிறந்த நிர்வாகிகளை ஏற்படுத்திக் கொடுக்க வேண்டும்.நாங்கள் பேதங்களை மறந்து எமது பாடசாலையை முன்னேற்ற முன்வரவேண்டும்.நான் கற்ற எனது பிள்ளைகள் கற்ற இந்தப்பாடசாலை நல்ல நிலைக்கு வர வேண்டும்.பழைய மாணவியர் ச்னக்கத்தின் சார்பில் எம்து பாடசாலைக்கு நிறைய உதவிகளை அல்லாஹ்வின் அருளால் செய்ய முடிந்தது.இனியும் அவ்வாறு செய்ய ஆவலாக உள்ளேன்.எழுத உதவி செய்த எனது அன்பிற்குரிய சகோதரி ஆயிஷாவும் எனது மாணவரான எம்.ஜே.எம் பிரிண்டர்ஸ் உரிமையாளாரான முஸம்மில் அவர்களும் நூலை வடிவமைத்துத் தந்த அஸ்மி அவர்களும் இதற்காக மிகுந்த கஷ்டங்களை அனுபவித்தார்கள்.அவர்களுக்கும் மற்றும் இந்நூலை ஆக்குவதிலும் வெளியிடுவதிலும் ஒத்துழைத்த அனைத்து பெயர் குறிப்பிடாத சொந்தங்களுக்கும் அல்லாஹ் அருள் புரிய வேண்டும்.

…………………………………………………………………………………………………………………………………………………………………………………………….

மாவனல்லை சமூகத்தின் வரலாற்றை ஆவணப்படுத்தும் பாதையில் நின்று ஒரு பெறுமதி மிக்க ஒரு நூலை சமூகத்துக்குப்பரிசளித்த ஆசிரியை ஆயிஷா இப்ராஹீம் அவர்களுக்கு உடல் திடத்தையும் மனோபலத்தையும் கொடுத்து அவரது ஆயுளையும் அல்லாஹ் நீட்டிக்க வேண்டும் என்ற துஆக்களோடு விடைபெற்றோம்.

இந்நூலைப்பெற விரும்புகிறவர்கள் கீழ்வரும் முகவரியைத்தொடர்பு கொள்ளவும்

சஹிரா வீதி

மாவனல்லை

25.07.2011

உளம் தொடும் ஒரு கதை

2011-06-12T03:18:00.000-07:00

இஷாவின் அதானுக்கு 15 நிமிடங்களே மிஞ்சியிருந்தன.
நான் அவசர அவசரமாக வுழூ செய்து மஹ்ரிப் தொழுதேன்.
தொழுது முடிந்த பின் எனக்கு ஏனோ உம்மும்மாவின் ஞாபகம் வந்தது.என் தொழுகையை எண்ணி வெட்கமாக இருந்தது.

உம்மும்மா தொழும் போது நீண்ட நேரமெடுத்து அமைதியாகத்தொழுவார்.சுஜூதில் தலை வைத்தேன் அப்படியே கொஞ்ச நேரம் இருந்தேன்

நாள் முழுதும் வேலை,மிக மிக களைப்பாக இருந்தேன்.

திடீரென இடி முழக்கம் போலொரு சப்தம்.திடுக்கிட்டெழுந்தேன்.
இது என்ன? வியர்த்து வியர்த்துக் கொட்டுகிறது.

எல்லாப்பக்கம் சன சமுத்திரம்.

நான் எங்கே நிற்கிறேன்.சிலர் ஓரிடத்தில் விறைத்து நிற்கிறார்கள்.சிலர் அங்கும் இங்கும் ஓடித்திரிகிறார்கள்.

சிலர் முழங்காலில் முகம் புதைத்து அழுது கொண்டிருக்கிறார்கள்.
பயம் என்னைப் பிய்த்துத் தின்னத்துவங்கியது.நான் எங்கிருக்கிறேன் என்பதை சர்வ நிச்சயமாய் உணர்ந்து கொள்கிறேன்.இதயம் நெஞ்சாங்கூட்டிலிருந்து எகிறி வெளியேறத்துடிக்கிறது.

இது இறுதித்தீர்ப்பு நாள்.
நான் உலகத்தில் இருந்த போது இந்த நாளைப்பற்றி எவ்வளவெல்லாம் கேட்டிருப்பேன்,வாசித்திருப்பேன்.ஆனால் இவ்வளவு சீக்கிரமாக இந்த நாள் வரும் என்று நினைக்கவில்லையே!!!

ஒரு வேளை இதெல்லாம் வெறும் பிரமையோ?

இல்லை,இல்லை இதெல்லாம் நிஜமாகவே இருக்கிறது.இந்தப் பயம்…..இதுவரை நான் வாழ்நாளில் உணர்ந்ததில்லை.

எனது பெயரைக் கூப்பிட்டு விட்டார்களா என்று ஒருவர் இருவரிடம் பதட்டத்தோடு கேட்டபடி கூட்டத்தோடு நானும் நகர்கிறேன்.
திடீரென என் பெயர் அழைக்கப்படுகிறது.

ஆமாம்,என் பெயரே தான்.என் தந்தையின் பெயர் கூட சரியாக இருக்கிதே.

இந்த சனசமுத்திரம் அப்படியே பிளந்து எனக்கு வழிவிடுகிறது.

இரண்டு மலக்குகள் என் தோளிரண்டையும் பற்றுகிறார்கள்.சந்தேகம் நீங்காத கண்களோடு நடக்கிறேன்.

மலக்குகள் என்னை நடுவில் அமர்த்தி விட்டு நகர்கிறார்கள்.என் முழு வாழ்க்கையும் என் கண் முன்னே ஓடுகிறது ஒரு திரைப்படம் போல்.தலையைக்குனித்துக்கொள்கிறேன்.

திடீரென என் கண் முன்னே இன்னொரு உலகம் காட்டப்படுகிறது.அங்கு மனிதர்கள் ஒருவருக்கொருவர் உதவி செய்கிறார்கள்.
எனது தந்தை ஒரு சமூக சேவையிலிருந்துஇன்னொன்றுக்கு ஓடிக்கொண்டிருக்கிறார்.அவரது செல்வம் அல்லாஹ்வுடைய பாதையில் செலவளிக்கப்படுகிறது.
எனது உம்மா வீட்டிற்கு வரும் ஏழைகளுக்கு அள்ளி வழங்குகிறார்.விருந்தாளிகளுக்கு உணவளிக்கிறார்.

நான் கெஞ்சுகிறேன்.
நானும் அல்லாஹ்வுடையபாதையில் தான் இருந்தேன்.

மற்றவர்களுக்கு உதவினேன்.

அல்லாஹ்வுடைய தீனை மற்றவர்களுக்கு எத்தி வைத்தேன்.
எனது தொழுகைகளை நிறைவேற்றினேன்

ரமழானில் நோன்பு நோற்றேன்.

அல்லாஹ் சொன்னவற்றைச் செய்தேன்.

வேண்டாம் என்று சொன்னவற்றிலிருந்து தவிர்ந்து கொண்டேன்.
நான் எவ்வளவு அல்லாஹ்வை நேசித்தேன் என்பதை நினைத்து நான் விம்மி விம்மி அழத்துவங்கினேன்.

நான் உலகில் எதைத் தான் செய்திருந்தாலும் அது மிகக்குறைவே என்பதை அந்த நிமிடம் உணர்ந்தேன்.அல்லாஹ்வைத்தவிர வேறு யாராலும் என்னைக் காப்பாற்ற முடியாது என்று உறுதியாக அறிந்து கொண்டேன்.வியர்வை முன்னெப்போதும் இல்லாதளவு பெருகி வழிய நான் நடுநடுங்கினேன்.
கடைசித்தீர்ப்பை எதிர்நோக்கிய என் கண்கள் மீஸான் தராசில் நிலைகுத்தி நின்றன.

இதோ தீர்ப்பு.

நரகிற்கு செல்வோரின் பெயர்கள் வாசிக்கப்படுகின்றன.

இறைவா…….

என் பெயரும் வாசிக்கப்படுகிறது.
நான் முழங்காலில் விழுந்தேன்‘என்னால் முடியாது.இங்கே ஏதோ தவறு நடந்திருக்கிறது.நான் எப்படி நரகம் போக முடியும்” என்று கத்திக்கூச்சலிட்டேன்.தலை சுற்றியது.கண்களில் ஒளி மங்கியது.

மலக்குகள் இருவர் என்னை கொழுந்து விட்டெரியும் நரகிற்கு அழைத்துச் செல்கிறார்கள்.

என் கால்கள் கரடுமுரடான தரையில் இழுத்துச்செல்லப்படுகின்றன.

நான் சப்தமாக அழைக்கிறேன்.

“உதவுங்களே யாராவது”

எனது நற்செயல்களை அழைக்கிறேன்.ஓதிய குர் ஆனை,தொழுகைகளை அழைக்கிறேன்.

ரசூல் (ஸல்) அவர்களின் மணிமொழி ஞாபகத்துக்கு வருகிறது.ஐந்து முறை ஆற்றில் குளித்தால் உடம்பு சுத்தமடைவதைப்போல ஐவேளைத்தொழுகை பாவங்களை அழித்து விடுகிறது.

அழத்தொடங்கினேன்.

எங்கே என் தொழுகை?
எங்கே என் தொழுகை?

எங்கே என் தொழுகை?

மலக்குகள் நிற்கவில்லை;என் கதறலைக்காதில் போட்டுக்கொள்ளவுமில்லை.

நரகத்தின் சுவாலைகளின் வெப்பம் என் முகத்தை எரிக்கிறது.ஒரு முறை நம்பிக்கையின்றித் திரும்பிப்பார்க்கிறேன்.ஒரு மலக்கு என்னைப்பிடுத்து நெருப்புக் குண்டத்தில் தள்ளி விடுகிறார்.ஆவென்று கத்திக்கொண்டே நான் கீழே விழுகிறேன்.ஐந்தாறு அடிகள் விழுந்த பின் ஒரு கரம் என்னைப்பற்றி இழுக்கிறது.

தலையை உயர்த்திப்பார்க்கிறேன்.வெள்ளைத் தாடியுடன் ஒரு முதியவர்.

“நீங்கள் யார்?’

“நான் தான் உனது தொழுகை”

“ஏன் நீங்கள் இவ்வளவு தாமதித்து வந்தீர்கள்..இன்னும் கொஞ்ச நேரத்தில் நரகம் என்னை விழுங்கியிருக்குமே” ஆதங்கத்தோடு சொன்னேன்.

முதியவர் சிரித்தார்.”நீ எப்போதும் கடைசி நேரத்தில் தான் நிறைவேற்றினாய்,மறந்து விட்டாயா?

ஒரு நொடி…

நான் விழித்துக்கொண்டேன்,சஜ்தாவிலிருந்து தலையை உயர்த்தினேன்.

என் தாயும் தந்தையும் உரையாடுவது கேட்கிறது.

என் உடை வியர்வையில் குளித்திருக்கிறது.

அல்லாஹு அக்பர்!
அல்லாஹு அக்பர்!

இஷாவிற்கான அதான்.

உடனே எழுந்து வுழூ செய்வதற்காகச் சென்றேன்.

ஆங்கிலக்கதையின் தழுவல்

பயங்கரவாதத்துக்கெதிரான அமெரிக்காவின் போரும், முஸ்லிம் பெண்களும்

2011-05-11T12:49:00.000-07:00

.

‘பயங்கரவாதத்துக்கெதிரான போர்’ என்பது ஊடகங்களில் அடிக்கடி பேசப்படும் நமக்கெல்லாம் பரீட்சயமான ஒரு விடயம்.எனினும் பயங்கரவாதத்துக்கான அமெரிக்காவின் போருக்கும் முஸ்லிம் பெண்களுக்கும் என்ன தொடர்பு என்ற வினா நம்மில் அநேகரிடம் முகிழ்க்கலாம்.இந்த விடயம் எமக்கு முற்றிலும் புதிய விடயமாக இருந்தாலும் இது சர்வதேச ரீதியில் நீண்டகாலமாக பேசப்பட்டுவருகின்ற ஒரு தலைப்பாகும்.

உண்மையில்“பயங்கரவாதத்துக்கெதிரான போர்” (war against Terrorism) என்பது என்ன? கருத்தியல் ரீதியாக சமூகவியலாளர்கள் இதனைப்பின் வருமாறு அடையாளப்படுத்துகின்றனர்.

“ 2001 செப்டம்பர் 11ஆம் நாள் அமெரிக்காவில் இடம்பெற்ற இரட்டைக்கோபுரத் தாக்குதல் சம்பவத்தைத் தொடர்ந்து இஸ்லாமியத் தீவிரவாதத்தை இந்தப் பூகோளத்திலிருந்து துடைத்தெறிதலும் இஸ்லாமிய தீவிரவாதிகளுக்கும் அவர்களுக்கு உதவும் அனைத்து சக்திகளுக்கும் எதிராக அரசியல், சிந்தனை, ஆயுதம் மற்றும் முடியுமான அனைத்து வழிகளினூடாக செயற்படுதல்”

பயங்கரவாதத்திற்கெதிரான போர் அல்லது பயங்கரவாதத்துக்கெதிரான பூகோள யுத்தம் (Global war against terrorism) எனச் செல்லமாக அழைக்கப்படும் இனிப்புத்தடவிய விஷம் தான் இந்தக்கூட்டுப்பயங்கரவாதம்.

இந்தப்போரில் அமெரிக்காவினதும் இங்கிலாந்தினதும் தலைமையில் அவற்றின் நேச நாடுகள் அனைத்தும் ஒன்றிணைந்தன,

அமெரிக்க ,இங்கிலாந்து பிரஜைகள் மற்றும்,அணிசேரும் தேசங்களில் வாழ் மக்களைப் பாதுகாப்பதும்; அவர்களது பொருளாதார நலன்களை பெற்றுக்கொடுப்பதும் தான் இந்தப்பாரிய போர் முன்னெடுப்பின் முக்கிய இலக்காக அடையாளப்படுத்தப்பட்டது.

ஆனால் வெளிச்சத்துக்கு வராத உண்மை என்னவெனில் அமெரிக்காவின் தலைமையில், மேற்குலகும் இன்னும் சில உலகநாடுகளும் இணைந்து தமது பொருளாதார நலன்களையும் பலத்தையும் மையப்படுத்தி உலகில் ஏக ஆதிக்கத்தை நிறுவிக்கொள்வதற்காக மேற்கொண்ட ஒரு சுயநலமான சதித்திட்டம் தான் இந்த பயங்கரவாதத்துக்கெதிரான யுத்தம்.

அதில் முஸ்லிம் உலகும் முஸ்லிம்களும் ஒரு பொது எதிரியாக அடையாளப்படுத்தப்பட்டதை விடவும், இஸ்லாமும் இஸ்லாமிய தீவிரவாதமும் தான் பொது எதிரிகளாக அறிமுகப்படுத்தப்பட்டன.

உண்மையில் பயங்கரவாதத்துக்கெதிரான போர் மிகவும் விசித்திரமாக ஒழுங்குபடுத்தப்பட்டிருப்பதை ஆழமாக இதனை நோக்கும் ஒருவரால் கண்டுகொள்ள முடியும்.இந்தப்போரின் பின்னணியிலுள்ள சில அம்சங்கள் சிந்தனைக்குரியவை.

1.

மேற்குலகு தான் சார்ந்திருக்கின்ற மக்களைத் திருப்திப்படுத்த வேண்டும் அப்போது மட்டும்தான் மேற்குலகத்தலைமைகளால் தமது அரசியல் பொருளாதார எதிர்காலத்தை தக்கவைத்துக் கொள்ளமுடியும்.

2.

உலகின் மீதான ஆதிக்கத்தை தக்கவைத்துக் கொள்தல்.

இது சாதாரண காரணிகளால் நியாயப்படுத்தி சாதிக்கப்படக்கூடிய ஒரு ஐஸ்கிரீம் சாப்பிடுவதான விஷயம் அல்ல.உலகத்தை தம் பிடிக்குள் கொண்டு வர ஒரு அதிசிறப்பு வாய்ந்த திட்டம் தேவை. கிறிஸ்தவர்களாலும் யூதர்களாலும் ஏன் நாஸ்திக சடவாதிகளாலும் ஏற்றுக்கொள்ளப் படக்கூடியதாக இதனை மிக அழகாக வடிவமைக்க வேண்டும் அப்போது மட்டுமே உலகின் பரந்த ஆதரவு தமக்குகிடைக்கும் என்பது அமெரிக்கா சார் மேற்குலகின் உறுதியான நம்பிக்கை.எனவே இதற்கு சரியான இலக்கு இஸ்லாம். உலகில் மிக அதிகமாக தப்பாகப் புரியப்பட்டுள்ள மார்க்கம் இஸ்லாம் என சமூகவியல் ஆய்வுகள் சுட்டிக்காட்டுகின்றன பூகோளத்தை மேற்கின் உள்ளங்கைக்குள் கொண்டு வர சரியான துருப்புச்சீட்டு குறித்த சமூகங்களால் காலாகாலமாக வெறுக்கப்பட்டும் ஒதுக்கப்பட்டும் வந்த இஸ்லாம் என்பது மேற்கின் கணிப்பீடு.

3.

தமது செல்வாக்கிற்கு அச்சுறுத்தலாக இருக்கும் அமைப்புக்களை தந்திரோபயாமாக அழித்தொழித்தல்.

ஏற்கனவே உலகில் இயங்கிவருகின்ற இஸ்லாமிய அமைப்புகள், இயக்கங்களை பகைத்துக்கொள்வதற்கான அதி முக்கியமான தேவை அமெரிக்காவுக்கு இருந்தது.ஆனால் அவர்களைப்பகைத்துக்கொண்டு நேரடியாக யுத்தமொன்றினை அவர்கள் மீது தொடுத்தால், தனது எதிர்பார்ப்புகளுக்கு அப்பால் முஸ்லிம்களுடைய நிகழ்ச்சி நிரல் மாற்றியமைக்கப்படும், அவ்வாறு அது மாற்றியமைக்கப்பட்டால் அதனால் பாதிக்கப்படப்போவது வேறெதுவுமல்ல,மேற்குலகின் நிகழ்ச்சி நிரல் தான். எனவே தமது திட்டங்களுக்கு இசைவாக இயங்கும் ஒரு எதிரி தயார்பண்ணப்படவேண்டும் என்பதை மேற்குலகு நன்கு உணர்ந்திருந்தது,

அமெரிக்காவின் விசுவாசத்துக்குரிய “டிம் உஸ்மான்” (ஒஸாமா பின் லாதின்) என்பவரின் தலைமையில், அல்கைதா என்னும் முஸ்லிம் பெயர்கொண்ட அமெரிக்க முகவரகம் உருவாக்கப்பட்டது. இன்று வரை அந்த விசுவாசத்துக்குரிய எதிரி அமெரிக்கா வரைந்த கோட்டை மீறவில்லை.உஸாமா பின் லாதினை ஹீரோவாகக் கொண்டாடும் எமக்கு இதனை ஜீரணிக்க சற்றுக் கஷ்டமாய்த் தான் இருக்கும்.அல்கைதா அமைப்பில் இணைந்த உண்மையான முஜாஹிதுகள் பலர் அமெரிக்காவின் சதி பற்றி அறிந்து கொள்லாமலேயே களத்தில் போராடி வீரமரணமடைந்தனர்:இன்றும் போராடி வருகின்றனர்.இந்த உண்மையினை முழுமையாகத் தெரிந்தவர்கள் குவாண்டனாமோ போன்ற அமெரிக்க தடுப்புமுகாம்களில் சிறைவைக்கப்பட்டுள்ளார்கள்.

http://www.orlingrabbe.com/ என்னும் இணையத்தளத்தில் by J. Orlin Grabbe எழுதியுள்ள ஆக்கத்தில் இந்த விடயம் குறித்த மேலதிக விளக்கங்களைப்பெற முடியும்.

4.

மத்தியகிழக்கு மற்றும் ஏனைய வளமிக்க தேசங்களை மறைமுகமாக சூறையாடுதல்.

மத்தியகிழக்கிலும் ஏனைய முஸ்லிம் தேசங்களிலும் பரந்துவிரிந்து கிடக்கின்ற இயற்கை வளங்களை இலகுவாகப்பெற்றுக்கொள்ள வேண்டுமாயின் குறித்த பிரதேசங்களில் தமது ஆதிக்கத்தை வலுவாகவைத்துக்கொள்ளும் தேவை அவர்களுக்கு இருந்தது. உலகின் 70% ஆன எண்ணெய் ஒதுக்குகள் முஸ்லிம் நாடுகளிலேயே இருக்கின்றன.உலகின் மொத்த இயற்கை வாயு ஒதுக்குகளில் 49% ,முஸ்லிம்கள் பெரும்பான்மையாக வாழும் நாடுகளிலேயே அமைந்துள்ளது.

(நன்றி U.S. Geological Survey & Oil and Gas Journal)அது மட்டுமல்ல

யுரேனியம் உற்பத்தியில் 21% முஸ்லிம் நாடுகளிலிருந்தே பெறப்படுகின்றன.மேற்கில் நுகரப்படும் விவசாய உற்பத்திகளில் 40% ஆனவை முஸ்லிம் உலகத்தில் இருந்தேயாகும்.சுருங்க சொன்னால், இன்று பூகோள உருண்டை சுழல்வது முஸ்லிம் தேசங்களில் பொதிந்து கிடக்கின்ற வளங்களினாலாகும்.

மேற்படி முக்கிய சித்தாந்தங்களில் இருந்தே இந்தத் தலைப்பை நாம் அணுகவேண்டும் உலகின் பயங்கரவாததிற்கெதிரான போர் பெண்கள் சமூகத்தில் பின்வரும் அடிப்படைகளில் தாக்கங்களை ஏற்படுத்தியிருக்கின்றது

01- இதுவரை பயங்கரவாதத்திற்கெதிரான போர் இடம்பெற்ற ஆப்கானிஸ்தான், ஈராக் ஆகிய தேசங்களில் பெண்கள் மத்தியில் எழுந்துள்ள நேரடியான முதல் நிலை பாதிப்புகள்

02- பயங்கரவாததிற்கெதிரான போரில் நேரடியாக பங்கேற்ற மேற்குலக நாடுகளில் பரந்து வாழும் முஸ்லிம் பெண்களிடம் அது தோற்றுவித்திருக்கும் இரண்டாம் நிலை பாதிப்புகள்

03- பொதுவாக உலகில் வாழும் எல்லா முஸ்லிம் பெண்களையும் தழுவியதாக நிகழும் மூன்றாம் நிலை பாதிப்புகள்

இரும்புச்சுவர்களுக்குள் ஆப்கானியப்பெண் சமூகம்

ஆப்கான் -வரலாற்றின் தொடக்க காலம் முதலே அது ஒரு வளம் செழித்த பூமித்துண்டு. சீனாவுக்கும் அராபியாவுக்குமிடையிலான பட்டுப்பாதையில் அமைந்திருந்தமை அதன் கேந்திர முக்கியத்துவத்திற்கு காரணமாகும்.

ஈராக், ஈரான் ஆப்கானிஸ்தான், இவை அனைத்தும் 1904ஆம் ஆண்டுவரை ஒரே பிரதேசமாகவே அடையாளப்படுத்தப்பட்டிருந்தது, 1904ல் பிரித்தானிய காலனித்துவ வாதிகளின் திட்டப்படி ஆப்கான் ஈரானுடனான தனது எல்லைகளை ஒழுங்குபடுத்தி தனியான ஆட்சிப்பிரதேசமாக தன்னை அடையாளப்படுத்திக்கொண்டது.

1774ல் இஸ்லாமிய சாம்ராஜ்யத்திலிருந்து விலகி அஹ்மத் சாஹ் துர்ரானி ஆப்கானை ஒரு தனியான இராச்சியமாக நிறுவினார். தொடர்ந்து ஆப்கான் இங்கிலாந்தினதும் ரஷ்யாவினது ஆதிக்கப்போரில் சிக்குண்டு பல இழப்புக்களின் விளைநிலமாகியது.

1919 ல் ஆப்கான் மூன்றாவது அங்கோலாப்போரின் முடிவில் தனியான சுயாட்சியுடைய நாடாகப் பிரகடனப்படுத்தப்பட்டது. இதே பொழுதுகளில் இங்கிலாந்தின் காலனித்துவமும் முடிவுக்கு வந்தது, இருப்பினும் இங்கிலாந்தும் ரஷ்யாவும் தமது கூலிப்படைகளை அமர்த்தி மறைமுகமாக ஆப்கானில் சிவில் யுத்தத்தை நடாத்தினர்.

இதன் ஒரு கட்டமாக 1979ல் ரஷ்யப்படை ஆப்கானுக்குள் பிரவேசித்து ஆப்கானை ஆக்கிரமித்தது. பழமை பேணுகின்ற பழங்குடிகளைக்கொண்ட ஆப்கான் இஸ்லாமிய சாம்ராஜ்யத்தின் மகுடமாய் ஒளிர்ந்தது, மிகவும் ஆரோக்கியமான சமூகக்கட்டமைப்பையும், கடினமான மலைப்பாங்குகளில் வசிக்கின்ற திடகாத்திரமான மக்கள் வளத்தையும் கொண்டதாக ஆப்கான் திகழ்ந்தது.

முஸ்லிம்கள் ரஷ்யப்படைக்கெதிராக ஜிஹாதை மேற்கொண்டு இஸ்லாமிய சாம்ராஜ்யத்தை நிறுவ திடசங்கற்பம் பூண்டு செயற்படுகின்ற வேளையில் மேற்கின் சதித்திட்டத்தின் ஒரு உருவாக்கமான அமெரிக்க பிரித்தானிய ஏஜெண்டுகளான தாலிபான்கள் ஆப்கானீய ஜிஹாதில் நுழைகின்றனர்,

உண்மையான முஜாஹிதுகள் வியர்வையும் இரத்தமும் சிந்திப் பெற்ற வெற்றி காற்றிலடித்த பஞ்சாய்ப் பறந்து உள்நாட்டுப்போர் மீண்டும் மூளுகின்றது, இந்நிலையில்தான் அமெரிக்காவின் ஏஜெண்டுகளாக இருந்த தாலிபான்கள் தாம் ஆட்சிக்கு வந்ததும் அமெரிக்காவை எதிர்க்க தன்னிச்சையாக முடிவு செய்தனர் இதனைக் காரணமாக வைத்தே ஆப்கானின் மீது அமெரிக்காவின் ஆக்கிரமிப்புப் படையெடுப்பு 2002ஆம் ஆண்டு தொடக்கப்பட்டது.

சுமார் 9 வருடங்களையும் தாண்டியும் இன்னமும் அமெரிக்கா ஆப்கானில் தனது நோக்கத்தை அடைந்துகொள்ளவில்லை என்று சொல்லி உலகை ஏமாற்றி வருகிறது. கடந்த 100 வருடங்களாக பிரித்தானியாவும் ரஷ்யாவும் அமெரிக்காவும் மாறி மாறி ஆப்கானில் மனித வேட்டை நடாத்திவிட்டு ஆப்கானிய மக்கள் தாலிபான்களினால் அடிமைகளாக்கப்பட்டுள்ளார்கள் எனவேதான் நாம் அவர்களை விடுவிக்க முயற்சிக்கின்றோம் என்று நீலிக்கண்ணீர் வடிக்கின்றார்கள்

கடந்த 100 வருட மேற்குலகின் ஆக்கிரமிப்பு நடவடிக்கைகளாலும் யுத்த நிகழ்வுகளாலும் ஆப்கானிய மக்களின் குறிப்பாக பெண்களின் வாழ்வியல் ஒழுங்கு முற்றாக சீரழிந்திருக்கின்றது.

கல்வி வாய்ப்புகள் தொழில் வாய்ப்புகள் முறையாக பெற்றுக்கொள்ளமுடியாத துர்ப்பாக்கியமான நிலைக்கு அவர்கள் ஆளாகியுள்ளனர்,வாழ்வாதாரம் தொலைந்த நிலையில் இருப்பே வினாக்குரியாய் விடைத்து நிற்கிறது.தொடந்தும் 100 வருடங்கள் யுத்தக்கலாச்சாரத்தினால் அவர்களது மனோநிலை மற்றும் வாழ்வியல் ஒழுங்குகள் யுத்ததிற்கு ஏற்ற அமைப்பிலேயே ஒழுங்கமைக்கப்பட வேண்டிய கட்டாயம் நேர்ந்திருக்கிறது.

எனவே பெண்களை சமூக வேலிகளுக்குள் பாதுகாக்கவேண்டிய நிர்ப்பந்தம் ஆப்கானிய சமூகத்திற்கு ஏற்பட்டிருக்கின்றது. இதன் காரணமாக பெண்களை சாதாரண நாகரீக உலகோடும் அசுர வேக வளர்ச்சி காணும் தொழிநுட்ப மாற்றங்களோடும் அவர்களால் தொடர்புபடுத்த முடியாத இக்கட்டு நேர்ந்திருக்கிறது.

வேலியை மேய்ந்த வெள்ளாட்டு மேற்குலகு இன்று தன்னை மிகவும் நல்லபிள்ளையாகக் காட்டிக் கொள்கின்றது ஆனால் வேறு யாருமல்ல இதே மேற்குலகம் தான் ஆப்கானியப்பெண்களின் பின்னடைவுக்கான மூல கர்த்தாக்கள் என்பதை யாரும் மறுக்க முடியாது.

யுத்ததினால் ஏற்படும் சாதாரண மன உளைச்சல் முதல் கொண்டு பாலியல் பலாத்காரம் வரையான கண்ணீரும் கொடுமையும் ஆப்கானியப்பெண்களின் அன்றாட வாழ்க்கையாகி விட்டிருக்கிறது.

ஆப்கானியப்பெண்களை நாகரீக மயப்படுத்துவதற்கான செயற்திட்டம் என்ற பெயரில் ஏராளமான அமெரிக்கக் குள்ள நரித்தன அரங்கேற்றங்கள் இன்று ஆப்கானில் அறிமுகப்படுத்தப்பட்டிருக்கின்றன, அழகு நிலையங்கள் தொடங்கி விபச்சார விடுதிகள் வரை அமெரிக்கர்களினால் திட்டமிடப்பட்டு பகிரங்கமாக அறிமுகப்படுத்தப்படுகின்றன, ம்ற்றொரு புறத்தில் பெண் ஒருபால் சேர்க்கை முறையும் மேலைத்தேய பெண்ணியமும் ஆப்கானில் ஊடுருவி வருகின்ற கவலையான செய்தி நெஞ்சை அறுக்கிறது. அமெரிக்க சிந்தனைகளைக்கொண்டு செல்லும் உள்ளூர் பெண் அறிஞர்களுக்கும் ஊடகவியலாளர்களுக்கும் இங்கு பற்றாக்குறையில்லை, இவ்வாறாக ஆப்கானியப்பெண்கள் தமது இயல்பானதும் இஸ்லாத்தின் வழிநின்றதுமான வாழ்வியலை விட்டும் வெகுதூரத்துக்கு அழைத்துச்செல்லப்படும் சமூகவியல் ரீதியான அபாயம் இன்றைய ஆப்கானில் நிலவுகின்றது.

யுத்தத்தில் பயன்படுத்தப்பட்ட பேரழிவு ஆயுதங்களினால் ஏற்படுத்தப்பட்ட இரசாயன ரீதியான பாதிப்புக்கள் காரணமாக இயற்கைச்சூழல் ஆரோக்கியமான வாழ்தலுக்கு அச்சுறுத்தலாகி உள்ளது.இனந்தெரியாத நோய்கள் குறிப்பாக பெண்கள் மத்தியிலும் சிறார்கள் மத்தியிலும் காணக்கூடியதாக இருக்கின்றது, குழந்தைப்பேறு இன்மை, வலது குறைந்த மற்றும் புத்திசுவாதீனனம்ற்ற குழந்தைப்பேறுகள் என ஆப்கானியப் பெண் சமூகம் எதிர்கொள்ளும் சவால்கள் நீள்கின்றன.

உலகில் அதிக உரிமைகளைஅனுபவித்த ஈராக்கியப்பெண்கள்

1980களுக்குமுந்திய ஈராக்கியப் பெண்களின் நிலை உலகில் மிகவும் உயர்வான இடத்தில் வைத்து நோக்கப்பட்டது, உலகில் அதிகம் கல்வியில் தேர்ச்சி கண்ட பெண்களைக்கொண்ட நாடாகவும் ஈராக்கே திகழ்ந்தது, 1980ல் ஈராக்கின் யாப்பில் பெண்களுக்கும் ஆண்களுக்கும் எவ்விதபாகுபாடுமற்ற சட்டமுறைமைகளை காணக்கூடியதாக இருந்தது. ஈராக்கியப்பெண்களே உலகில் அதிகம் உரிமைகளை அனுபவித்தவர்கள் என்று 1990ஆம் ஆண்டின் ஐ.நா அறிக்கை கூறுகின்றது. மகப்பேற்றுக்கான விடுமுறைக்காலம் 6 மாதங்களாகவும் இருந்ததோடு குறித்த 6மாதத்துக்குமான முழுமையான சம்பளம் அவர்களுக்கு வழங்கப்பட்டதோடு மேலதிகக் கொடுப்பனவுகளும் அவர்களுக்கு கிடைக்கப்பெற்றன.இது மட்டுமல்லாது பொருளாதார சுதந்திரம் முதல் நாட்டின் அரசியலில் ஈடுபடுவது முதலாய சகல துறைகளிலும் ஆண்களுக்கு நிகரான பங்களிப்பை வழங்குவதில் ஈராக்கியப்பெண்கள் பின்னிற்கவில்லை.

1991 அமெரிக்க மறைகரத்தின் உந்துதலால் வளைகுடாப்போர் தொடங்கப்பட்டது அன்றுதான் ஈராக் தனது மக்களுக்கு மன்னிக்கப்பட முடியாத ஒரு பெருந்தவறை இழைத்தது. தனக்கிருந்த எதிரியை மடக்குவதற்கு உலகின் வடிகட்டிய நயவஞ்சகனோடு ஈராக் கைலாகு செய்தது. விளைவு இன்னும் பல பத்து ஆண்டுகளுக்கு மறுமலர்ச்சியை நினைத்தே பார்க்கமுடியாத அளவுக்கு அது பின்தள்ளப்பட்டது.

நடந்து முடிந்த யுத்த வடுக்களை சரிசெய்து முடிப்பதற்குள் இன்னொரு பூகம்பத்தை ஈராக் எதிர்நோக்கியது. 2003ல் அமெரிக்க ஆதிக்கப்போர் ஈராக் மேல் தொடக்கப்பட்டது.அன்று முதல் இன்று வரை ஈராக்கியப்பெண்கள் எதிர்கொள்ளும் அவலங்களை வெறும் எழுத்துக்களால் விவரித்து விட முடியாது.

உயிர் உடமை இழப்புகள் தொடர்கதையாகும் அவர்களது வாழ்க்கை ஆப்கானிய பெண்களின் வாழ்வையே கூடுதலாகவோ குறைவாகவோ ஒத்திருக்கின்றது. ஒரு காலத்தில் பெண் அறிஞர்களின் தாயகமாகத் திகழ்ந்த ஈராக்கில் இன்று வாழும் பெண்கள் கடுமையான உளப்பாதிப்புக்களால் அன்றாட வாழ்வைக்கொண்டு நடாத்தும் திறனைக்கூட இழந்திருக்கும் துக்கம் தொண்டை அடைக்கிறது.

பாலியல்பலாத்காரங்கள், துஷ்பிரயோகங்கள், உளவியல் கெடுபிடிகள், அச்சம், என அவர்களது வாழ்வியல் ஒரு மீள முடியாத ஒரு குப்பை மேட்டில் வீசி எறியப்பட்டிருக்கிறது.விதவைகளின் எண்ணிக்கை ஏறிச்செல்லும் அதே வேளை, அநாதைகளின் அளவுகளிலும் உளநோயாளிகளின் அளவுகளிலும் வெகுவான அதிகரிப்பு நிக்ழ்ந்திருக்கின்றது. சமூகவியல் நோக்கில் பார்க்கும் போது இது ஆரோக்கியமான சமூகக்கட்டமைப்பின் அடித்தளத்தையே ஆட்டங்காண வைக்கும் அம்சமாகும்.சதாமின் மறைவோடு அமெரிக்காவின் அட்டகாசம் அடங்கும் என்று நினைத்தால் அது வேறுவிதமாகவே இருக்கின்றது.

இரண்டாம் நிலைப்பாதிப்புகள்

இரண்டாம் நிலைப்பாதிப்புகள் என்று இங்கு நாம் அடையாளப்படுத்துவது குறிப்பிட்ட பயங்கரவாததுக்கெதிரான போரினை நடாத்துகின்ற அமெரிக்க மற்றும் மேலை நாடுகளில் தோன்றியிருக்கின்ற முஸ்லிம் பெண்கள் எதிர்கொள்ளும் பாதிப்புக்களையாகும்.

மேலைநாட்டு முஸ்லிம் பெண்கள் எனும் போது மேற்கு தேசங்களில் பிறந்து இஸ்லாத்தைத் தழுவிக்கொண்ட பெண்கள்,முஸ்லிம் பெற்றோர்களுக்கு பிறந்த மகளிர் மற்றும் கீழைத்தேய நாடுகளிலிருந்து அங்கு குடிபெயர்ந்த மங்கையர் ஆகிய அனைவரையும் உள்ளடக்கலாம்.

செப்டெம்பர் 11 தாக்குதலுக்குப்பின்னர் என்றுமில்லாத வகையில் மேற்கில் இஸ்லாத்தினை அறியும் ஆர்வம் கிளர்ந்தெழுந்துள்ளது.அந்த வகையில் ஒப்பீட்டளவில் ஆண்களை விட பெண்களே இஸ்லாமிய சிந்தனைகளை நோக்கி ஈர்க்கப்பட்டு வருவதை பல ஆய்வுகள் உறுதி செய்கின்றன.முஸ்லிம் பெண்கள் விரும்பி அணியும் கெளரவமான ஹிஜாப் உடை இன்று பிற்போக்குவாதத்தின் சின்னமாகவும் அடிமைத்தனத்தின் அடையாளமாகவும் சித்தரிக்கப்படிகிறது. அமெரிக்காவினதும் அதன் அடிவருடிகளினதும் ‘பயங்காரவதத்திற்கெதிரான யுத்தத்தின் பின்னால் குறிப்பாக மேலைத்தேய நாடுகளில் ஹிஜாபிற்கெதிரான நடவடிக்கைகள் தீவிரம் பெற்றிருக்கின்றன.

யூதர்கள் அணியும் சிறு தொப்பியோ, சீக்கிய சமுதாய மக்கள் அணியும் தலைப்பாகையோ அல்லது இஸ்லாமிய ஆண்கள் அணியும் தொப்பியோ, ஆணடிமைத்தனத்தை ஏற்படுத்துவதாக குரல் எழுப்ப எண்ணாத இவர்கள், இஸ்லாமிய பெண்கள் ஹிஜாப் அணிய முன்வருகையில் மட்டும் கொதித்தெழுந்து துடிப்பதன் பின்னணி என்ன?

ஐரோப்பா, அமெரிக்கா மற்றும் ரஷ்யா உட்பட உலகின் அனைத்து நாடுகளிலும் உள்ள கிறிஸ்துவ கன்னியாஸ்திரிகள் முஸ்லிம் பெண்கள் அணியும் உடையை ஒத்ததான தலையையும் உடலையும் முழுவதுமாக மறைக்கும் அங்கியை அணிகின்றனர். இவர்களை எவரும் பரிதாபமாக பார்ப்பதுமில்லை,பெண்ணுரிமை பறிபோனதாகக் கூக்குரல் எழுப்புவதுமில்லை.

அண்மைக்காலமாக லண்டன் மாநகரத்திலும் முஸ்லிம்களுக்கு எதிரான இன வெறித் தாக்குதல்கள் அதிகரித்து வருகின்றன. இதிலும் குறிப்பாக ஹிஜாப் அணியும் பெண்கள் பெரிதும் பாதிக்கப்பட்டுள்ளார்கள். இச்சூழலில் லண்டனில் உள்ள முஸ்லிம் கல்லூரியின் முதல்வரும், பிரிட்டன் பள்ளிவாசல் மற்றும் இமாம்கள் குழுமத்தின் தலைவருமான ஷேக் ஜக்கி பதாவி அவர்கள், “ஹிஜாப் அணிவதால் தாங்கள் தாக்குதலுக்கு இலக்காகுவோம் என்று அஞ்சும் பெண்கள் ஹிஜாப் அணிவதைத் தவிர்த்துக் கொள்ளலாம்” என்று கூறும் அளவுக்கு விவகாரம் முற்றியிருக்கிறது.எனினும் என்ன நடந்தாலும் ஹிஜாபைத்துறக்க மாட்டோம் என்று இங்கிலாந்து யுவதிகள் உறுதியாய் நின்றிருப்பது இன்னொரு பக்கத்தில் மகிழ்ச்சி அளிக்கிறது.

லண்டன் குண்டுவெடிப்புகளைத் தொடர்ந்து 5 லட்சம் முஸ்லிம்கள் பிரிட்டனை விட்டு செல்ல முடிவெடுத்திருப்பதாக கார்டியன் நாளிதழ் நடத்திய ஆய்வு கூறுகிறது.குண்டு வெடிப்பு நடைபெற்ற பிறகு மூன்று நாட்களில் 1500 முஸ்லிம் பெண்கள் இனவெறித் தாக்குதல்களுக்கு இலக்கானார்கள்.

இதே நேரம் கடந்தாண்டு ஜேர்மனியின் "ட்ரெஸ்டன்' நகரிலுள்ள நீதிமன்றில் "மர்வா அல் ஷெர்பினி' எனும் 31 வயதேயான பெண் அநியாயமாகக் குத்திக் கொல்லப்பட்ட சம்பவத்தின் காயம் இன்னும் ஈரமாகவே இருக்கிறது.
அலெக்ஸ் எனும் 28 வயது இளைஞன் ஷெர்பினியைப் பார்த்து "தீவிரவாதி' என அழைத்ததுடன் மிக மோசமான தூஷண வார்த்தை ஒன்றையும் பிரயோகித்துள்ளான்.ஷெர்பினி இஸ்லாமிய முறையில், ஹிஜாப் அணிந்திருந்ததே இவ்வாறு தூற்றப்படக் காரணமாகும்.
தன்னையும், தான் பின்பற்றும் மார்க்கத்தையும் தூற்றியமையால் ஆத்திரமுற்ற ஷெர்பினி "ட்ரெஸ்டன்' நகரிலுள்ள நீதிமன்றில் வழக்குத் தொடர்ந்தார். நீதிபதிகளும் நீதிமன்றக் காவலர்களும் பார்த்திருக்க திடீரெனப் பாய்ந்து வந்த அலெக்ஸ் தனது ஆடைக்குள் மறைத்து வைக்கப்பட்டிருந்த கத்தியை உருவி மூன்று மாதக் கர்ப்பிணியான ஷெர்பினியின் வயிற்றில் 18 தடவைகள் குத்தினான்
"தீவிரவாதம்', "பயங்கரவாதம்', "மனித உரிமை' பற்றி அதிகம் பேசும் மேற்குலகில் நடந்த இச்சம்பவம் ஒரு பானைச்சோற்றின் ஒரு பதம் மட்டுமே.

ஒரு பெண் கண்முன்னால் கொல்லப்படுகையில் அவளை காப்பாற்ற முனையாது வேடிக்கை பார்த்த ஜேர்மனிய பொலிசாரையும் நீதிபதிகளையும் மேலைத்தேய சிந்தனைகளால் மூளைச்சலவை செய்யப்பட்ட ஊடகங்கள் எவ்வாறு வர்ணிக்கப்போகின்றன?அதிகபட்சம் முஸ்லிம் பெண்களின் ஹிஜாப் அவர்களது உயிர்களுக்கே அச்சுறுத்தலாக இருக்கிறது என்று அறிக்கை விடுவார்கள்.

அண்மையில் பிரான்சில் முஸ்லிம் பெண்கள் முகத்தை மறைத்து அணியும் ஆடையைத் தடை செய்வது குறித்து நிகலஸ் சார்கோஸி வெளியிட்ட கருத்து ஊடகங்களில் பெரும் கவனயீர்ப்பைப் பெற்றிருந்தது. சார்கோசியின் இந்த வெறுப்பேற்றும் கருத்து இனவெறிக்கும்பல்களின் கொலை வெறிக்குப் பின்னணிக் காரணமாக அமைய முடியும் என சமூகவியலாளர்கள் கூறுகின்றனர்.Save Muslim women முஸ்லிம் பெண்களை காப்போம் என்ற அடிப்படையில் எழுந்ததாக வாதிடப்படும் ஹிஜாபுக்கெதிரான தடை இறுதியில் அவர்களுக்கெதிராக அநீதியாக நடாத்தப்பட்டு வரும் போரை ஒதுக்கப்படல்களை நியாயப்படுத்தி முஸ்லிம் பெண்களின் இருப்புக்கே அச்சுறுத்தலாக மாறியுள்ளது.சார்கோஸியின் கருத்தும் எரிகிற நெருப்புக்கு எண்ணெய் வார்ப்பதாகவே அமைந்திருக்கிறது.

பாகிஸ்தானைச் சேர்ந்த டொக்டர் ஆஃபியா சித்தீகி அமெரிக்காவின் பெருமைமிக்க மாஸசூசெட்ஸ் நிறுவனத்தின் உயிரியல் பட்டதாரி.அவரது முனைவர் பட்டத்துக்காக ப்ரெண்டிஸ் பல்கலைக்கழகத்தில் ‘நடத்தைசார் நரம்பியல் விஞ்ஞானத்தினை’ பாடமாக எடுத்து கலாநிதி பட்டம் பெற்றவர்.தனது பட்டப்படிப்பை மேற்கொள்ளும் போது ‘பாகிஸ்தானை இஸ்லாமிய மயமாக்கலும் பெண்களின் மீது அதன் தாக்கமும்’என்ற ஆய்வுக்காக ‘கரோல் வில்ஸன் விருது’பெற்றவர். டொக்டர் ஆஃபியா, உஸாமா பின் லேடனின் தீவிரவாத அமைப்புகளுக்குப் பணப் பரிமாற்றம் செய்துள்ளதற்கான ஆதாரங்கள் கிடைத்துள்ளதாகவும் அவர் எங்கிருந்தாலும் உடனடியாக FBஈ க்கு அறியத்தருமாறும் திரும்பத் திரும்ப அறிவித்தல்கள் கொடுக்கப்பட்டன.
பாகிஸ்தானின் கராச்சியில் உள்ள குல்ஷனே இக்பால் பகுதியிருந்த தன் தாய் வீட்டிலிருந்து ராவல்பிண்டிக்கு செல்ல டக்ஸியில் ஏறுகிறார் டொக்டர் ஆஃபியா.
அவருடன் 7 வயதான மகன் அஹ்மத் 5 வயது மகள் மர்யம்.வாகனத்தில் அமர்ந்திருக்கிறார்கள்.டொக்டர் ஆஃபியாவின் மடியில் 6 மாதங்களே நிரம்பிய குழந்தை சுலைமான் .
விமானநிலையம் நோக்கிச் சென்ற ஆஃபியா குழந்தைகளுடன் காணாமல் போகிறார். செல்லும் வழியிலேயே பாகிஸ்தானின் உளவுத்துறையினரால் (Pakistani intelligence agencies) மடக்கப்பட்டு American Federal Bureau of Investigation (FBI) யிடம் ஒப்படைக்கப்பட்டார் என்கின்றன ஊடகங்கள். டொக்டர் ஆஃபியாவிக்கு என்ன ஆனது என்று தெரியாமல் ஒட்டு மொத்த மக்களும் திணறிக் கொண்டிருந்த வேளையில், ஆப்கானிஸ்தானின் பக்ரம் (Bagram) சிறையில் Prisoner 650 என்ற பட்டப் பெயர் கொண்ட ஒரு பெண் சித்ரவதைப் படுத்தப் படுவதாக செய்திகள் கசியத் துவங்கின. கொடுமைகளின் உக்கிரம் தாங்க இயலாமல் தொடர்ந்து கைதி எண் 650 சுய நினைவை இழந்துள்ளதாக அத்தகவல்கள் வெளியானதைத் தொடர்ந்து சுயாதீன ஊடகங்களின் பார்வை அந்தப்பக்கம் திரும்பியது.
Prisoner 650 என்று பெயரிடப்பட்ட அப்பெண்மணி உடல் ரீதியாக கடுமையான சித்ரவதைகளுக்கு உள்ளாகியிருப்பதாகவும் சிறைக் காவலர்களால் தொடர்ந்து வன்புணர்ச்சிக்கு ஆளாக்கப்பட்டிருப்பதாகவும் அதிர்ச்சித் தகவல்கள் வெளியாகின. 2008 ஓகஸ்ட் 4ந்திகதி அமெரிக்க அரசு ஆஃபியா சித்தீகி ஆப்கானில் வைத்து கைது செய்யப்பட்டதாக உத்தியோக பூர்வமாக அறிவித்தது.ஜூலை 17 ந்திகதி
பாரியளவிலான தாக்குதலுக்கான வரைபடங்களுடனும் குண்டு தயாரிப்பிற்கான குறிப்புக்களுடனும் அவரையும் அவரது மூத்த மகனையும் கைதுசெய்ததாக அறிவித்த அமெரிக்கா18ந்திகதி ஆஃபியா அமெரிக்க அதிகாரி ஒருவரை அவரது துப்பாக்கியைப் பறித்து சுட்டுக்கொலை செய்ய முயற்சித்ததாகவும் குற்றம் சுமத்தியது.அத்தோடுஅமெரிக்க அரசு ஆஃபியா கடந்த 5 வருடங்களாக எங்கிருந்தார் என்பது தனக்குத் தெரியாது என்று முழுப்பூசணியை சோற்றில் மறைத்தது.
ஓகஸ்ட் 4ந்திகதி ஆஃபியா அமெரிக்காவின் நிவ்யோர்க் மாஜிஸ்ட்ரேட் நீதிமன்றில் ஆஜர் செய்யப்பட்டார்.` டொக்டர் ஆஃபியா சிறையிலிருந்த போது அவரது ஒரு சிறுநீரகம் அகற்றப்பட்டுள்ளதோடு அவரது மனநிலையும் கடுமையாகப் பாதிக்கப்பட்டுள்ளது என அவரது வழக்குறைஞர்கள் சொல்கிறார்கள்.
அவரது உடம்பிலிருந்த துப்பாக்கிச்சூட்டுக்காயத்தில் இரத்தம் உரைந்து சரியாகக் கவனிக்கப்படாமல் சகிக்க முடியாமல் இருந்ததோடு ஆஃபியா வின் உடல் நிலை மோசமாகப் பாதிக்கப்பட்டிருந்தது. இந்த வருடம் பெப்ரவரி 3ந்திகதி வழக்கில் டொக்டர் ஆபியாவை விசாரித்த நீதிமன்று அவர் குற்றவாளி எனத் தீர்ப்பளித்துள்ளது. அவருக்கு ஆயுள் தண்டனை வழங்கப்பட்டுள்ளதுடன் மே 6,2010 யிலிருந்து அவரது தண்டனைக்காலம் ஆரம்பமாகிறது.

கடந்த ஓகஸ்ட் மாதத்தில் பிரான்ஸ் இத்தாலி ஆகிய நாடுகள் புர்கினி என்ற மூடிய நீச்சலுடையைத்தடை செய்தன.முகம்,கை தவிர்ந்த உடலின் ஏனைய பாகங்களை மறைக்கும் இந்த உடையை அணிந்து கொண்ட பெண்களுக்கு நீச்சல் தடாகங்களில் அனுமதி மறுக்கப்பட்டது.

மூன்றாம் நிலை பாதிப்புகள்

அதி கூடிய முஸ்லிம் சிறுபான்மையினரைக் கொண்டுள்ள நமது அண்டை நாடான இந்தியாவின் பல பாடசாலைகளிலும் கல்லூரிகளிலும் ஹிஜாப் அணிவதற்கெதிரான அழுத்தங்கள் தோன்றியுள்ளன.ஹிந்துத்துவா போன்ற அமைப்புக்கள் இதன் பின்னணியில் செயற்படுவதாக சில கல்லூரி அதிபர்கள் பகிரங்கமாக ஒத்துக்கொண்டுள்ளனர்,

இலங்கையில் சில கல்விக்கலாசாலைகளில் மாணவிகள் ஹிஜாப் அணிந்து தமது கல்வி நடவடிக்கைகளைத் தொடர கல்லூரி நிருவாகங்கள் தடைவிதித்துள்ள விடயத்தை நாம் ஏலவே அறிவோம்.

முன்பும் ஆங்காங்கே சில சம்பவங்கள் நடைபெற்றாலும் பயங்கரவாதத்துக்கெதிரான போரைத்தொடர்ந்தே இந்நடவடிக்கைகள் உக்கிரம் பெற்றுள்ளன.

மீறி ஹிஜாப் அணியும் மாணவியர் கடுமையான சொல்லாடல்களால் சாடப்படுகிறார்கள்,அவமானப்படுத்தப்படுகிறார்கள்.

இவ்வாறான காரணங்கள் பயங்கரவாதத்துக்கெதிரான போரின் பக்க விளைவுகளே ஆகும் என்பதை யாரும் மறுக்க முடியாது.முஸ்லிம் பெண்கள் பொது வசதிகளை பாவிப்பதற்கு அனுமதி மறுக்கப்படுகிறார்கள்.கல்லூரிகளிலிருந்து இடைநிறுத்தப்படுகிறார்கள்.அல்லது வெளியேற்றப்படுகிறார்கள். விமானப்பயணங்களில் அச்சுறுத்தல்களை எதிர்நோக்குகிறார்கள்.பொலிஸாரினால் துன்பத்துக்குள்ளாக்கப்படுகின்றார்கள்.

மேற்கு ஈட்டித்தருவதாக ஆசை காட்டும் பெண் விடுதலை எப்படிப்போனாலும் இன்று முழு உலகிலும் முஸ்லிம் பெண்கள் இதே விடுதலையின் பெயரால் வன்முறைக்கும்,ஓரங்கட்டப்படுதலுக்கும் தீண்டாமைக்கும் இலக்காகி இருக்கும் துயரம் நெஞ்சு துவைக்கிறது.

சில சம்பவங்களும் விலை போகும் கண்ணியமும்

2011-05-03T23:46:00.000-07:00

சமீலா யூசுப் அலி

சம்பவம் 01

கொழும்பு கண்டி பஸ் புறக்கோட்டை தரிப்பிடத்திலிருந்து உறுமலுடன் புறப்படுகிறது.

பஸ்ஸில் சிற்றுண்டி விற்பவர்களின் குரல்கள் கலவையாக ஒலிக்கின்றன.

திமு திமு வென்று ஒரு இஸ்லாமியச் சகோதரர்கள் கூட்டம் பஸ்ஸின் காலியான ஆசனங்களில் வந்தமர்கிறது.

வாட்டசாட்டமான தொப்பி தாடி இளைஞர்கள் .

ஏதோ தஃவா வேலைக்காக சென்று விட்டு வருவதை உணர்த்துவதான உரையாடல்கள்.

ஒரு சகோதரர் உரத்த குரலில் குர் ஆனை ஓதுவதும் செவிகளுக்கு வந்து போனது.

சில நிமிடங்கள் கழித்து ஏறிய ஒரு வயதான தாய் ஆசனத்தில் அமர்ந்திருப்பவர்களை நோட்டமிடுகிறார். பஸ்ஸின் ஆட்டத்துக்கு ஈடுகொடுக்க முடியாமல் தள்ளாடும் வயது.இஸ்லாமிய ஊழியர்கள் யாரும் அசைந்து கொடுக்கவில்லை.

‘அம்மே வாடிவெண்ட’என எழுந்து இடம் கொடுக்கிறார் ஒரு நடுத்தர வயது சிங்கள சகோதரர்.

சம்பவம் 02

ஹொஸ்பிடலில் பார்வையாளர் நேரம்.

ஒரு கட்டிலைச்சுற்றி ஏகப்பட்ட கூட்டம்.ஏதோ உல்லாசப்பயணத்துக்கு வந்தது போல குழந்தை குட்டிகள் சகிதம் புறப்பட்டு வந்திருப்பது விளங்கியது.

தேவைக்கதிகமான பேச்சும் சிரிப்பும் எல்லோர் கவனத்தையும் ஈர்க்கத் தவறவில்லை.

நோயாளிகள் மட்டுமல்லாது பார்வையாளர்களும் ஒரு வித வெறுப்புணர்வோடு

தலையை திருப்பிப்பார்ப்பது விளங்கியது.

செக்யூரிடி அலுவலர் ,நேரம் முடிந்து விட்டது என்பது சாம,தண்ட,பேத முறைகளில் உணர்த்திய பின்னரும் கூட்டம் நகர்வதாக இல்லை.

“இந்த முஸ்லிம்களே இப்படித்தான்’ என ஒரு முணுமுணுப்பு ஓரமாய் எழுந்தது.

சம்பவம் 03

‘வாங்கோ மாமி,இரீங்கோ…

மிச்ச நாளா காணல்ல’

‘சொகமில்லாம ஈந்த மகள்’

‘டொக்டர்ட போகல்லியா மாமி’

‘ஓ…புள்ள சக்திவேல் கிட்டத்தான் போன.அவன் நல்லம்.ஆனா மருந்து கொஞ்சம் பவர்’

‘ஏ மாமி

மஹிந்த …அவனும் நல்லம்.’

பாத்திமா மாமியும் ரைஹானா தாத்தாவும் கதையைத் தொடர்கின்றனர்.

‘உம்மா…………

ஹதியாவொண்டு தாங்கும்மா……….

வாசலில் ஒரு குரல் ஏற்ற இறக்கங்களுடன் ஒலிக்கிறது.

‘யாரென்னும்மா அது’ பாத்திமா மாமி.

‘ஆ மாமி இது வியாழக்கெழம வார முஸாபர் ஒண்டு.

கொஞ்சம் இரீங்கோ,அவருக்கு ஹதியா குடுத்துட்டு வாரென்’

அவன்= அந்திய மதத்தவர்

அவர்= முஸ்லிம்

சம்பவம் 04

மாஹிராவுக்கு திருமணம்.

மாப்பிள்ளை ஒரு டொக்டர்.வெளிநாட்டில் வேலை பார்க்கிறாராம்.

‘மாஹிரா வீட்டில் நேற்று மருதோண்டிக் கலியாணம்டீ’

ஷா…ஏண்டீ நீ வரல்ல..பாத்தீக்கோணுமே அவள் உடுத்தீந்த சாரி மட்டும் அம்பதுனாயிரமாம்டீ…

ரிஷாதா கண் இரண்டையும் அகல விரித்து ஹமீதாவுக்கு சொல்லிக்கொண்டிருந்தாள்.

‘எனக்கும் வர ஈந்திச்சிடீ…அநியாயம்.மருதோண்டிக்கலியாணத்துக்கே இப்டீண்டா வெடிங் எப்டியோ தெரியாவே…

ஹமீதாவிடமிருந்து ஏக்கப்பெருமூச்சு ஒன்று வெளிப்படுகிறது.

‘மியாமில தான் வெடிங்காம்…

போறத்துக்கு இப்பவே அபாயாக்கு நல்ல ஷோல் ஒண்டு வாங்கோணும்’

இது ரிஷாதா.

‘அதில்லடீ கிப்ட் என்னடி குடுக்குற….மாஹிராட ஸ்டேடஸுக்கு மாதிரி கோல்ட்ல என்ன சரி வாங்கோணும்.’ ஹமீதாவின் முகத்தில் சிந்தனைக்கோடுகள்.

‘இல்லாட்டி…

ஜாதியா ஈக்கும்.ரெண்டு பேரும் வேற வேறயா வாங்குவொம்…இல்லாட்டி சரில்லடீ’ இது ரிஷாதா.

‘அது சரி அடுத்த கெழம பர்வீண்ட கலியாணம் அதுக்கு என்னடி குடுக்கிற?’

ஹமீதா முடிக்க முன்னரே…

‘ஐய்யோடி ..அது ஊட்டுல நிகாஹ் தானே.ரெண்டு பேரும் சேர்ந்து என்னமாவது சின்னதா பிரஸன் ட் பண்ணா சரிதானே’ரிஷாதா சுலபாக விடயத்துக்கு முற்றுப்புள்ளி வைக்கிறாள்.

சம்பவம் 05

நெய்ச்சோறு,கோழிக்குருமா, மாட்டிறைச்சிப்பொறியல்,மாசிசம்பல் ,வெஜிடபள் சாலட் என படு அமர்க்களமாய் மேசை அலங்கரிக்கப்பட்டிருக்கிறது.

நாலு ஊருக்கு மணக்கும் அளவுக்கு பார்த்து பார்த்து சமைக்கப்பட்ட விருந்து.

டுபாயிலிருந்து விடுமுறைக்காக வந்திருக்கும் மகனையும் மருமகளையும் விழுந்து விழுந்து உபசரித்துக்கொண்டிருக்கிறாள் நஸீஹா.

‘உம்மா….

உம்ம்மாஆஆ…

‘மகள் அந்த வட்லாப்பக் கப்ப நானாக்கு எடுத்து குடுங்கோ

முன்னுக்கு யாரோ பேசிற சத்தம் கேட்ட…நான் பார்த்திட்டு வாரென்’

வெளிநாட்டு சாரி சரசரக்க சுலைஹா ஹோலுக்கு வருகிறாள்.

‘திண்டு ரெண்டு நாளும்மா…எனக்கில்லட்டீம் பரவல்லும்மா…இந்தப் புள்ள ரெண்டுக்குமாவது கொஞ்சம் சாப்பாடு தாங்க சீதேவி’

நடுத்தர வயது பெண் தலையில் முக்காட்டை இழுத்து விட்டுக்கொள்கிறாள்.கூடவே ஒட்டி உலர்ந்த தேகத்துடன் நண்டும் சிண்டுமாக இரண்டு பிஞ்சுகள்.

‘இதுகளால பெரிய கரச்சல்…சரியா சாப்பாட்டு நேரத்துக்கு வார…’புறு புறுத்துக் கொண்டே போன சுலைஹா ப்ரிஜில் நேற்று மிஞ்சியிருந்த பழைய சோற்றை ஒரு சொப்பிங் பேக் உள்ளே கொட்டினாள்.

……………………………………………………………………………………………..

ஒரு பானைச்சோற்றுக்கு ஒரு சோறு பதம் என்பார்கள்.

கண்ணீர் விட்டாலும் கவலைப்பட்டாலும் பண்பாட்டு விழுமியங்களைச் சுமந்து பிறந்த எமது முஸ்லிம் சமுதாயத்தின் இன்றைய நிலை இது தான்.

விரும்பியோ வெறுத்தோ,அஃலாக் எனும் நற்பண்பாடுகளுக்கு சாட்சியாக விளங்க வேண்டிய நாம் இன்று அதன் எதிர்மறை உதாரணமாகிப் போன அவலம் நேர்ந்திருக்கிறது.

இஸ்லாத்தின் இனிய தூது முஸ்லிம்கள் மாத்திரம் முதுசமாகப்பெற்ற தனிச்சொத்தல்ல.

அது முழு மனித சமுதாயத்துக்குமான வழி காட்டும் ஒளிவிளக்கு.

இஸ்லாத்தின் நோக்கத்தை சில அறிஞர்கள் இரண்டாக வகுக்கின்றனர்.

01.மனித உள்ளத்துக்கு ஆறுதலும் அமைதியும் அளிப்பது.

02.வாழும் பூமியை சாந்தியும் சுபீட்சமுமானதாக மாற்றுவது

இஸ்லாமிய ஆட்சி பற்றியதான கனவுகள் முதல் முதல் விதையாய் ஊன்றப்பட வேண்டியிருப்பது பண்படுத்தப்பட்ட உள்ளங்களில் தான்.எனவே தான் தொழுகை முதற்கொண்டு ஹஜ் வரையிலான இபாதாக்களின் எதிர்பார்க்கை பண்பட்ட இதயங்களாக அமைந்திருக்கின்றது.

இலங்கையில் முஸ்லிம்களின் வரலாறு பண்பாட்டின் அடித்தளத்தில் எழுந்ததொன்றாகும்.ஒரு காலத்தில் தியாகமும் ,விட்டுக் கொடுப்பும் நம்பிக்கை,நாணயமும் எமது அடிமரத்தின் வேர்களாக இருந்திருக்கின்றன.

இன்றோ முஸ்லிம் என்றாலே ஏமாற்றும் பொய் புரட்டும் ,ஆடம்பர வாழ்க்கை முறையும் நாகரீகமில்லாத நடத்தையும் என்றாகிப் போன சோகம் நெஞ்சு சுடுகிறது.

முஸ்லிம்கள் பல்லின சமூகங்களின் மத்தியில் வாழும் போது ஒரு சாரார் தனித்துவம் பேண அந்திய சமூகங்களிருந்து ஒதுங்கி ஓரமாய்ப் போய் புறக்கணிப்புக்காளாவதும் இன்னொரு சாரார் ஏனைய சமூகங்களோடு ஒன்றி வாழ்தலில் தம் தனித்துவ அடையாளங்களையே தொலைத்து விட்டுத் தவிப்பதுமான இரண்டு நிலைமைகளை எதிர்நோக்குவதைக் காணலாம்.

கொள்கையை விலை பேசாத திடவுறுதியும் இஸ்லாமிய நடைமுறைகளில் அசையாத நம்பிக்கையும் கொண்ட அதே நேரம் ஏனைய சமூகங்களோடு நல்லெண்ணத்துடனும் மனிதாபிமானத்துடனும் நடந்து கொள்ளக்கூடிய தனிமனிதர்களே எமது பிரகாசமான நாளையின் சிற்பிகள்.

இஸ்லாம் அன்பை பற்றி அதிகம் பேசுகிறது.

படைத்தாளும் இறைவன்,வழிகாட்டிய இறைதூதர்,பெற்ற தாய் தந்தையர்,உயிரில் தாங்கி வளர்க்கும் வாரிசுகள்,இணைந்து வாழும் துணைவர்கள்,நெருங்கிய உறவுகள்,நேசம் பாராட்டும் நட்புக்கள் ,வாய்பேசா உயிரினங்கள்…

அனைத்தின் மீதும் நிபந்தனையற்ற அன்பு வைக்குமாறு இஸ்லாம் எங்களை ஆற்றுப்படுத்துகிறது.

வாழ்க்கையின் ஒவ்வொரு மணித்துளியிலும் மனிதாபிமானத்தினையும் நற்பண்பாடுகளையும் போஷித்து வளர்க்கிறது.

நேரத்தை பேணல் என்பது முஸ்லிம்கள் தவற விட்டுச் சென்ற ஒரு புதையல்.

தன்னம்பிக்கையும் தன் காலில் நிற்கும் வலிமையும் எத்தனை சவால்களையும் எதிர்த்து நிற்கும் துணிவும் நிலைகுலையாமையும் எம் முதுகெலும்பாய் இருந்திருக்க வேண்டியவை.

ஆடம்பரமும் படாடோபமும் பெருமையும் இலங்கை முஸ்லிம்களின் நிலாக்கால இரவுகளாக இருந்த காலம் போய் இப்போது அன்றாட வாழ்க்கையாகி விட்டிருக்கிறது.

ஒரு நாள் திருமணத்துக்காகவும் இரண்டு பெருநாட்களுக்காகவும் இறைக்கப்படும் பணத்தில் ஒரு குட்டி விமானமே வாங்கி விடலாம்.

வீடுகளைக் கட்டுவதில் காட்டும் நேர்த்தியையும் அவதானத்தையும் நாம் குணநலன்களை, பண்பாடுகளை கட்டியெழுப்புவதில் காட்டுவதில்லை என்பதே கசப்பாயினும் உண்மை.

‘முஸ்லிம் சமூகத்தை நம்ப முடியாது.அவர்கள் வியாபாரத்தில் மோசடி செய்வார்கள்.ஏமாற்றுவார்கள்’ என்றெல்லாம் முஸ்லிம்களின் செயற்பாடுகள் மீது கருப்பு முத்திரை குத்தப்பட்டுள்ளது.நெருப்பில்லாமல் புகைவதில்லை என்பது நமக்குத் தெரிந்த விடயம்.

மேலதிகமாக ஆங்கிலம் சார் சூழல்களிலும் பல்கலைக்கழகங்கள் ,வேலைத்தளங்களிலும் ‘நான் ஒரு முஸ்லிம்’என்ற தனித்துவத்தைக் காட்டிக் கொள்ள வெட்கப்படுபவர்களும் ,அதை விட ஒரு படி மேலே போய் தொழுகையையும் ,தலை மறைக்கும் ஹிஜாபையும் கூட துறந்தவர்களும் நம்மிடையே இல்லாமலில்லை.

சூழலைப் பாதுகாப்பது எப்படிப் போனாலும் அதனை மாசுபடுத்துவதில் முன்னிற்கிறது முஸ்லிம் சமுதாயம்.ஆற்றங்கரைகளின் ஓரத்தில் குவிந்திருக்கும் குப்பைகூளங்களுக்கும் ,சுற்றாடலைப் பாதிக்கும் தொழிற்சாலைக் கழிவுகளுக்குமாக நாளை மறுமையில் நாம் என்ன பதில் சொல்லப்போகிறோம்?

மொத்தத்தில் இஸ்லாம் வலியுறுத்தும் தனிமனிதப்பண்பாடுகளை மட்டுமல்லாது ,

சமூகப்பண்பாடுகளையும் ஒழுக்க விழுமியங்களையும், சில அழுகல் கனிகளுக்கு ஆசைப்பட்டு குறைந்த விலைக்கு விற்று விட்டோமா என்று எண்ணத் தோன்றுகிறது.

கண்ணுக்குப்புலப்படாதிருக்கும்

நெருப்பை

உன் புழுதியிலிருந்து

பெற்றுக்கொள்!

பிறரின் வெளிச்சம் நீ வைத்திருக்கத் தகுதியற்றது

அல்லாமா இக்பால்

இளைய தலைமுறை எதிர்நோக்கும் பிரச்சினைகளும் தீர்வுகளும்!

2011-05-03T23:15:00.000-07:00

சத்தியமார்க்கம்.காம் என்ற இணைய தளம் 2007இல் நடத்திய சர்வதேச ரீதியான கட்டுரைப் போட்டியில் சகோதரியர்களுக்கான பிரிவில் முதற்பரிசை வென்ற கட்டுரை.

ஒரு நாட்டின் சக்தியும் உறுதியும் அந்நாட்டின் எழுச்சி மிக்க இளைய தலைமுறையாகும். அநீதிகளுக்கெதிராய்த் துடித்தெழும் இரத்ததின் மறுபெயர்தான் இளமை.
இனிமையும் கனவுகளும் கொண்ட இளமைப்பருவம் வாழ்க்கைப் புத்தகத்தின் வித்தியாசமான ஒரு பக்கம். எதிர்காலத்தை எழுதும் பேனாக்கள்தான் இளைஞர்கள் என்று கூறினால் மிகையாகாது.

"உன்னை ஐந்து நிகழ்வுகள் அடையுமுன் ஐந்து அருட்கொடைகளை சிறப்பாகப் பயன்படுத்திக்கொள்!
1.மரணம் வருமுன் வாழ்க்கை
2.நோய் வருமுன் உடல் ஆரோக்கியம்
3.வேலைப்பளு வருமுன் ஓய்வு
4.முதுமை வருமுன் இளமை
5.வறுமை வருமுன் செல்வ நிலை
என நபி(ஸல்) அவர்கள் கூறினார்கள்.

உலக வரலாற்றில் உணர்ச்சிகளின் இருப்பிடமான இளையதலைமுறையின் பங்களிப்பு இன்றி எந்தவொரு சமூக மாற்றமோ, எழுச்சியோ, ஆயுதப்புரட்சியோ ஏற்பட்டதில்லை. நெறிப்படுத்தப்பட வேண்டிய ஒரு சக்திப்பிரவாகம் இளமையாகும்.
சிறு குழந்தையாகவும் இல்லாது வளர்ந்து முழுமையடைந்த மனிதனாகவும் இல்லாது துப்பவும் முடியாது மெல்லவும் முடியாது தவிக்கும் இளமைப் பருவம் சிக்கல்களினதும் பிரச்சினைகளினதும் முகவரியாகிப்போகும் நிலமை அதிசயப் படத்தக்கதல்ல.
இளைஞர்கள் இன்று எதிர் நோக்கும் முக்கியப் பிரச்சினைகளில் ஒன்று தொடர்பூடகங்களாகும். உலகத்தையே உள்ளங்கைக்குள் சுருட்டி வைக்கும் ஊடகங்களின் அபரிமிதமான வளர்ச்சி ஆக்கத்தை விட அழிவுக்கே துணைபோயுள்ள அவலத்தை நினைக்கும்போது நெஞ்சு சுடுகிறது.
மனித மனத்தின் கீழான உணர்வுகளைத் தூண்டி அதில் குளிர்காயும் சமகால ஊடகக்கலாச்சாரம், இளைஞர்களின் இரத்தத்தில் ஊறிப்போயுள்ளது. அறிவையும் அன்பையும் மனிதப் பண்பாடுகளையும் வளர்க்க வேண்டிய மீடியா, பொருளாதாரம் ஒன்றையே பிரதான நோக்காகக் கொண்டு, தீமைகளின் அடி வேராகத் திகழ்கிறது.
தொலைக்காட்சி, சினிமா, வானொலி, மாத-வாராந்த-நாள் இதழ்கள், இணையம் இவையனைத்தும் இளைய சமுதாயத்தின் உள்ளத்தில் பெரும் செல்வாக்குச் செலுத்துகின்றன. இணைய வலைப்பின்னலின் கோடானுகோடி நன்மைகளை மறுதலித்து விட்டு அதன் தீமைகளை அரவணைத்துக் கொள்வதிலேயே இளைய சமூகம் ஆர்வம் காட்டுகிறது.
"உலகிலுள்ள மொத்த இணைய தளங்களில் 30% ஆபாசம் (Pornography) தொடர்பான தளங்களாகும். இந்நடவடிக்கை மூலம் 12,13 பில்லியன் அமெரிக்க டாலர்கள் வருடாந்தம் வருமானமாகப் பெறப்படுகிறது."
(நன்றி: Muslim youth)
துரதிஷ்டவசமாக, "பெரும் எண்ணிக்கையிலான முஸ்லிம் இளைஞர்கள் இணையத்தினூடாகவும் - GPRS ஊடாகவும் இத்தகைய தளங்களைப் பார்வையிடுகின்றனர்" என்று ஆய்வுகள் கூறுகின்றன.
"நிலங்கள் ஆக்கிரமிக்கப் படுவதை விட மூளைகளும் உணர்வுகளும் ஆக்கிரமிக்கப் படுவது, மிகப்பயங்கரமான விளைவுகளை இஸ்லாமிய உம்மத்திடையே ஏற்படுத்தியுள்ளது" என்று டாக்டர் யூஸூப் அல் கர்ளாவி கூறுகிறார்.
நவீன நாகரீகத்தின் மூளைச்சலவைக்கு உட்படுவதிலும் முதலிடம் இளைஞர்களுக்கே.
அடுத்தவர்களின், குறிப்பாக எதிர்ப்பாலினரின் கவன ஈர்ப்புக்கருதி உடை-சிகையலங்காரம் முதற்கொண்டு கொள்கை கோட்பாடுகள் வரை மேற்குக் கலாச்சாரத்தைத் தெய்வமாக வழிபடும் நவீன ஜாஹிலிய்யத் சிந்தனை இளைய உள்ளங்களில் வேர்பிடித்து வளர்ந்து விட்டிருக்கிறது.
மனதளவில் தனிமையை உணரும் இளைஞர்கள் சமூகம் தமது சென்ற தலைமுறைக்கும் தமக்கும் இடையே பாரிய இடைவெளியை உணர்கிறது. அன்புக்காக ஏங்கும் பருவம் என்பதால் நட்பும் காதலும் உள்ளத்தின் இரட்டையாட்சி செய்கின்றன.
இவை சரியான முறையில் நெறிப் படுத்தப் படாதபோது பாரிய உளரீதியான சவால்களுக்கு முகம் கொடுக்க வேண்டிய நிர்ப்பந்தம் நேரிடுகிறது. மது, போதைப்பொருள், விபச்சாரம், தன்னினச் சேர்க்கை போன்ற தீமைகள் இளைஞர்கள் சமுதாயம் எதிர் நோக்கும் பிரச்சினைகளின் பன்முக வடிவங்களாகும்.
இளமையின் தேவைகள் சரியான முறையில் நிறைவு செய்யப்படாத போதும் குடும்பச்சூழல், அன்பான அரவணைப்பு, இதமான கவனிப்பு கிடைக்கப்பெறாத போதும் இளைஞர்களின் மனம் சமுதாய வேரினையே செல்லரித்து விடும் தீமைகளை நோக்கி ஈர்க்கப்படுகிறது. இது மட்டுமல்ல, ஆக்கத்துக்குத் துணை போக வேண்டிய இளமை சமூகவிரோதச் செயல்களுக்கு ஆயுதமாகப் பயன்படுகிறது.
நாள்தோறும் நம் செவிகளுக்கு வரும் கொலை, கொள்ளை, வன்புணர்ச்சிச் சம்பவங்களில் இளைய சமுதாயத்தின் கையே மேலோங்கி நிற்கிறது. இளையசமுதாயம் எதிர்நோக்கும் முக்கியப் பிரச்சினைகளில் மற்றொன்று நவீனக் கல்வித் திட்டத்தின் அபாயகரமான முகமாகும்.
ஆளுமையையும் பண்பாடுகளையும் வளர்க்க வேண்டிய கல்வித் திட்டம் இன்று வெறும் தகவல் திணிப்பு பொம்மைகளை உருவாக்கி விட்டிருக்கிறது. கல்வியின் நோக்கம் ஒழுக்கமும் ஆளுமையும் திறனும் கொண்ட தனிமனிதனை உருவாக்குவதாகும். வாழ்க்கை நதியின் போக்கை - நெளிவு சுழிவைக் கற்றுக்கொடுக்க வேண்டிய நவீனக் கல்விக் கோட்பாடு இன்று பொருளாதாரம் ஒன்றையே பிரதான இலக்காகக் கொண்டிருப்பது பெருமூச்சுக்குரிய விடயமாகும்.
எந்த விதமான நோக்கமும் இலக்கும் குறிக்கோளும் உயர்ந்த இலட்சியமும் இன்றி ஆழ்கடலில் தத்தளிக்கும் ஓடங்களாய் இளைஞர்களை செதுக்கி விட்டிருக்கும் நவீனக் கல்வி முறை ஒரு பாரிய சவாலாகும்.
நமது இளைய தலைமுறை எதிர் நோக்கும் மற்றுமொரு சிக்கல் வாய்ந்த பிரச்சினை 'மதச்சார்பின்மை' என்ற சிந்தனாரீதியான சதியாகும். அறிவியல் தொழில் நுட்பத்தின் அசுரவளர்ச்சியில் மத நம்பிக்கையின் செல்வாக்கு மறைந்து, பகுத்தறிவு என்ற பெயரில் இறைமறுப்புக்கு மாத்திரம் முதலிடம் வழங்கப்படும் இந்த நிலை ஆரோக்கியமற்றது.
உலகத்தின் பிரச்சினைகளுக்கெல்லாம் தீர்வாக மதச்சார்பின்மை எனும் Secularism முன்வைக்கப்படுகிறது. பண்பாட்டு, கலாசார ஒழுக்க விழுமியங்களை உடைத்தெறிகின்ற இந்தச் சடவாத சிந்தனை இளைஞர் சமூகத்தை ஆட்டிப் படைக்கிறது. சிற்றின்ப ஆசைகளை வளர்த்து, மனித மனங்களில் கொடூரத்தையும் காழ்ப்புணர்வையும் வளர்க்கும் இச்சிந்தனையின் தாக்குதலில் நிலைகுலைந்து நிற்கும் இளைஞர் சமூகத்தின் போக்கு கண்களில் நீரை வரவழைக்கிறது.
இந்த விழிநீர்த் துளிகள் காய்வது எப்போது?
ஆம், இளைய சமுதாயத்தின் ஒட்டு மொத்தப் பிரச்சினைகளுக்குமான தீர்வு இனிய இஸ்லாத்தின் தூதை மீண்டும் இந்தப் பூமியிலும் இளைய இதயங்களிலும் நிலைநாட்டுவதாகும். அல்லாஹுத்த ஆலா இந்த மார்க்கத்தைப் பூரணமாக்கி வைத்தான். அனைத்துப் பிரச்சினைகளுக்கும் கால, தேச, வர்த்தமான சூழ்நிலைகளுக்கும் நெகிழ்வுடையதாக இஸ்லாத்தை ஆக்கினான்.
பள்ளிவாசலிலும் நோன்புக் காலங்களிலும் அவ்றாதுகளிலும் மட்டும் சிறைப்பட்டிருக்கும் இஸ்லாம், பாராளுமன்றத்தின் கதவுகளையும் தட்டக் கூடியதாய் வீறுகொண்டெழ வேண்டும். ஆன்மீக வறுமையில் உழலும் நம் இளைய சமுதாயத்தின் இதயத்தில் அல்லாஹ்வைப் பற்றிய ஆழமான நம்பிக்கையை ஏற்படுத்தும் கல்வித் திட்டங்கள் நடைமுறைக்கு வருவதற்கு முயற்சிகள் முன்னெடுக்கப்பட வேண்டும்.
ஐரோப்பிய வானத்தில் அறிவியலை வாழ வைத்த பரம்பரை நம்முடையது. கொள்கையை நெஞ்சில் ஏந்தி வாழும் தனிமனிதர்களாக அறிவின் பெறுமதியை, நேரத்தின் முக்கியத்துவத்தைச் சுமந்த இலட்சியவாதிகளாக நமது இளைஞர்களைப் பயிற்றுவிப்பது பயனுள்ள முயற்சியாகும். அன்பின் ஆளுகைக்குள் அடங்க வைக்கும் திருமணத்தை உரிய காலத்தில் ஊக்குவிப்பதும் தீமையின் சுவடுகளை அடிவேரிலேயே கிள்ளி எறிய உதவும்.

அனைத்துக்கும் மேலாக எமது இறுதி இலக்கான சுவனத்தின் இனிய வசந்தத்தையும் அல்லாஹ்வின் திருப்தியையும் ஆசிக்கும் உள்ளங்களாக நம் இளைய சமுதாயம் வார்க்கப்பட வேண்டும்.
அல்லாஹ் அருள வேண்டும்!
ஆக்கம்:சமீலா யூசுப் அலி

ஒரே நாளில் விசேட செய்தியான ரிப்கா

2011-04-24T11:45:00.000-07:00

சமீலா யூசுப் அலி

ரிப்கா பாரி

நேற்று அமெரிக்காவின் ஒரு மூலையில் குறிப்பிடத்தக்க எந்த விதமான முக்கியத்துவமும் இல்லாத நிலையில் வாழ்ந்திருந்த ஒரு இளம்பெண்.

ஒரே நாளில் சர்வதேச ஊடகங்களில் விசேட செய்தியாக அல்லது தலைப்புச்செய்தியாக பேசப்படும் அளவுக்கு என்ன சாதித்திருப்பார்?

ரிப்கா,

ஒரே நாளில் விற்றுத்தீர்க்கப்பட்ட புத்தகமொன்றினை எழுதினாரா?

இமயமலைச்சிகரத்தை குறைந்த நேரத்தில் ஏறி முடித்தாரா?

விஞ்ஞான உலகமே மூக்கில் விரல் வைக்கும் கண்டு பிடிப்பொன்றின் சொந்தக்காரியா?

இல்லை

உலகத்திலேயே அதிக வருமானம் பெறும் தொழில் வல்லமை வாய்ந்த பெண்ணா?

காண்போரையெல்லாம் அதிசயிக்கச் செய்யும் அற்புதம் ஏதாவது அவரது கைவரப்பெற்றிருக்கிறதா?

இல்லை.இல்லை

இவையெதுவுமே இல்லை.

ரிப்கா பாரி என்ற 17 வயதுப்பெண் இஸ்லாத்தை விட்டு விட்டு கிரிஸ்தவத்தைத் தழுவிக்கொண்டார்.மட்டுமல்லாது ஒஹையோவிலுள்ள தன் வீட்டை விட்டு வெளியேறி ப்ளோரிடாவில் உள்ள கிரிஸ்துவ மதபோதகர் ஒருவரது வீட்டில் அடைக்கலம் புகுந்துள்ளார்.தன் தந்தை தன்னைக்கொலைசெய்து விடுவார் என அஞ்சுவதாகவும் இலங்கைக்கு அனுப்பினால் அங்கு தன்னை புனிதக்கொலை செய்து விடுவார்கள் என்றும் நடுங்கிய குரலில் ரிப்கா ஊடகவியலாளர்களிடம் கூறும் காணொளிப்படங்களை தொலைகாட்சி மற்றும் இணையப்பெருவெளியில் தாராளமாகக்காணலாம்.

ரிப்கா பாரி இலங்கையில் காலி நகரைச்சேர்ந்தவர்.தந்தை ஒரு இரத்தினக்கல் வர்த்தகர்.தாய் வீட்டில் திருமண ஆடைகள் தயாரிப்பவர்.15 வருடங்களாக அமெரிக்காவில் வேரூன்றி இருக்கும் இந்தக்குடும்பம் மீடியாவின் வெளிச்சத்துக்கு வந்திருக்கிறது.

ரிப்கா பொய் கூறுகிறார்.

ரிப்கா மூளைச்சலவைக்குள்ளாகி உள்ளார்.

ரிப்கா சர்வதேச கிரிஸ்தவ மதப்பிரச்சார வலைப்பின்னல் ஒன்றுக்குள் மாட்டிக்கொண்டுள்ளார்.

ரிப்காவை அடிப்படைவாதிகள் கொலை செய்ய முயற்சிக்கிறார்கள்

ரிப்கா அடக்குமுறைக்குள்ளாகும் முஸ்லிம் பெண்கள் வெடித்து வெளிவருவதன் வெளிப்பாடு..

இவ்வாறானதும் இதற்கதிகமானதுமான கருத்துக்களை ஊடகங்கள் வெளியிட்டன.வெளியிட்டு வருகின்றன.

முஸ்லிம் சமூகமும் துள்ளி எழுந்திருக்கிறது.எமது சமூகத்தின் நீண்ட தூக்கம் கலைக்க இவ்வாறான அதிர்ச்சி சம்பவங்கள் இடைக்கிடை நடைபெற்றாக வேண்டும்.

சரி ரிப்கா பாரியை ஒரு புறத்தில் வைப்போம்.இந்த சம்பவம் பற்றி பேசும் போது மூன்று விடயங்களை நாம் சிந்திக்காமலிருக்க முடியாது.

1.ஊடகங்களின் நடுநிலையற்ற போக்கும் முஸ்லிம்களின் ஊடகத்துறையும்

2.தஃவாவில் நவீன உத்திகளின் தேவை

3.மேற்கில் வாழும் முஸ்லிம் இளைய சமுதாயத்தின் நிலை

மேற்கத்திய ஊடகங்களில் ஒரு சிலவற்றை விடுத்து அனேகமானவை பக்கச்சார்பானவையாகவே இருக்கின்றன.இஸ்லாம் பற்றிய தவறான புரிதல்களே இவற்றில் அதிகமானவற்றின் அடிப்படையாக இருக்கின்றன.உலக ஒழுங்கைப் பொறுத்தவரையில் சக்தி அல்லது வல்லமையை அடைந்து கொள்வதே நாடுகளின் பிரதான நோக்கமாகி விட்டிருக்கிறது.அது ஆயுதம்,இயற்கை வளம்,அதிகாரம்,பணம்,தொழிநுட்பம் அல்லது கட்டுக்கோப்பான மனிதவளம் என எதுவாகவும் இருக்கலாம்.

இறைவனை முன்னிறுத்தி செயற்படும் சில நாடுகளும் இஸ்லாமிய இயக்கங்களும்,கொள்கைவாதிகளும்,ஆதிக்கசக்திகளுக்கும் அவற்றின் சுரண்டல்களுக்கும் அடிபணிய மறுப்பதன் காரணத்தால் அவை அல்லது அவர்கள் நாடுகளுக்கிடையிலான பலப்பரீட்சையில் பயங்கரவாதிகள் அல்லது அடிப்படைவாதிகளாக இனங்காட்டப்படுகின்றன;இனங்காட்டப்படுகின்றனர்.

மறுபுறத்தில் ஒரு சமூகத்தின் அல்லது நாட்டின் சிந்தனைப்போக்கையே மாற்றியமைக்கும் அளவிற்கு சக்திவாய்ந்தது மீடியா.ஒரு மான்குட்டியை சிங்கம் என நிறுவவும் ,ஒரு தக்காளிப்பழத்தை ஆப்பிள் என்று நம்ப வைக்கவும் ஊடகங்களால் முடியும்.குறிப்பாக மேற்கின் மீடியாக்கள் இந்த விடயத்தில் நம்பமுடியாத அளவு ஆக்கத்திறன் கொண்டவை.

மீடியாத்துறையைப்பொறுத்தளாவில் முஸ்லிம்களின் பிரவேசம் அபூர்வமாகவே நிகழ்கிறது.அதிலும் ஆக்கத்திறனும் அர்ப்பணிப்பும் கொண்ட ஊடகவியலாளகளை விரல் விட்டு எண்ணி விடலாம்.

ரிப்கா பாரி- இந்த தனியான சம்பவமும்,அதற்கு ஊடகங்கள் கொடுத்த கயிறு திரிப்புக்களும் நமக்கு உணர்த்தி நிற்கும் விடயங்களில் நமக்கான ஊடகத்தின் தேவையும் ஏனைய ஊடகங்களில் எமது திறமையான பங்களிப்பின் அத்தியாவசியமும் ஆழமான சிந்தனைக்குரியவை.இங்கு பெண்ணின் குரலின் அவ்ரத்தா இல்லையா போன்ற அடிப்படையான விவாதிப்புக்களை விடுத்து,சமூகத்தின் இரு பாதிகளினதும் பங்குபற்றல் முக்கியமானது என்பதை நாம் விளங்கிக்கொள்ள வேண்டும்.

அடுத்ததாக எமது தஃவாமுறைமையில் வர வேண்டிய ஆக்கபூர்வமான மாற்றங்கள் மற்றும் புதிய உத்திகள் பற்றியதான பரவலான கவனயீர்ப்பு அத்தியாவசியப்படுகிறது.

இன்றைய எமது சமூகத்தில் தஃவா சிலபோதுகளில் மிகக்கடூரமாகவும் கவர்ச்சியற்ற விதத்திலும் முன்வைக்கப்படுகிறது.

அல்லாஹ்வின் அன்பை விட தண்டனைகளே கோடிட்டுக்காட்டப்படுகின்றன.இஸ்லாத்தைப்பொறுத்தவரை ஹராமான விடயங்கள் மிகச்சிறிய பகுதியாகும்.அவை இன்னவை தான் என தெளிவாக அல்குர் ஆனிலும் சுன்னாவிலும் வரையறுக்கப்பட்டுள்ளன..அவை தவிர்ந்த மற்ற அனைத்துமே ஹலால்;ஆகுமானவை.ஆனால் இன்றைய எமது தஃவா பாவங்களுக்கான தண்டனையையும் நரக வேதனையையும் சொல்லி மக்களது மனங்களை அச்சமூட்டும் அளவிற்கு இறைவனின் அதீதமான அன்பையோ அல்லது இஸ்லாத்தின் நெகிழ்வுத்தன்மையையோ சொல்லி ஆர்வமூட்டுவதில்லை.இஸ்லாம் இயற்கையாகவே மனிதன் இலகுவாகப்பின்பற்றக்கூடிய மார்க்கம்.இஸ்லாத்தில் உள்ளங்களைக்கவரக்கூடிய ஏராளமான விடயங்கள் உள்ளன.இதனை தாஈக்களான நாம் எவ்வாறு எந்தவிதமான வழிகளில் சமூகத்துக்குக் கொண்டு செல்கிறோம் என்பதே மில்லியன் டொலர் கேள்வி.

கிரிஸ்தவ மார்க்கத்தைப்பொறுத்தவரை அன்பையும் ஆதரவையும் அடிப்படையாகக் கொண்டு மக்களை எப்படி கவர்ந்திழுப்பது என்பது பற்றியான ஏராளமான அறிவூட்டல்களும் பயிற்சிநெறிகளும் போதகர்களுக்கு வழங்கப்படுகின்றன.இனிமையான பேச்சும் நம்பிக்கையூட்டும் தெம்பும் அதிநவீன உத்திகளும் கிரிஸ்தவ பிரச்சாரகர்களின் சிறப்பம்சங்களாகும்.

நம்மத்தியில் இஸ்லாத்தின் தூதைக்கொண்டு செல்வதில் இன்னும் அழகான வழிகள்,ஆக்கபூர்வமான முறைகள் கையாளப்படுவதிலுள்ள சாத்தியங்கள் பற்றி திறந்தமனதுடன் ஆராய்ந்தறிவதற்கு இந்த சம்பவம் அடிகோலியிருக்கிறது.

இங்கு இன்னும் ஆழமாக உற்றுநோக்க வேண்டியிருக்கும் அடுத்த விடயம் ‘மேற்கில் வாழும் எமது இளைய சமுதாயத்தின் நிலை’ஆகும்.

உலகின் எந்தப்பிரதேசமும் இறைவனின் ஆட்சிப்பிரதேசமே.

முஸ்லிம் சமூகம் ஒரு தேசியத்துக்கோ அல்லது ஒரு எல்லைக்கோட்டுக்கோ சொந்தமானது அல்ல.பூமியின் எல்லா இடங்களுக்கும் பரந்து சென்று அல்லாஹ்வின் அற்புதங்களைக்கண்டு வருமாறு இஸ்லாம் எங்களுக்கு கூறுகிறது.

எனினும் இன்று எமது சமூகம் ‘வெளிநாட்டு வாழ்க்கை’என்ற மூளைச்சலவைக்குள்ளாகி இருக்கிறது.

குறிப்பாக அமெரிக்கா,ஐரோப்பிய நாடுகளில் வாழ்பவர்களைப்பற்றி ஓர் உயர்வான அபிப்பிராயம் நிலவுகிறது.இதன் தீவிரம் எந்தளவுக்குச்செல்கிறது என்றால் மகளுக்கு மாப்பிள்ளை தேடும் பெற்றோர், மேற்குநாட்டு பிரஜாவுரிமை பெற்ற மாப்பிள்ளை என்றால் வேறெதனையுமே யோசிப்பத்தில்லை;திருமணம் முடித்துக் கொடுத்து விடுகின்றனர்.இதற்காக மேற்கத்திய நாடுகளில் இருக்கும் முஸ்லிம்கள் சடவாதிகள் என்று ஒட்டுமொத்தமாகக் கூறுவதற்கில்லை.மேற்கிலிருந்து தான் இஸ்லாமியச்சூரியன் மீண்டும் அதன் பூரணவடிவத்துடனும் பிரகாசத்துடனும் உதயமாகிறது என்ற உண்மை எதிர்காலம் பற்றிய நம்பிக்கையை விதைக்கிறது.

மேற்கத்திய நாடுகளில் வாழும் எமது இளைய சமுதாயத்தின் நிலை என்ன என்பதை அறிந்து கொள்வதற்கு அசாத்தியமான தேடல்கள் எதுவும் தேவையில்லை.

இணைய வீதியில் ஒரு பதினைந்து நிமிட உலா போதும்.

மேற்கத்திய சடவாத சிந்தனையின் ஆக்கிரமிப்புக்காளாகியிருக்கும் எமது இளைஞர்களின் வாழ்க்கைமுறைக்கும் வேற்று மத இளைஞர்களின் வாழ்க்கைக்கும் எவ்வித வித்தியாசமும் இல்லை.

ரிப்கா பாரி பகிரங்கமாக கிரிஸ்த்தவ மார்க்கத்தைத் தழுவிகொண்டார்.

ஆனால் எத்தனை ரிப்கா பாரிக்கள் உள்ளத்தில் கிரிஸ்தவத்தை ஏற்றுக்கொண்டு வெளியில் முஸ்லிம் அடையாளங்களுடன் வலம் வருகிறார்கள் என்பது எமக்குத் தெரியாது.

எத்தனை பேருடைய உள்ளத்தில் மேற்குக்கலாச்சாரம் தெய்வமாய் வேரூன்றி இருக்கிறது என்பதை நாம் அறிவதில்லை.

பக்குவமாய் பண்பாடாய் இருக்க வேண்டிய எமது இளம் பெண்களில் எத்தனை பேர் ஹிஜாபைத் தூக்கி எறிந்து விட்டு அரை குறை ஆடைகளுடன் திரிகின்றனர் என்பது எமது கவனத்துக்கு வருவதில்லை.

ரிப்கா பாரி வெள்ளியிலான சிலுவை ஒன்றை கழுத்து மாலையில் தொங்க விட்டிருந்தார்.

அதைப்பற்றி நாம் ஆச்சரியத்துடன் புருவத்தை உயர்த்துகிறோம்.

முஸ்லிம் இளைஞர்கள் தங்கள் உள்ளத்தில் சுமந்திருக்கும் தொட்டுணர முடியாத சிலுவைகளைப்பற்றி எத்தனை சதவீதம் நாம் சிந்திக்கிறோம்?

இங்கு ஒட்டு மொத்தமாக இளைஞர்களை மட்டும் சுட்டுவிரல் நீட்டிக்குற்றம் சாட்டிவிட முடியாது.

இஸ்லாமியக்கலாச்சாரத்தையே மறக்கடிக்கச் செய்து கல்வி,தொழில்,திருமணம் என்று எதையாவது காரணமாக வைத்து

பிள்ளைகளை நவீன சடவாதத்துக்குத் தாரைவார்த்துள்ள பெற்றோர்கள் இறைவனின் நீதிமன்றத்தில் விசாரணைக்குரியவர்கள்.

மேற்கத்திய நாடுகளில் மட்டுமல்லாது எமது தேசத்திலும் கூட சடவாதசிந்தனையில் தோய்த்தெடுத்த முஸ்லிம் பெற்றோர் இல்லாமலில்லை.வேறெதுவும் தேவையில்லை தன் பிள்ளை டொக்டர் ஆக வேண்டும் அல்லது பொறியியலாளராக வேண்டும் என்பதற்காய் எந்த நாட்டுக்குக்காவது போய் எதை இழந்தாவது படி என்ற மனோநிலையில் உள்ள தாய்,தந்தைமாரும் எம்மிடையே இருக்கின்றனர்.

இவையெல்லாம் சிந்தனைக்குரியவையே.

ரிப்கா பாரி கிரிஸ்தவத்துக்கு மாறினார் என்பது கசப்பான உண்மை தான்;எனினும் இதில் அதிர்ச்சியடைவதற்கு எதுவுமே இல்லை.

இந்த சம்பவத்தில் இஸ்லாத்துக்கெதிரான திட்டமிடப்பட்ட சதியொன்றில் குறித்த கிரிஸ்தவ பிரச்சார அமைப்பு ஈடுபடுவதாகக் குற்றம் சாட்டப்படிகிறது.

அது உண்மையாக இருந்தாலும் இல்லாவிட்டாலும்,மனித இனத்தை வளப்படுத்தும் பணிக்காக உலகிற்கு அனுப்பப்பட்ட முஸ்லிம் சமூகம்,

இந்தச்சம்பவத்தை ஒட்டி உணர்ச்சிவசப்பட்டு பொங்கி எழுவதை விட

நீண்டகால நோக்கில் சிந்தித்து செயற்படுவதே அறிவுபூர்வமானது.

நீண்டு நெடித்தோடும் ஆறு, தேங்கி நாற்றமெடுக்கக்கூடாது!!!

2011-04-08T22:33:00.000-07:00

சமீலா யூசுப் அலி

Dr Siham Kardhawi

“ இஸ்லாமிய இயக்கம் ஆரம்பித்து பல்லாண்டுகள் கடந்தாலும் சடவாதச்சிந்தனைகளைக்கும் மாக்ஸிசப்போக்குகளுக்கும் தனியொருவளாகவும் வினைத்திறனுடனும் முகங்கொடுக்கக்கூடிய பெண் தலைமைத்துவம் இன்னுமே வெளிவரவில்லை.பெண்கள் இயக்கத்தை கட்டுப்படுத்துவதற்கான ஆண்களின் இரக்கமற்ற முயற்சிகளின் விளைவே இது.ஏனெனில் பெண்கள் அவர்களை வெளிப்படுத்த ,அவர்களது விசேட தலைமைத்துவ ஆற்றல்களையும் திறமைகளையும் வெளிக்காட்ட அல்லது ஆண்களின் ஆதிக்கம் இல்லாது பெண்கள் தமது வேலைகளை தாமே முன்னெடுத்துச்செல்லும் வல்லமையை நிரூபிக்க ஆண்கள் ஒரு போதும் உண்மையான வாய்ப்புக்களை வழங்கவில்லை.பெண்களின் இஸ்லாமியப்பணி வெற்றிபெறுவதற்கும் இஸ்லாமிய இயக்கத்தில் நீடித்திருக்கவும் ,இஸ்லாமிய இயக்கம் பெண் தலைமைகளை பிரசவிப்பது கட்டாயமாகி விடுகிறது என நான் உறுதியாக நம்புகிறேன்.பெண் தலைவர்கள் அழைப்புப்பணி,சிந்தனை,அறிவியல்,இலக்கியம்,கல்வி போன்ற அனைத்துத்துறைகளிலும் தோன்ற வேண்டும்.ஆண்களைப்போலவே பெண்களும் இறைவனுக்கு தம்மை முழுமையாக அர்ப்பணம் செய்ய முடியும்.உயிர்த்தியாகத்தாக்குதலில் பெண்கள் முன் செல்லலாம்.அது முடியாத ஒரு வேலையோ அல்லது கடினமான ஒரு பணியோ அல்ல.அபரிமிதான அறிவுடைய ஆண்களும் இருக்கிறார்கள் பெண்களும் இருக்கிறார்கள்.அறிவும் புத்தாக்கத்திறனும் ஆண்களுடைய தனியுரிமை அல்ல.

அல்குர்ஆனில் அல்லாஹ் ,தனது மக்களை அறிவுடனும் வீரத்துடனும் வழிநடாத்திய சேபாவின் அரசியைப் பற்றி வீ’ணுக்காக சொல்லவில்லை.”

பெண்களின் சமூகப்பங்களிப்பு பற்றி கலாநிதி யூசுப் அல் கர்ழாவியின் சிந்தனையிலிருந்து சிதறிய சில துளிகள் இவை.

பெண்களை கண்ணியத்தையும் மரியாதையையும் விட்டுக்கொடுக்காமல் வாழ்வியல் மட்டுமல்லாது சமூகவியல்,அரசியல்,அறிவியல் துறைகளிகளும் தனித்துவமான பங்களிப்பை வழங்க வேண்டும் என்பது டொக்டர் யூசுப் அல் கர்ளாவியின் வஹியின் அடியில் எழுகின்ற சிந்தனை.

1926 இல் எகிப்தின் குக்கிராமொன்றில் குடியானவப் பெற்றோர்களின் மடியில் தவழ்ந்த ஒரு குழந்தை இன்று வல்லரசுகளின் அடிநெஞ்சுக்கு நெருப்பு வைக்கும் வைகறைச்சூரியனாக எழுந்து நிற்கிறது,புகழனைத்தும் இறைவனுக்கே.

எட்டுத்திசைக்கும் ஒளி கொடுக்கும் நிலவை வீட்டு விளக்குக்குள் அடைக்க முடியாது.பெண்களின் பங்களிப்பை மறுத்து விட்டோ அல்லது மறந்து விட்டோ எந்தவோரு புரட்சியும் இஸ்லாமிய எழுச்சியும் சாத்தியமில்லை.

பெண்களின் பங்களிப்பினையும் முன்னேற வேண்டியதன் முக்கியத்துவத்தையும் பற்றி மேடைகளில் முழங்கும் பீரங்கிகள் தம் பெண்கள் என்று வரும் போது வெறும் புஸ்வானமாய் போய்விடும் அவலம் அன்றாடம் காண்கிறோம்.

ஆக்ரோஷமாய் எழுதும் பேனாக்கள் கூட தன் மகள்,தன் மனைவி அல்லது தன் சகோதரி என்று வரும் போது ‘எதற்கு மேற்படிப்பு…. வம்பை வளர்க்காமல் வீட்டுக்குள் முடங்கு’ என்ற வசனங்கள் உதிர்ப்பது தான் வழமை.

பெண்ணின் தனித்துவத்தை மதித்து அவளது சமூகப்பங்களிப்பின் எல்லைகளை கண்காணத்தூரம் வரை விஸ்தரித்த கர்ளாவி அவர்கள் தன் பேச்சுக்கும் எழுத்துக்கும் வாழும் உதாரணமாக இருப்பது மிக மிக சந்தோசம் தருகிறது.

‘ஊருக்குத்தான் உபதேசம் உனகல்லடி மகளே” என்று வெறும் வாய்ச்சொல்லோடு நிறுத்தி விடாமல் தன் மகள்களை சாதனையின் எல்லை வரை பறந்து செல்ல சிறகுகள் வழங்கியிருக்கிறார் கர்ளாவி அவர்கள்.பேராசிரியர் டொக்டர் இல்ஹாம் கர்ளாவியும் டொக்டர் ஷிஹாம் கர்ளாவியும் ஒரு வரலாறு படைத்த தந்தைக்குப் பிறக்கும் பேறு பெற்றவர்கள்.

டொக்டர் இல்ஹாம் கர்ளாவி சர்வதேசரீதியில் அறியப்படும் ஓர் அணுவியல் விஞ்ஞானி.தற்போது கத்தார் பல்கலைக்கழகத்தில் அணுப் பெளதீகவியல் பேராசிரியராக பணியாற்றும் அவர்,தனது கலாநிதிப்பட்டத்தை (Ph.D.) லண்டன் பல்கலைக்கழத்திலிருந்து 1991 ஆம் ஆண்டு பெற்றுக்கொண்டார்.அவரது டொக்டர் பட்டத்திற்கான ஆய்வு பொசிட்ரொன் பெளதீகவியல் (Positron Physics) ஆகவிருந்தது.

பின்னாளில் டொக்டர் இல்ஹாம் ,கத்தார் பல்கலைக்கழகத்தில் பொசிட்ரொன் உத்தியை பயன்படுத்தும் ஆய்வு கூடத்தை நிறுவுவதற்காக தன் உடல் வருத்தி உழைத்தார்.மத்தியகிழக்கிலேயே முதன்முறையாக ‘மெது பொசிட்ரொன் கதிர் சக்தி மாறியை” அமைக்கும் பெருமை அவர் காலடியில் விழுந்தது,அல்ஹம்துலில்லாஹ்.இன்று முறையாக நிறுவப்பட்ட பொசிட்ரொன் ஆய்வு கூடத்தை நடாத்தி வரும் டொக்டர் இல்ஹாம் 2005 ஆண்டில் ‘மெது பொசிட்ரொன் கதிர்கள் ‘சம்பந்தமான ஒரு சர்வதேச மாநாட்டை ஏற்பாடு செய்து தலைமை வகித்தார். கத்தார் பல்கலைக்கழகத்தின் 2004 ஆம் ஆண்டின் சிறந்த ஆய்வுக்கான விருதும் 2008 இல் அறிவியலுக்கு பங்களித்த அறபுப்பெண்களுக்கான அஹ்மத் பதீப் விருதும் அவர் வீடு தேடி விசாரித்த குறிப்பிடத்தக்க அங்கீகாரங்கள்.

தேசிய,பிராந்திய மற்றும் சர்வதேச மட்டங்களில் பலதரப்பட்ட ஆய்வு முயற்சிகளில் சம்பந்தப்பட்டிருக்கும் இல்ஹாம் கர்ளாவி அவர்கள் பல்வேறு சர்வதேச விஞ்ஞான அமைப்புக்களில் அங்கத்துவம் வகிப்பது உபரிச்செய்தி.

அணு மற்றும் அது சார்ந்ததுறைகளில் சர்வதேச அரங்கில் கத்தாரைப்பிரதிநிதித்துவப்படுத்திவரும் டொக்டர் இல்ஹாம் அவர்கள் சாதிக்கத் துடிக்கும் பெண்களுக்கு மட்டுமல்லாது ஆண்களுக்கும் ஓர் அழகிய உதாரணம்.

அபரிமிதமான ஆர்வமும் தன்னம்பிக்கையும் புத்தாக்க வேட்கையும் இல்ஹாம் அல் கர்ளாவியின் இரத்தத்தில் ஓடுபவை.பெளதீகவியல் துறையை கற்பிப்பதற்கான திறன்களை முன்னேற்றுவதற்காக தன்னை உருக்கிக்கொண்டு உழைக்கும் இல்ஹாம் “கத்தார் பெளதீகவியல் அமைப்பி”னை நிறுவி அதனூடாக ஏராளமான பயிற்சிப்பட்டறைகளையும் பாடநெறிகளையும் நடாத்திவருகிறார்.

முஸ்லிம் உலகின் ஆன்மீகத்தலைவராக அறியப்படும் கலாநிதி யூசுப் அல் கர்ளாவியின் இன்னொரு புதல்வி டொக்டர் சிஹாம் அல் கர்ளாவி ; சாதனை வானில் ஒளிவிடும்

இன்னொரு நட்சத்திரம். தற்போது கத்தார் விஞ்ஞான மற்றும் கலைகளுக்கான கல்லூரியின் டீனாகப் பணிபுரியும் டொக்டர் சிஹாம் கர்ளாவி அதற்கு முன்னர் கத்தார் அகடமியின் பணிப்பாளர்களில் ஒருவராகவும் கத்தார் விஞ்ஞான மற்றும் கலைக்களுக்கான கல்லூரியின் இரசாயனவியல் துறைத்தலைவராகவும் மட்டுமல்லாது மாணவர் விவகாரங்களுக்கான இணைத்தலைவராகவும் இயங்கியிருக்கும் ஒரு சாதனைப்பெண்.

கத்தார் பல்கலைக்கழகத்தில் 1981 ஆம் ஆண்டு இரசாயனவியலில் முதற்பட்டம் பெற்ற டொக்டர் சிஹாம் கெய்ரோவின் புகழ் வாய்ந்த “ஐய்ன் ஷம்ஸ் பல்கலைக்கழகத்தில் தனது M.Sc முதுமானிப்பட்டத்தைத்தொடர்ந்தார்.தனது கலாநிதிப்பட்டத்துக்காக 1987 இல் ஐக்கிய இராச்சியத்தின் பெர்க்செயர் பல்கலைக்கழகத்தோடு இணைந்தார்.டொக்டர் சிஹாம் அல் கர்ளாவி 1992 இலிருந்து 1994 வரை கத்தார் பல்கலைக்கழத்தின் இரசாயனவியல் இணைப்பேராசிரியராக தன் தனித்துவமான பங்களிப்பை வழங்கியிருக்கிறார்,அல்ஹம்துலில்லாஹ்.

2003 இல் டாட் “DAAD” (Deutscher Akademischer Austausch Dienst) என்ற விருது சிஹாமின் கதவுகளைத் தட்டியது.17க்கும் அதிகமான ஆய்வுக்கட்டுரைகளைச் (இவை synthetic organic chemistry and photochemistry சம்பந்தமானவை) சொந்தம் கொண்டாடும் விரல்கள் டொக்டர் சிஹாமுக்குரியவை.

எகிப்தில் எழுந்த இஸ்லாமிய எழுச்சிப்புயல் இனி உலகின் மூலை முடுக்கெங்கும் தன் காலடிச்சுவடுகள் பதிக்கத்தான் போகின்றது.இஸ்லாமிய இயக்க ஒழுங்குகளில் ஆக்கபூர்வமான மாற்றங்கள் ஏற்படப்போகின்றன என இஸ்லாமிய ஆய்வாளர்களும் அறிஞர்களும் தம் கருத்துப் பகிர்கிறார்கள்.

இலங்கை மண்ணும் இஸ்லாமிய இயக்கமும் ஆரோக்கியமான பெண் ஆளுமைகளை வேண்டி நிற்கிறது.சில போலித்தனமான பிடிவாதங்கள்,வீணான வாதப்பிரதிவாதங்களுக்கு மேலால் நாம் எழுந்து நிற்க வேண்டிய தேவை வலுத்திருக்கிறது.

ஆண் தலைமையே வரவில்லை;இங்கு பெண் தலைமை பற்றிப் பேசுகிறார்கள் என் சிலர் குசுகுசுப்பது காதில் விழாமலில்லை.ஆண்கள் உருவாகித்தான் பெண்கள் உருவாக வேண்டும் என்றிருந்தால் முஸ்லிம் சமூகம் பாதி செயலிழந்த உடலாய் வாழவேண்டிய வேதனை வந்து விடும்.

இந்தப்பாதை அல்லாஹ்வின் பாதை.

பதியும் எம் பாதங்களின் வலிமைக்கும் பொறுமைக்கும் பால்வேறுபாடு இல்லை.

சுவனத்தை நோக்கி நீண்டு நெடித்தோடும் ஆறு, ஓரிடத்தில் தேங்கி நாற்றமெடுக்கும் தேவையில்லை.

அழகிய கூலி அர்ப்பணத்திற்கும் அழியாத நோக்கத்திற்கும் தான்.

செல்வோம்

உள்ளத்தில் அல்லாஹ்வை சுமந்து செல்வோம்.

Prof Ilham Kardhawi

நம் வீட்டுக்கதவிடுக்கில் ஒரு சிறுமி

2011-04-07T22:51:00.001-07:00

சமீலா யூசுப் அலி

“லா நினா” என்றால் சிறுமி என்று ஸ்பான்ய மொழியில் அர்த்தப்படும்.

பசுபிக்(கிழக்கு) சமுத்திரத்தின் மேற்பரப்பு வெப்பநிலையை அசாதாரண அளவில் குறைத்து குளிரால் விறைக்கச் செய்யும் கடல் சார் காலநிலை தான் லா நினா.இந்தக்கடற் குளிர் சூழவுள்ள பிரதேசங்களின் அமைதியான காலநிலையில் சடுதியான மாற்றங்களை கொண்டுவந்து விடுகிறது.

சுட்டெரித்துக் கொண்டிருந்த சூரியனைச் சுருட்டி வைத்து விட்டு உறைபனிக்குளிரையும்,ஊசி ஊசியாய் உடலிறங்கும் மழையையும் கொண்டு வரும் லா நினா , 2011 வருட ஆரம்பத்திலேயே நம் நாட்டுக்கதவையும் தட்டிவிட்டது.

கடந்த ஆண்டு மிக வெப்பமான ஆண்டாகப்பதிவாகியிருந்தாலும் இவ்வாண்டு பல நாடுகளின் மழைவீழ்ச்சி முன்னெப்போதும் இல்லாதளவுக்கு அதிகரித்தது.

டிஸம்பர் இறுதிப்பகுதியிலிருந்து ஜனவரி நடுப்பகுதி வரை வானம் இடைவிடாது குமுறிய வண்ணமே இருந்தது பலருக்கு ஞாபகம் இருக்கலாம்.குடை முளைத்த வீதிகளும்,இடைக்கிடை மண் நெகிழ்வுகளும்,மரச்சரிவுகளுமாய் ஓரளவு சிரிப்பும்,சின்னக்கோபமுமாய் இருந்த மழை, எரிமலைக்குச் சவாலாய் தீப்பிடித்து எரியத் தொடங்கியது.

இடர் முகாமைத்துவ மத்திய நிலையத்தின் தகவல்களின் படி இலங்கையின் 14 மாவட்டங்கள் வெள்ளத்தின் நேரடியான பாதிப்புக்குள்ளாகி இருக்கின்றன.மட்டக்களப்பு,அம்பாறை,திருகோணமலை,,குருநாகல்,அனுராதபுரம் மற்றும் பொலநறுவை இவற்றில் குறிக்கக்கூடியவை.12 இலட்சம் மக்கள் பாதிக்கப்பட்டு ,500 மில்லியன் டொலருக்கு மேற்பட்ட சேதம் ஏற்பட்டிருக்கிறது என்று ஒரு அறிக்கையில் விசனம் தொனிக்கிறது.

மனித சக்திகள்- அவை விண் துளைக்கக்கூடியதாக இருந்தாலும் கூட இறைவனின் மகத்தான நாட்டத்தின் முன்னால் அவை ஒரு சுண்டு விரல் அசைக்கக்கூட ஆற்றலற்றவை. அல்லாஹ்வுத்தஆலா தன் வல்லமையை மீண்டுமொரு முறை நிரூபித்திருக்கிறான்.சுனாமிக்குப்பிறகு நம் தேசம் முகம்காட்டிய மிகப்பாரிய அழிவு இந்த வெள்ளம்.

வெள்ளம் என்பது வெறும் சொல்.ஆனால் நாட்டின் ஒவ்வொரு பிராந்தியத்திலும் இந்தச்சொல்லுக்கு அர்த்தம் வேறு.கிழக்கிலங்கையில் மக்களை உடுத்த துணிகளோடும் காய்ந்த வயிறுகளோடும் காயப்போட்ட அதே வெள்ளம், மத்திய மலைப்பிராந்தியத்தில் அடர் மழையோடும் ,உயிர் துளைக்கும் கடுங்குளிரோடும் தன்னை நிறுத்திக்கொண்டது.

வெள்ளத்தையும் கடுங்குளிரையும் பற்றி எழுதாத பத்திரிகைகள் இல்லை; பேசாத ஊடகங்கள் இல்லை.ஆனால் மக்களின் மனப்பதிவுகளின் வெளிப்பாடுகள் இந்த அழிவின் பின்னணி பற்றி என்ன சொல்கின்றன என்பது மிகச்சுவாரசியமான ஒன்று.

நாட்டில் அநியாயம் வலுத்தால் அல்லது ஆட்சித்தலைவர் குடிமக்களை நசுக்கி ஆண்டால்,இயற்கை சீற்றமெடுக்கும் என்பது சிங்களச்சகோதரர்களின் பாரம்பரிய நம்பிக்கை.

பாவங்கள் அதிகரித்து விட்டன.குறிப்பாக கரையோரப்பகுதிகள் இறைவனின் ஏவல்களை மீறி நடக்கின்றன.எனவே இயற்கை அழிவுகள் உயிர்களைத் தண்டிக்கும் உபகரணங்கள் எனச்சிலர் கூறுகிறார்கள்.

சூழல் மாசடைவதைத்துரிதப்படுத்தி காற்றையும் கடலையும் கால்பதியும் மண்ணையும் கழிவுகளில் புதைத்த எமக்கு, அதன் கசப்பான கனிகளையும் சுவைக்கும் நிர்ப்பந்தம் நேர்ந்திருக்கிறது என்கிறார்கள் சூழலின் காதலர்கள்.

உலகம் 2012 இல அழியப்போகிறது,அதற்கு முன்னர் இயற்கை அழிவுகளால் மக்கள் பகுதி பகுதியாக அழியப்போகிறார்கள் –இது இன்னும் சிலரிடமிருந்து சிதறி விழுந்த கருத்து.

இந்த வருடம் அழிவுகளின் வருடம் என்று ஆரம்பத்திலேயே சோதிடர்கள் எதிர்வு கூறிவிட்டார்கள்,அவர்களின் கணக்கு எங்கே பிழைத்தது என்று சுட்டு விரல் நீட்டுகிறார்கள் ஓரிருவர்.

கிழக்கு மக்களின் மனங்களை சுனாமியால் கூட மாற்ற முடியவில்லை ,சீதனப்பேய் இன்னும் பயங்கரமாய் தலையை அவிழ்த்து ஆடுகிறது, ஐவேளைத்தொழுகைக்கு கூட ஆளில்லை,தேவை இந்தச் சோதனை என்று முஷ்டி முறுக்குகிறார்கள் இன்னும் கொஞ்சப்பேர்.

இன்பமும் சோதனை;துன்பமும் சோதனை,இறைவன் மக்களின் பொறுமைத்தங்கத்தை தீயில் காட்டி புடம் போடுகிறான் என்கிறார்கள் சில பக்குவப்பட்டவர்கள்.

ஆதம்பாவா யுத்தத்தில் அந்தரப்பட்டான்;அதே ஆதம்பாவா சுனாமியில் சிக்குப்பட்டான,இந்த வெள்ளத்திலும் ஆதம்பாவாவின் வீட்டுச்சுவர் விழுந்திருக்கிறது- தொடர்ந்தும் ஒரே மக்கள் பிரிவினர் சோதிக்கப்படுகிறார்களே இதன் பின்னணி என்ன என்று ஒரு கேள்வியோடு வருகிறார்கள் இன்னும் சிலர்.

அழிவுக்குட்பட்டவர்களை அரவணைக்கும் கரங்களின் வல்லமையைப் பார்க்க இறைவன் கொடுத்த வாய்ப்பு இது என்கிறார் உடலாலும் பொருளாலும் அள்ளிக்கொடுத்தவர்கள்.

பரஸ்பரம் முரண்பாடுகள் வேரோடிப்போன இஸ்லாமிய இயக்கங்கள் இணைந்து செயற்பட ஒரு புதுக்களம் கிடைத்திருக்கிறது –சில சிந்தனையாளர்கள் சொல்லி விட்டுப்போகிறார்கள்.

வயல்களை வெள்ளம் கொண்டு போனதால் அரசாங்கத்திற்கு மக்களின் மேல் வரிச்சுமை சுமத்த வந்த வாய்ப்பு என்று விசனப்படுகிறார்கள் சராசரி மக்கள்.

அரச உதவிகளுக்கு முன்னரே இஸ்லாமியத்தொண்டு நிறுவனங்கள் மக்கள் விழிநீர் துடைக்க நான்,நீ என்று போட்டி போட்டுக் கொண்டு அழிவு நடந்த இடங்களுக்கு பதறியடித்துச் சென்றது ஆரோக்கியமானது என சந்தோசிக்கிறார்கள் சமூக ஆர்வலர்கள்.

வேறுபாடுகள் களைந்து ஒரணியில் இணைந்து செயற்படும் முஸ்லிம் சமூகமுன்மாதிரியின் தேவை ,வெள்ளத்தின் பின் வலுத்திருக்கிறது என புத்தி ஜீவிகள் கருத்துச் சொல்கிறார்கள்.

ஒரே வெள்ளம் தான்;ஆனால் மனித உள்ளத்தில் அவை ஏற்படுத்தும் அதிர்வுகள் வித்தியாசமானவை;அந்த அதிர்வின் வீச்சும் வேகமும் வித்தியாசமானவை.

சிலவாரங்களுக்கு முன் நாடு கடுங்குளிராலும் கட்டுடைத்த வெள்ளத்தாலும் நம் தேசம் அவதிக்குள்ளான பொழுதுகளில், குளிருக்கு இதமான கம்பளிச்சட்டைகளுடன் சூடான தேநீர் அருந்திய எமக்கு இந்த வெள்ளமும் அதன் பின்னால் உள்ள செய்திகளும் காலித்தேநீர் கோப்பை போல அர்த்தம் இழந்து போகலாம்.

ஆனால்,இயற்கை அழிவுகள் அதன் பின்னணி மற்றும் அதன் பின்விளைவுகள் குறித்தான நம் சிந்தனை இன்னும் விசாலப்பட வேண்டிய தேவை இருக்கிறது.

ஒரு சாரார் மற்றொரு சாராரை சுட்டுவிரல் நீட்டி குற்றம் சாட்டுவது எமது நோக்கங்களுக்கு அப்பாற்பட்ட ஒரு அகதிப்பிரதேசம்.

வெள்ளம்,கடுங்குளிர்,மின்னல்,நிலநெகிழ்வு,அடைமழை ,அடங்காத காற்று இவைகள் ஓயப்போவதில்லை;காலத்துக்குக்காலம் நம் தேசக்கதவுகளை அவைத் தட்டத்தான் போகின்றன.நாமும் மாறி மாறி இடர்படவும்,இடுக்கண் களையவும் மீண்டெழுவும் போகிறோம்.

இந்த வெள்ளம் நமக்குக் கொண்டு வந்த சேதி என்ன?

ஊடகங்களின் செய்திகளுக்கு அப்பாலிருந்து சிந்திக்க வேண்டிய தேவை ஒவ்வொரு மனிதனுக்கும் இருக்கிறது;குறிப்பாக ஒரு முஸ்லிமுக்கு இவ்வுலகில் செய்ய வேண்டிய மூன்று பணிகளைப்பற்றி ஆராய்ந்தறிவதற்கான வாய்ப்பு வந்திருக்கிறது.

இபாதத்- அல்லாஹ்வுக்காக மனிதன் செய்ய வேண்டிய பணி

இமாரத்-உலகை வளப்படுத்தும் பணி(அறிவாராய்ச்சி போன்ற இன்னும் பலவிடயங்கள்)

இகாமதுத்தீன் – அல்லாஹ்வுத்தஆலாவின் தீனுக்கு ஆட்சி அதிகாரத்தைப்பெற்றுக் கொடுக்கும் பணி.

வெள்ளத்தோடு அடிபட்டுச்செல்லும் சருகுகல்ல;நாம் முன்மாதிரி மிக்க முஸ்லிம் சமூகம் என நிரூபிக்கும் நாள் நாம் காலடியில் வந்திருக்கிறது.

திறக்கப்படாமலேயே இற்றுப்போன நம் சிந்தனைக்கதவுகளை ஒரு முறை திறந்து விடுவோம்;புதிய காற்று புலன்களை விசாரிக்கட்டும்.

இலட்சியப்பாதையில் ஒரு மைத்துளியின் பயணம்!

2011-04-07T11:33:00.001-07:00

சமீலா யூசுப் அலி

அல்ஹஸனாத்- அது வெளிவந்த போது நமது இலங்கைச்சமூகத்தில் இஸ்லாம் வெறும் சடங்குகளுக்குள்ளும் சில்லறைச்சம்பிரதாயங்களுக்கும் சிக்கிக்கிடந்தது.

அல்குர்ஆனுக்கும் முஸ்லிம்களுக்கும் உள்ள உறவு வெறும் உதட்டு நுனிகளோடு மட்டுப்பட்டிருந்த காலம் அது.

தூங்கிக்கிடந்த சமூகத்தின் உள்ளக்கதவுகளை ஓங்கித் தட்டிய அல்ஹஸனாத் துடிப்பான இளைஞர்களின் இதயங்களில் வேரூன்றியது.

வாசிக்கும் பழக்கம் மட்டுப்பட்டிருந்த ஒரு யுகத்தில் பெண்களிடம் கூட அல்ஹஸனாத் இன் வரிகள் அழுத்தமாய் பதிந்தன.

இந்த மண்ணில் அழுத்தமாய் வேரூன்றி நிற்கும் ,ஜமா அதே இஸ்லாமி தூங்கும் விதையிலிருந்து துளிர்த்தெழுந்த வைகறையின் முதற் பொழுது அது.

குர்ஆனை உள்ளத்தில் சுமந்த ஒரு சமூக உருவாக்கத்தை நோக்கிய மகத்தான ஒரு இலட்சியப்பாதையை நோக்கி ஜமா அதே இஸ்லாமி அழைப்பு விடுத்தது.

காலங்காலமாய் ஊறிய பழக்கவழக்கங்களிருந்தும் சடங்கு சம்பிரதாயங்களிலிருந்தும் வெளியேறி சுவனம் நோக்கிய இப்பயணத்தில் இணைந்தவர்களை அப்போது விரல்விட்டு எண்ணி விடலாம்.

நாலு தசாப்தங்களில் ஒரு வரலாறு.

வாசிக்கத்தொடங்கிய வயதிலேயே நேசிக்கத்தொடங்கிய சஞ்சிகை அல்ஹஸனாத்.

ஒரு புத்தகமோ சஞ்சிகையோ எதுவானாலும் அது ஐம்புலன்களுக்கும் உரியது என்பது எனது அபிப்பிராயம்.புதிய சஞ்சிகையின் வாசம் நுகர நாசி ஆசைப்படும்.அதனால் அல்ஹஸனாத் வீட்டுக்குக் கொண்டுவரும் போது அதை முதலில் வாசிக்க வேண்டும் என்ற துடிப்பு இருக்கும்.

நினைவு தெரிந்த நாட்களிலிருந்தே வீட்டில் எப்போதும் அல்ஹஸனாத் இருக்கும். அல்ஹஸனாத்தை விளங்கியும் விளங்காமலும் எழுத்துக்கூட்டி வாசித்த ஆரம்பப்பாடசாலை நாட்களை எப்படி மறக்க முடியும்? அம்புலிமாமா,கோகுலம்,ரத்னபாலா,ரஷ்யச்சிறுவர் கதைகள் என்று ஆரம்பித்த வாசிப்பு ரசனை பின்னாட்களில் மேத்தா,வைரமுத்து,அப்துல் ரஹ்மான்,மொழிபெயர்ப்புகள் எனவும் அதன் பின்னர் யாத்ரா,அம்பை,எஸ் ராமகிருஷ்ணன்,இணைய இலக்கியங்கள் என விரிவடைந்து சென்ற போதும் அன்றிலிருந்து இன்று வரை அல்ஹஸனாத் வாசிப்பதில் இருக்கும் ஆர்வம் மாற்றமுறாமல் அப்படியே இருக்கிறது.முதற் பக்கம் தொட்டு கடைசிவரை விளம்பரங்கள் உட்பட அனைத்தையும் உள்ளுக்குள் எடுத்த பின் தான் உறக்கம் வரும்.

தெரியாத வயதில் இந்த அல்ஹஸனாத்தின் பின்னால் பாரியதொரு நிர்வாகக்குழுவும் நவீன வசதிகளுடன் கூடிய அலுவலகமும் அமைந்திருப்பதாய் ஒரு பிரமை இருந்தது.பிற்காலத்தில் அல்ஹஸனாத்தின் இயங்கு சக்திகளாய் வியர்வையும் இரத்தமும் சிந்தி இரவுபகலாய் உழைத்த தனிமனிதத் தோப்புக்களை அறிந்து கொள்ளும் வாய்ப்பு வாய்த்தது.அல்லாஹ் அவர்களனைவரினதும் இலட்சிய வேட்கையும் தன்னலமற்ற உழைப்பினையும் பொருந்திக்கொள்வானாக.

பழைய அல்ஹஸனாத்களைகளை குவியலாய் வைத்துக்கொண்டு கவிதைப்பக்கங்களை மட்டும் புரட்டிப்புரட்டி வாசித்த இரவுகள்.

அல்ஹஸனாத்தில் என் ஆக்கமும் வெளிவராதா என்று ஆசை ஆசையாய் யோசித்த காலங்கள் நினைவில் வந்து போகின்றன.

அல்ஹஸனாத்தில் என் முதல் ஆக்கம் அச்சில் என்று நண்பி சொல்ல கல்லூரிக்குள் எனக்கு சிறகு முளைத்த நாள்.ஆயிரம் ரோஜாக்கள் துளிர்த்த அந்தப்பொழுதின் கனம்,இன்னும் மனதுக்குள் ஈரமாய் பதிந்திருக்கிறது,அல்ஹம்துலில்லாஹ்.

ஒவ்வொரு ஆக்கம் வெளிவந்த பின்னரும் தனிப்பட்ட முறையில் என்னை அல்லது என் தந்தையை தொலைபேசியில் அழைத்துப் பாராட்டிய அன்றை நாள் அல்ஹஸனாத் ஆசிரியர் எஸ்.எம் மன்சூர் அவர்களின் ஊக்க வார்த்தைகள் என்றைக்குமே மறக்க முடியாதவை.

என் தாயும் தந்தையும் ஜமாஅத் பாசறையில் வளர்ந்தவர்கள்;ஜமா அத் என்றாலே புருவம் சுளிக்கும் ஒரு சமூகத்தின் கற்பாறை நெஞ்சில் மெல்லிய ஆனால் உறுதியான அலைகளாய் மோதிய ஜமா அத் குடும்பத்தின் ஆரம்ப கால வாரிசுகள்.

இன்று இலை விட்டு கிளை விட்டு விசாலமாய் எழுந்து நிற்கும் இந்த இஸ்லாமிய விருட்சம் விதைக்குள்ளிருந்து புறப்பட்ட போது நீர் விட்ட கரங்களில் அவர்களுக்கும் பங்குண்டு.

அல்ஹஸனாத் பற்றி என் தந்தையிடம் கேட்டேன்.ஒரிரு ஆக்கங்களை அல்ஹஸனாத்துக்காக எழுதியுள்ள என் தந்தை வாலிப வயதில் அல்ஹஸனாத்தை விற்கச்செல்லும் போது நிகழ்ந்த மறவாத நினைவுகள் பலவற்றைப்பகிர்ந்தார்.அவற்றில் சில …..

…………………………………………………………………………………………………………………………………………………………………………………………………………………………………………………..

நினைவு 01

நாங்கள் அல்ஹஸனாத் விற்க ஒரு தனவந்தரின் கடைக்குச்சென்றிருந்தோம்

.’நாங்கள் ஒரு சஞ்சிகை வெளியிடுகிறோம்.இஸ்லாத்தைப்பற்றி தெளிவாக விளங்கிக் கொள்வதற்கு இது உதவியாக அமையும்.வீட்டில் உள்ள பெண்கள் கூட வாசிக்கலாம். என்றெல்லாம் கூறி மிகக்கண்ணியமாக அல்ஹஸனாத் இதழொன்றினை அவரிடம் கொடுத்தோம்.அவர் அதனை ஒரேயடியாகத் தூக்கி என் முகத்தில் எறிந்தார்.

’இதெல்லாம் இங்கு கொண்டுவரப்படாது.நீங்கள் மக்களை வழிகெடுக்கிறீர்கள்.பொய் கூறுகிறீர்கள்,இதில் இஸ்லாத்துக்கெதிரான புதுக்கருத்துக்கள் இருக்கின்றன’ என்று ஆவேசப்பட்டார்.

நான் அமைதியாக கீழே குனிந்து அந்த இதழை எடுத்து அவரது மேசை மேல் வைத்து விட்டு சொன்னேன்’ நீங்கள் இந்தச் சஞ்சிகையில் பிழைகள் இருக்கின்றன என்று சந்தேகப்படுவதில் எந்த விதமான தப்பும் இல்லை.ஆனால் மற்றவர்கள் கூறுவதை வைத்து அந்த முடிவுக்கு வந்து விடாதீர்கள்.இந்தச் சஞ்சிகைக்கு நாங்கள் காசு கொடுக்கிறோம். அடுத்த மாதம் வருகிறோம்.வாசித்துப்பார்த்து பிழைகள் இருந்தால் சொல்லுங்கள்,திருத்திக்கொள்கிறோம்.நாங்கள் சரியான வழியைத்தேடித்தான் செல்கிறோம்.என்று சொல்லி விட்டு வெளியே வந்தோம்.

அடுத்த மாதத்திலிருந்து அந்த தனவந்தர் அல்ஹஸனாத்தை வாங்கத் தொடங்கினார்,அல்ஹம்துலில்லாஹ்.

நினைவு 02

அப்போதெல்லாம் முழு மத்திய பிராந்தியத்துக்குமே அல்ஹஸனாத் விற்பதற்கு ஒரு சிலர் தான் இருந்தோம்.நமக்கும் பெரிதாக வருமானம் இல்லாத காலம்.சில இடங்களுக்கு கால்நடையாகவே சென்று சஞ்சிகை விற்று வருவோம்.அல்ஹஸனாத் விற்கச்சென்ற இடங்களில் நல்லெண்ணம் நட்புறவு காரணமாக தேநீர் குடிப்போம்,சாப்பிடுவோம் என்றெல்லாம் வற்புறுத்துவார்கள்.ஒரு இடத்தில் அல்ஹஸனாத் விற்கச்சென்ற போது மரவள்ளிக்கிழங்கு அவித்து சம்பலோடு தந்த நினைவு இன்னும் பசுமையாக இருக்கின்றது.

நினைவு 03

சில நேரங்களில் படித்த பணம் படைத்தவர்களை விட படிக்காத அல்லது வறுமைப்பட்டவர்களை அல்ஹஸனாத்தை வாங்குவதைக் கண்டிருக்கிறோம்.

எங்களைக் கண்ணியம் செய்ய வேண்டும் என்ற நோக்கில் படிக்கத்தெரியா விட்டாலும் ஒரு பிரதியை வாங்குவார்கள்.

அன்றாடச்சாப்பாட்டிற்கே வழியில்லாத குடும்பங்கள் கூட அல்ஹஸனாத் வாங்க ஆர்வங்காட்டுவதைக்கண்டிருக்கிறோம்.அப்போது அல்ஹஸனாத்தின் விலை 30 சதம் என நினைக்கிறேன்.அந்த நேரம் அது குறிப்பிடத்தக்க காசு.சில வீடுகளில் அல்ஹஸனாத்தை வீட்டிற்குள் எடுக்க அங்கும் இங்குமாக ஒரு சதம் இரண்டு சதம் என காசு தேடுவார்கள்.அவர்களது நிலமையைப் புரிந்து நாங்கள் சப்தமில்லாமல் அல்ஹஸனாத் ஒன்றை அங்கு வைத்து விட்டு வருவோம்.ஆனால் இல்வசமாக வாங்க மிகவும் சங்கோஜம் காட்டுவார்கள்.நாங்கள் செல்லும் போது இடைவழியில் குழந்தைளின் கையில் சேமித்த காசை கொடுத்து அனுப்புவார்கள்.அந்தச் சிறுவர்கள் ஓடி வந்து கையில் காசைத் திணித்து விட்டுப்போவார்கள்.

நினைவு 04

ஒரு இயக்கம் சார்ந்த முக்கியஸ்தரிடம் அல்ஹஸனாத் விற்கச்சென்றிருந்தோம்.

அவருக்கு அந்தக் குறிப்பிட்ட நகரத்தில் அவருக்கு நல்ல செல்வாக்கு.

அவர் ‘பெரியவர்கள் அறிஞர்கள் சொல்கிறார்கள்.நீங்கள் இந்தப்பத்திரிகையில் இஸ்லாத்திற்கு முரணான செய்திகளை எழுதுகிறீர்களாம்.இந்தியாவிலிருந்து பீர்முஹம்மது என்ற அறிஞர்’ திருக்குறளும் அல்குர் ஆனும் ஒன்று என்று இங்கு வந்து உரை நிகழ்த்தினார்.ஆனால் வெளியிலிருந்து வந்த ஒரு மனிதனை சங்கை செய்யாமல் நீங்கள் அவர் சொல்வதை பிழை என்று உங்கள் பத்திரிகையில் எழுதினீர்களாம்.பெரியவர்கள்,ஆலிம்கள் எங்களுக்கு சொல்லித்தருகிறார்கள்,அப்படி நீங்கள் செய்தது பிழையாம்.உங்களுக்கு ஆதரவு தருவது பிழையாம்.அதனால் எனக்கு உங்கள் பத்திரிகை வேண்டாம் என்று முகத்தில் அடித்தது போல் கூறி அனுப்பினார்.பின்னால் அவர் நம்மில் ஒருவரைத் அவரது மகளுக்குத் திருமணம் பேசி அனுப்பியிருந்தார்.அவர் கூறியதெல்லாம் வெறும் விதண்டா வாதம் என்று அப்போது தான் புரிந்தது.

நினைவு 05

ஒரு தேநீர் கடை.

,நான் ஒரு ஆசிரியன்,வாழ்க்கைச்செலவைப்பாருங்கள்,இது மாதிரி பேப்பருக்கெல்லாம் செலவழிக்க எங்களைப்போன்றவர்களிடம் ஏது காசு’ என்று பெஞ்சில் அமர்ந்திருந்தவர் கோபமாகக் கேட்டார்.

‘கோபப்படாதீர்கள் சகோதரரே,

நாங்கள் வீணாக மோதிக்கொள்ளத்தேவையில்லை.பத்திரிகை வாங்கியே ஆக வேண்டும் என்ற கட்டாயம் இல்லை.ஆனால் நீங்கள் கோபிக்க மாட்டீர்கள் என்று வாக்குத்தந்தால் ஒரு விஷயம் சொல்கிறேன்’ அவர் தலையாட்டினார்.

இப்போது பாருங்கள்.

நானும் ஒரு ஆசிரியன் தான்.என்னை நம்பியும் ஒரு உம்மா வாப்பா சகோதர சகோதரியர் என ஒரு பெரிய குடும்பம் இருக்கிறது.இதே சம்பளத்தில் ஒரு பகுதியை ச்செலவழித்துத் தான் நாங்கள் இங்கெல்லாம் வருகிறோம்.உங்கள் கையில் புகைந்து கொண்டிருக்கும் சிகரெட்டைப் பாருங்கள்.இதற்கு நீங்கள் ஒரு மாதத்திற்கு செலவழிப்பதில் ஒரு சின்னப்பகுதி தான் இந்த சஞ்சிகைக்குப்போகும்.இந்த சிகரெட் புகைப்பதால் நமக்கெல்லாம் எந்த இலாபமும் இல்லை,நோய்களை விலைக்கு வாங்குவதைத்தவிர.ஆனால் அல்ஹஸனாத் பிரதி ஒன்றை நீங்கள் மாதாந்தம் எடுத்தால் நீங்கள் மட்டுமல்ல உங்கள் குடும்பமும் நல்ல விஷயங்களை அறிந்து கொள்வார்களே,நான் சொல்வது பிழையாக இருந்தால் மன்னித்துக்கொள்ளுங்கள்”

அந்தச்சகோதர் அல்ஹஸனாத்தின் ஆறு மாதா சந்தாவுக்கு பணம் வழங்கினார்,அல்ஹம்துலில்லாஹ்.

……………………………………………………………………………………………………………………………………………………………………………………………………………………………………..

ஆரம்ப நாட்களில் தான் கற்பித்த பாடசாலை மாணவிகளுக்கு இந்த இஸ்லாமிய இலட்சியக்குரலை அறிமுகம் செய்ததோடு நின்று விடாது, அல்ஹஸனாத்தில்“பீபி தாத்தா” என்ற பெயரில் ஒரு சமூக ஊடுருவலைத் தொடர்ந்து எழுதிய புதுமைப்பெண் என் தாய்.சைபுன்னிஸா என்ற புனைப்பெயரில் சமூகத்தில் அன்றைய பொழுதில் தலைவிரித்தாடிய பித்அத்கள் சமூக ஒழுங்கீனங்களை எளிய பேச்சு நடையில் வெளிச்சத்துக்கு கொண்டுவந்திருக்கிறார். பின்னாட்களில் அதனை உம்மாவின் சகோதரர் தொடர்ந்திருக்கிறார்.ஆனால் ஒரு துக்ககரமான விடயம் இன்று வரை உம்மா அல்ஹஸனாத்தில் எழுதிய எழுத்துக்களை வாசிக்கும் வாய்ப்பு எனக்கு வாய்க்கவில்லை.பழைய அல்ஹஸனாத் இதழ்களைப்பெற முடியுமா என்று அல்ஹஸனாத் நிர்வாகத்திடம் தான் கேட்டுப்பார்க்க வேண்டும்.

இப்படி இப்படியாய் அல்ஹஸனாத் எங்கள் குடும்பத்தின் பிரிக்க முடியாத பாகம்.

நிச்சயமாக இலங்கையின் ஒவ்வொரு மூலையிலும் பல குடும்பங்களில் இன்னும் எழுதப்படாத இப்படியான கதைகள் ஆயிரம் இருக்கும்.

இலங்கையிலும் கடல்களுக்கு அப்பாலும் எங்கெங்கோ பிறந்த முகமும் முகவரியும் தெரியாத பலரை இணைத்த நேசப்பாலம் அல்ஹஸனாத்.

முகம்தெரியாத ஒரு நட்புவட்டத்தை ஆசிகளை அன்பை ஈமானியச்சொந்தங்களை ஈட்டித்தந்த அல்ஹஸனாத் பல வாசகர்களை எழுத்தாளர்களாக்கி இருக்கிறது. புகழ் பூத்த எழுத்தாளர்கள் பலரை வாசகர்களாக்கியிருக்கிறது.

இறைவனின் தூது இந்த பூமிப்பந்தில் முளைத்துச் செழிப்பதற்காய் நீண்ட நெடிய பாதையில் அல்ஹஸனாத் பயணிக்கிறது.

அல்ஹஸனாத்தின் வெளிப்புறமும் உள்ளடக்கமும் தரத்தில் ஏறுவரிசையில் இறங்காமலிருப்பதைக் கண்டு சந்தோஷமாயிருக்கிறது.

எனினும் அல்ஹஸனாத் நவீன உலகத்தின் வேகத்திற்கும் சமூகத்தின் தேவைக்கும் ஈடு கொடுக்கக் கூடிய அளவிற்கு இன்னும் வளர வேண்டியிருக்கிறது.

அல்ஹஸனாத்தின் கட்டுரைகளில் பேணப்படும் கண்ணியம் பாராட்டுக்குரியது.அல்குர் ஆன் ,ஹதீஸ் விளக்கங்களோடு நின்று விடாமல் இஸ்லாத்தை மக்களுக்கு இலகு படுத்தும் விதமான வித்தியாசமான உத்திகள் கையாளப்படுதல் காலத்தின் தேவையாகும்.

பசித்த ஏழைக்கு முதலில் ஒரு துண்டுப்பாண் அல்லது ஒரு பிடி சோறு தேவை.அதன் பின்னர் தான் அவன் செவிகள் ஒரு நல்லுபதேசத்தை எடுத்துக்கொள்ளும்.சமூகத்தின் அன்றாட பிரச்சினைகள் அவற்றுக்கான யதார்த்தமான தீர்வுகள் இவை அலசப்படும் களமாக அல்ஹஸனாத் மாறுவது ஆரோக்கியமான எதிர்காலத்தை உறுதிப்படுத்தும்.

மனித வாழ்வில் 40 வயது என்பது ஒரு முக்கியமான திருப்புமுனை.

40 வயதில் தான் முஹம்மத்(ஸல்) அவர்கட்கு நபிப்பட்டம் கிடைத்தது.

40 வயதை இளமையின் முதுமை என்று கூறலாம்;அல்லது முதுமையின் இளமை என்றும் கூறலாம்.

எதுவாகினும் எங்கள் அல்ஹஸனாத்துக்கும் இப்போது 40 வயது.அறிவின் முதிர்ச்சியோடும் இன்னும் துடிப்போடும் நதியின் பயணம் தொடரட்டும்.

வாழ்த்துக்கள்

கரையில் நின்றல்ல…..

நதியில் நனைந்து சொல்கிறேன்,

வாழ்த்துக்கள்.

அச்சு ஊடகங்களில் முஸ்லிம் பெண்களின் பங்களிப்பு –ஒரு பார்வை

2011-04-07T11:26:00.000-07:00

உலகம் மிக வேகமாக சுழன்று கொண்டிருக்கிறது.10 ஆண்டுகளுக்கு முன் எம்மால் கற்பனை செய்து பார்க்கவும் முடியாத பல விடயங்களை

அறிவியல் விஞ்ஞானத்தின் அசுர வளர்ச்சி இன்று சாத்தியமாக்கி விட்டது.சாதாரணமாய் நகர்ந்து கொண்டிருந்த எமது வாழ்க்கை முறையை, இந்த நூற்றாண்டின் இலத்திரனியல் புரட்சி அப்படியே புரட்டிப் போட்டு விட்டது.

இதழியல் மற்றும் பொதுஜன ஊடகத்துறையின் அபிவிருத்தி ஒரு பக்கம் திகைப்பூட்டக்கூடிய அளவுக்கு வளர்ச்சி கண்டுள்ளது.மறுபுறம் ஊடகங்களினூடாக கட்டற்ற தகவல் பரிமாற்றமும் அதனூடான பயங்கரமானதொரு கலாச்சாரச் சீரழிவும் எமது விழிகளை விரியச்செய்துள்ளன.

பொதுஜன ஊடகத்துறை( Mass Media ) எனும் போது

ü அச்சு ஊடகம் Print Media

ü இலத்திரனியல் ஊடகம் Electronic Media

ü புதிய ஊடகம் New Media/E Media

என வரிசைப்படுத்தலாம்.

அச்சு ஊடகத்தில் பத்திரிகை,சஞ்சிகை,துண்டுப்பிரசுரங்கள்,சிறப்பு மலர்கள் போன்றவை உள்ளடங்கும்.

வானொலி,தொலைக்காட்சி மற்றும் சினிமா ஆகியவை இலத்திரனியல் ஊடகங்களாகும்.

புதிய ஊடகம் அல்லது ஈ ஊடகம் எனும் போது அது இணையத்தளங்கள்,இணையப்பத்திரிகைகளிருந்து தொடங்கி பிரத்தியேக வலைப்பூக்கள்(Blogs) வரையிலான இணைய வீதியில் கிடைக்கும் அனைத்து கருத்து வெளிப்பாட்டு வடிவங்களையும் குறிக்கும்.

இதழியல் பற்றி “நீங்கள் கவனமாக இருக்கா விட்டால் பத்திரிகைகள் உங்களை அநியாயத்திற்குள்ளாக்கப்படுபவர்களை வெறுக்கவும்,அநியாயம் செய்பவர்களை விரும்பவும் வைத்து விடும்”என்று மால்கம் x ஒரு முறை கூறினார்.

ஊடகங்கள் மனித வாழ்வில் அதிக தாக்கம் செலுத்துகின்றன.வெகுஜன ஊடகங்களின் வழிமுறைகள் வித்தியாசமாக இருக்கலாம்.ஆனால் அனேகமாக அவற்றின் நோக்கங்கள் வரையறுக்கப்பட்டவை.

1. தகவல் வழங்கல் Information

2. அறிவுறுத்தல் Instruction

3. களிப்பூட்டல் Entertainment

4. விளம்பரப்படுத்தல் Advertisement

5. கருத்து உருவாக்கம் Shaping Opinion

அச்சு ஊடகங்களுக்கு பெண்கள் வழங்கக்கூடிய பங்களிப்பு எனும் போது அது தனிமனித ஆர்வத்தையும் ஆற்றலையும் பொறுத்து பல்வேறு நிறங்களை எடுக்கலாம்.

ú வெளிவரும் அச்சு ஊடகங்களை வாசிப்பது

ú அச்சு ஊடகங்களுக்காக எழுதுவது

ú அச்சு ஊடகங்களில் வடிவமைப்பு,செம்மைப்படுத்தல் போன்ற பணிகளை மேற்கொள்தல்.

ú அச்சு ஊடகங்களின் விற்பனை நடவடிக்கைகளில் பங்கெடுப்பது.

இலங்கை முஸ்லிம் பெண்களின் அச்சு ஊடகங்களுக்கான பங்களிப்பு கடந்த தசாப்தங்களில் எவ்வாறிருந்தது என்பதை ஒரு கணம் திரும்பிப்பார்ப்போம்.

இந்த நூற்றாண்டின் ஆரம்பத்தில் இலங்கை முஸ்லிம் பெண்களில் சுமார் 3% இனர் மாத்திரமே எழுத வாசிக்கத்தெரிந்திருந்தனர் என்கிறது ஒரு ஆய்வு.(நன்றி ‘இலங்கையில் முஸ்லிம் கல்வி’ நூல்)

ஒப்பீட்டளவில் ஆண்களை விட பெண்களின் வாசிப்பார்வம் குறைந்திருந்ததோடு மிகக்குறுகிய வானமே அவர்களின் எல்லையாக மாறிவிட்டிருந்தது.சுதந்திரத்திற்கு முற்பட்ட காலப்பகுதியில் மேலைத்தேயக்கல்வி கிரிஸ்தவ போதனைகளை அடிப்படையாகக் கொண்டிருந்ததால் அது முஸ்லிம்களின் கலாச்சார விழுமியங்களில் மாறாத வடுக்களை ஏற்படுத்தும் என்ற அச்சம் பெண்கள் கல்வியறிவு பெறுவதற்கு முட்டுக்கட்டையாக அமைந்தது.எல்லாக் காலங்களிலும் குர் ஆன் மத்ரஸா முறை அமுலில் இருந்ததால் முஸ்லிம் பெண்களில் பெரும்பாலானோர் அரபு மொழியில் எழுதவும் வாசிக்கவுமான ஆற்றலைப்பெற்றிருந்தனர்.

தேசம் அடிமைத்தளையிலிருந்த விடுதலைப்பெற்ற பொழுதுகளில் இலவசக்கல்வியின் அறிமுகமும்,பெண்கல்வி பற்றிய விழிப்புணர்வும் சமூகத்தின் கண்களை திறக்கச்செய்தன.வாசிப்பார்வம் அதிகரித்தது.

எனினும் சுதந்திரமடைந்து ஆறு தசாப்தங்கள் கடந்தும் இலங்கை முஸ்லிம் பெண்களின் ஊடகப்பங்களிப்பு திருப்திகரமான மட்டத்தில் இல்லை என்பது வருத்தத்துக்குரிய உண்மை.

செயற்கைக் கோள் தொழிநுட்பத்தின் வளர்ச்சி காரணமாக ஒரு குக்கிராமத்தின் மூலையிலிருந்து கொண்டே பல்வேறு தேசங்களின் தொலைக்காட்சி அலைவரிசைகளை கால் நீட்டி இரசிக்கும் வரம் வாய்த்திருக்கிறது.அது வரமா சாபமா என்பதை காலம் தான் தீர்மானிக்க வேண்டும்.சின்னத்திரை நாடகங்களிலும் சமையற்கலை நிகழ்ச்சிகளிலும் சிக்கிக்கொண்டுள்ள நம் பெண்கள்,அச்சு ஊடகங்களிருந்து இன்னும் அந்நியமாகி வரும் அவலம் நேர்ந்துள்ளது. அச்சு ஊடகங்களில் முஸ்லிம் பெண்களின் பங்களிப்பைத் தீர்மானிக்கும் சில காரணிகளை இவ்வாறு அடையாளப்படுத்தலாம்.

ü கருத்துவெளிப்பாட்டுச் சுதந்திரம்

ü தகவல் மூலங்களை அணுகுவதற்கான சுதந்திரம்

ü பொருளாதாரப்பின்னணி

ü கல்வி மட்டம்

ü அமைதியான வீட்டுச்சூழல்

ü அமையும் ஓய்வு நேரத்தின் அளவு

ü சமூகத்தின் எதிர்பார்ப்புக்களும் அழுத்தங்களும்

ü சரியான பயிற்றுவிப்பும் வழிகாட்டலும்

ü நவீன உலகம் மற்றும் வெகுஜன ஊடகங்களுடனான தொடர்பு

ü தனிப்பட்ட ஆர்வம்

ü தேடல்

கருத்துவெளிப்பாட்டுச் சுதந்திரம்

ஊடக சுதந்திரத்தை அனுபவிக்கும் உரிமை இலங்கை வாழ் எமக்கெல்லாம் இருக்கிறதா என்பது இன்னுமே வினாக்குறியாய்த் தான் விறைத்து நிற்கிறது. பால் வேறுபாடின்றி ஊடகவியலாளர்கள் வன்முறைக்காளாகும் முன்னணி தேசமாக நம் தேசம் உருமாறியிருக்கிறது.

ஒரு கருத்து - அது சரியா பிழையா என்பது இரண்டாவது விடயம், அதை வெளிப்படுத்தும் சுதந்திரம் உறுதிப்படுத்தப்பட வேண்டும்.கருத்து வெளிப்பாட்டை அனுமதிக்காத பட்சத்தில் அவை கூடாத இடங்களில் வெடித்து வெளிவரும் அபாயம் இருக்கிறது.ஒவ்வொரு அச்சு ஊடகத்திற்கும் ஒரு கொள்கை இருக்கும்,ஒரு நோக்கு இருக்கும்.பெண்களின் சமூக வாழ்வியல் பல்வேறு பரிணாமங்களை எடுத்து வரும் போது கருத்து வெளிப்பாட்டுச்சுதந்திரத்திற்கு நியாயமற்ற தடைகளை அச்சு ஊடகங்கள் விதிக்கக்கூடாது.அண்மையில் ஒரு ஆய்வுக்காக பெண்கள் ஏன் அதிகம் சமையலைப் பற்றியும் அலங்காரக்கலை பற்றியும் அதிகமாக எழுதுகிறார்கள் அல்லது வாசிக்கிறார்கள் என்று கலந்துரையாடிய நேரம் சுவையான விளக்கங்கள் சில வெளிச்சத்துக்கு வந்தன.

பெண்கள் அரசியல்,கல்வி,பொருளாதார மேம்பாடு அல்லது சமுதாயப்பிரச்சினைகள் பற்றி எழுதும் போது எமது சமூகம் அவர்களை’பெண்ணியல் வாதி’என முத்திரை குத்தி விடுகிறார்கள்.

பெண்ணியல்வாதி என அழைக்கப்படுவதை பல பெண்கள் விரும்புவதில்லை.இதனால் நமக்கெதுக்கு வீண் வம்பு என சாதாரணமான விடயங்களை மாத்திரம் பட்டும் படாமலும் எழுதி விட்டுச்சென்று விடுகின்றனர்.

இன்னும் சிலர் எழுதப்படும் விடயங்களை எழுத்தாளரின் வாழ்க்கையில் சம்பந்தப்படுத்தி பார்க்கின்ற அதிமேதாவித்தனத்தைச் செய்கின்றனர்,பெரும்பாலும் இந்த விபத்து பெண் எழுத்தாளர்களுக்கே நேர்கிறது.சில விடயங்களை எழுத நினைத்தாலும் இதை நம் வாழ்க்கையோடு சம்பந்தப்படுத்திப் பார்ப்பார்களோ என்ற பயம் பலரது பேனாக்களைக் கட்டிப்போட்டு விடுகின்றன.

அன்னை ஆயிஷா(ரழி) அவர்கள் சஹாபாக்களுக்கு கற்பிப்பவராக இருந்தார்.கவிதையிலும் மருத்துவத்துறையிலும் செம்மையான தேர்ச்சி கண்டிருந்த ஆயிஷா( ரழி) அவர்கள் பெண் என்பதாலோ அல்லது வயது குறைந்தவர் என்பதாலோ அவரது அறிவும் முதிர்ச்சியும் புறக்கணிப்புக்காளாகவில்லை.

பெண் என்றவுடனேயே எழுத்தின் தரம் பற்றிய ஐயப்பாடுகள் எழுகின்றன.ஊடகங்களும் இதற்கு விதிவிலக்கல்ல.இதற்கு முழுமையாக அச்சு ஊடகங்களை நோக்கி சுட்டு விரல் நீட்டி விட முடியாது.பெண்களின் வாசிப்பு ஒரு அட்டைப்பெட்டிக்குள் அடங்கிப்போய் விட்டதால்எழுத்துக்களின் வீரியமும் வீச்சும் கணிசமாகக் குறைந்துள்ளது என்ற உண்மையும் மறுபுறம் உறுத்துகிறது.

தகவல் மூலங்களை அணுகுவதற்கான சுதந்திரம்

தகவல் மூலங்களை அணுகுவதற்கான சுதந்திரம்(Access to all sources of information ) எனும் போது தகவல்களைப்பெறக்கூடிய் அனைத்து மூலங்களையும் ஊடகங்களையும் தடையின்றி பயன்படுத்தக்கூடிய சக்தியைக்குறிக்கும்.இணையம் இந்த நூற்றாண்டின் அலாவுதீன் பூதம்.‘தகவல் வெடிப்பு’(Information Explosion) ஏற்படக் காரணமாய் அமைந்த நினைக்க முடியாதளவு தகவல்களை உள்ளடக்கிய சுரங்கம்.

இன்று எத்தனை பெண்களுக்கு இணைய வீதிகளில் உலவும் வாய்ப்பு கிடைக்கிறது? அதை விடுவோம்.அன்றாடப் பத்திரிகைகள்,மாதாந்த சஞ்சிகைகள், மற்றும் சமகாலப்பிரச்சினைகள் பற்றிய நூல்களின் கிடைப்பனவு அல்லது பொது நூலகத்திற்கு செல்வதற்கான வாய்ப்பு பெண்களுக்கு போதுமானளவு கிடைக்கிறதா?

பொருளாதாரப்பின்னணியும் கல்விமட்டமும்

பொருளாதாரப்பின்னணியும் கல்விமட்டமும் ஓரளவு பெண்களின் ஊடகப் பங்களிப்பைத் தீர்மானிக்கின்ற காரணிகளாக அடையாளங்காணப்பட்டாலும் அவை குறிப்பிடத்தக்களவு செல்வாக்கான அம்சங்கள் அல்ல.

அமைதியான வீட்டுச்சூழல்

அமைதியான வீட்டுச்சூழல் எனும் போது பலருக்கும் சப்தம் அற்ற மிகச்சுத்தமாகப் பராமரிக்கப்படும் வீடுகள் நினைவுக்கு வரும்.பிரச்சினைகள் எல்லோருடைய வாழ்விலும் வெவ்வேறு முகமூடிகளுடன் தோற்றமளிக்கும்.பாகிஸ்தான் இந்தியாவாய் மோதிக்கொள்ளும் குழந்தைகளை வைத்துக்கொண்டு என்ன செய்ய முடியும் என பலர் அங்கலாய்ப்பது காதுகளுக்கு கேட்காமலில்லை.வீட்டுப்பிரச்சினைகள் முடியட்டும்,குழந்தைகள் கொஞ்சம் வளரட்டும் என்றெல்லாம் வாசிப்பதையும் எழுதுவதையும் ஒத்திப்போடுங்கள்.காதோரமாய் தலை நரைத்து பேரன் பேத்திகளும் பிறந்த பிறகும் இதே பல்லவி தொடரும்.அமைதியான சூழலை என்பது மனதுக்குள் முதலில் நட வேண்டும்.அதன் பின்னர் தான் வெளியில் அவை கிளை விரிக்கும்.பிரச்சினைகளும் மன அழுத்தமும் முதுகு முறிக்கும் நேரத்தில் தான் எழுத்து வடிகாலாகிறது;தரமாய் எழுத முடிகிறது என்று கூறும் பெண்கள் அதிஷ்டசாலிகள்,

ஓய்வு நேரம் தானாக அமைவதில்லை.அதை நாம் தான் அமைத்துக்கொள்ள வேண்டும்.வீட்டிலும் வெளியிலும் எமது நேரத்தை இலக்குடன் திட்டமிட்டுக்கொள்வது பிரத்தியேகமாக ஒவ்வொரு பெண்ணினதும் செயற்றிரனிலும் குடும்பத்தின் ஒத்துழைப்பிலும் தங்கியுள்ளது.

சமூகத்தின் எதிர்பார்ப்புக்களும் அழுத்தங்களும்

சமூகத்தின் எதிர்பார்ப்புக்களும் அழுத்தங்களும் அச்சு ஊடகங்களில் பெண்களின் பங்களிப்பின் மீது தாக்கம் செலுத்தும் இன்னோர் அம்சமாகும்.உலகில் அதிகம் பிழையாகப் புரியப்பட்ட மார்க்கம் இஸ்லாம் என்கிறார் ஓர் அறிஞர்.இஸ்லாத்தைப்பற்றி பிறமதத்தவர்கள் புரிவது எப்படிப்போனாலும் இஸ்லாத்தில் பெண்களின் நிலைப்பாடு பற்றி முஸ்லிம்கள் பலருக்கே இன்னும் தெளிவில்லை என்பது துல்லியமான உண்மை.திருமணம் என்ற சந்தையை நோக்கி வளர்க்கப்படும் செம்மறியாட்டு மந்தையா பெண்கள்? எழுதிக்கொண்டிருந்த அல்லது சமூகப்பணியாற்றிக் கொண்டிருந்த பல பெண்களின் முகவரிகள் திருமணத்தின் பின் காணாமல் போய்விடுகின்றன.சரியாக இருந்தால் திருமணத்தின் பின்னர் பெண்களின் பங்களிப்பு இன்னும் அதிகரித்திருக்க வேண்டும்.பெண்களால் சமுதாய எழுச்சி ஏற்பட வேண்டும் என்று மேடை அதிரப்பேசும் விரல் வலிக்க எழுதும் பலர் சொந்த வாழ்வில் தன் தாயை,துணைவியை,சகோதரியை அல்லது மகளை நாலுசுவர்களுக்குள் சொன்னதை செய்து கொண்டு அடங்கி ? இருப்பதையே விரும்புகின்றனர் என்பது தித்திக்காத போதும் சத்தியம்.

கொள்கையிலும் அடிப்படை மனித உரிமைகளைப் பொறுத்தவரை இஸ்லாம் ஆணுக்கும் பெண்ணுக்கும் எந்த வித்தியாசத்தையும் ஏற்படுத்தவில்லை.

''ஆணோ, பெண்ணோ நம்பிக்கை கொண்டு நல்லறம் செய்தால் அவரை மகிழ்ச்சியான வாழ்க்கை வாழச் செய்வோம். அவர்கள் செய்து கொண்டிருந்த நல்லவற்றின் காரணமாக அவர்களின் கூலியை அவர்களுக்கு வழங்குவோம்''

(அல்குர்ஆன் 016:097).

''ஒவ்வொரு மனிதனும் தான் செய்தவற்றுக்குப் பிணையாக்கப்பட்டுள்ளான்'' (அல்குர்ஆன் 074:038).

.ஒரு பெண் வீட்டு வேலையை தரக்குறைவானதாகவோ அல்லது இழிவானதாகவோ கருத வேண்டும் என்று தப்பர்த்தம் கொள்தல் அல்ல அவளது திறமைக்கும்,தாகத்திற்கும் ஏற்றதான களம் அமைத்துக் கொடுத்தலும் அவளது சமுதாயப்பங்களிப்பை சரியாக பயன்படுத்திக் கொள்வதும் சமூகத்தின் கடமையாகும்.யாருக்கோ வந்த விருந்து என்று வாளாவிருக்காது பெண்கள் தமது பெறுமதியையும் தனித்துவத்தையும் உணர்வதோடு தம் குடும்பத்தினருக்கும் அதனை உணர்த்த முயற்சிக்க வேண்டும்.

சரியான பயிற்றுவிப்பும் வழிநடாத்தலும்

சரியான பயிற்றுவிப்பும் வழிநடாத்தலும் அச்சு ஊடகங்களில் பெண்களின் பங்களிப்பை காத்திரப்படுத்தும்.

இன்று எமது அச்சு ஊடகங்களுக்கு பெண்களிடமிருந்து வரும் ஆக்கங்களைப்பார்த்தால் கண்ணுக்குள் ஊசி குத்தியதாய் வலிக்கும்.

தேய்ந்து போன தலைப்புக்கள் அல்லது எங்கோ தொடங்கி எங்கோ முடிகின்ற கட்டுரைகளுக்கு மத்தியில் சில நட்சத்திரங்களும் கண்சிமிட்டாமலில்லை.இலங்கையில் எங்கு முறையாக இதழியல் பற்றி கற்கலாம் அல்லது எழுத்தை செம்மைப்படுத்தி தரமாக்குவதற்கான பயிற்சி முகாம்கள் எங்கு நடைபெறுகின்றன என்பது பற்றியெல்லாம் எழுதுகின்ற பல பெண்கள் அலட்டிக்கொள்வதில்லை.இதனால் தான் மழையில் முளைத்த காளானாய் இஸ்லாமிய சாயம் பூசிய தரமற்ற புத்தகங்கள் இப்போதெல்லாம் நிறையவே வெளிவருகின்றன.

தனிப்பட்ட ஆர்வமும் தேடல் இன்மையும்

முஸ்லிம் பெண்களின் தேடல் கிணற்றில் நீர் சேந்துவதோடு நின்று விட்டிருக்கிறது;சமுத்திரத்தைக் கண்டதுமில்லை;அறிந்து கொள்வதற்கான ஆர்வமும் இல்லை.

தேடல் என்பது இரண்டு சிறுகதைகளை வாசித்து விட்டு மூன்றாவதாக ஒன்றை எழுதுவதல்ல.பல வித்தியாசமான எழுத்தாளர்களின் ஆக்கங்களை விமரிசனரீதியாக வாசிப்பதோடு அவர்கள் கையாண்டுள்ள உத்திகளை அறிந்து கொள்வது,உள்ளடக்கத்தினை இறுக்கமாக்குவதோடு அது தான் விரும்பிய கருத்தை வெளிப்படுத்துகிறதா என்பதை மீள உறுதி செய்து கொள்வது என தேடல் நீளும்.ஒவ்வொரு நல்ல ஆக்கத்தின் பின்னும் நிச்சயமாக கடும் உழைப்பும்,முடிவறாத தேடலும் ஒளிந்திருக்கும்.

சில குறிப்பிட்ட பத்திரிகைகள்,சஞ்சிகைகள்,அதிலும் குறிப்பாக அழகுக்குறிப்பும் சமையல் செய்முறைகளும் என்றளவாக தேடல் சுருங்கும் போது அதன் வெளிப்பாட்டை எழுத்து தெளிவாய் காட்டும்.

வேர்கள் நீரை நாடித் தாகிக்க வேண்டும்;

நீரேந்து பிரதேசங்கள் நோக்கி நெளிந்தோட வேண்டும்.

தேடலும் அவ்வாறு தான்.

சில தீர்வுகள் அல்லது தீர்மானங்கள்

அச்சு ஊடகங்களில் முஸ்லிம் பெண்களின் பங்களிப்பு இன்னும் பலமடங்காக அதிகரிப்பதோடு இதழியற்துறையில் தேர்ச்சி பெற்ற முஸ்லிம்களின் பெண்களின் இடைவெளி நிரப்பப்பட வேண்டும்.

· வாசிப்பை ஒரு பழக்கமாக மாற்றிக்கொள்ள ஒர் மாதத்தினுள் குறைந்தது இரு சஞ்சிகைகளையாவது முதல் பக்கம் தொட்டு கடைசிப்பக்கம் வரை வாசிப்பது என்று முடிவு செய்து கொள்ளுங்கள்.இது அல்ஹஸனாத்,மீள்பார்வை,எங்கள் தேசம்,உண்மை உதயம்,ஆனந்த விகடன்,குமுதம் என எதுவாகவும் இருக்கலாம்.

· வாராந்தம் ஒரு ஞாயிறு செய்தித்தாளை முழுமையாக வாசிப்பது.தினகரன்,வீரகேசரி,மவ்பிம அல்லது சன்டே டைம்ஸ் ஆகிய எம்மொழிப்பத்திரிகையாயினும் சரி,பூரணமாக வாசிக்க தீர்மானித்துக்கொள்ளுங்கள்.

· ஒரு வருட காலம் இவ்வாறு வாசித்துச் செல்லும் போது குறித்த சஞ்சிகை அல்லது பத்திரிகையில் உங்களுக்கு மிக விருப்பமான பகுதி எது என்பதைக்கண்டறிந்து கொள்ளுங்கள். அது இலக்கியம்,விளையாட்டு,அரசியல்,ஆன்மீகம்,அழகுக்கலை,சுயவிருத்தி என எதுவாகவும் இருக்கலாம்.அந்தக் குறிப்பிட்ட பகுதியை உங்கள் விஷேட துறையாக மாற்றுங்கள்.

· நீங்கள் தெரிவு செய்த விஷேட துறை சம்பந்தமான மேலதிக வாசிப்பையும் தேடலையும் மேற்கொள்ளுங்கள்.நூலகங்கள்,இணையம் மட்டுமல்லாது குறித்த துறைசார் நிபுணர்களையும் நீங்கள் பயன்படுத்தி அடையாளங் கண்ட துறையில் அபிவிருத்தி அடைய வேண்டும்.

· பல்கலைக்கழகங்கள் மற்றும் ஊடக நிலையங்களில் இடம்பெறும் இதழியல் நிகழ்ச்சித் திட்டங்களில் பயிற்சிகளைப் பெற்றுக்கொள்வது நிறைந்த பயனளிக்கும் விடயமாகும்.இலங்கையைப் பொறுத்த வரை பல்வேறு கல்வி நிலையங்கள் ஊடகம் சார் பாடநெறிகளை நடாத்தி வருகின்றன.

அவற்றுள் சில

இலங்கை இதழியல் கல்லூரி http://www.slcj.lk/

ú ஒரு வருட முழுநேர இதழியல் டிப்ளோமா பாடநெறி

ú சேவை இடை பயிற்சிப்பட்டறைகள்- இவை சில நாட்கள் அல்லது ஒரு வாரகாலப் பயிற்சிகள் ஆகும்.இவை ஏதாவது ஊடகமொன்றில் பணியாற்றும் ஊடகவியலாளர்களுக்கு இலவசமாகும்.

கொழும்பு பல்கலைக்கழகம்

ú ஒரு வருட கால பகுதி நேர சர்வதேச தரம் வாய்ந்த இதழியல் டிப்ளோமா பாடநெறி

களனிப்பல்கலைக்கழகம்

ú இதழியல் பட்டப்படிப்பு 4 வருட முழுநேரப்பாடநெறி அல்லது

ú இதழியல் வெளிவாரி பட்டப்படிப்பு (சிங்கள மொழி மூலம்

ú மாத்திரம்)

மதுரைக்காமராசர் பல்கலைக்கழகம்-தூரக்கற்கை நிலையம்

§ வெகுஜனத் தொடர்பாடலும் இதழியலும் டிப்ளோமா பாடநெறி ஒரு வருடம்

§ வெகுஜனத் தொடர்பாடலும் இதழியலும் பட்டப்படிப்பு

-நான்கு வருடங்கள்.

§ வெகுஜனத் தொடர்பாடலும் இதழியலும் பட்டமேற்படிப்பு – இரு வருடங்கள்

இதற்கு மேலதிகமான இன்னும் பல பாடநெறிகள் இருக்கின்றன.அவை பற்றி இணையத்தினூடாகவும்ஊடகத்துறை சார்ந்தோரூடாகவும் தேடி அறிந்து கொள்ள முடியும்.

· ஊடகமொன்றுடன்,அதிலும் குறிப்பாக இஸ்லாமிய ஊடகம் ஒன்றுடன் தொடர்பு படுங்கள்.அதற்கான உங்கள் பங்களிப்பைத் தேவையின் அடிப்படையில் தொடர்ந்தேர்ச்சியாக வழங்குங்கள்.

· உபரித்தகவல்

உங்களுடைய திறமையையும் அறிவையும் பகிர்ந்து கொள்வதற்கான ஆர்வமுண்டெனில் இந்த கூகிள் குழுமத்தில் இணைந்து கொள்ளலாம்.

இணைய மடலாடல் முகவரி mediawomen2020@googlemail.com

இணைய குழும முகவரி media-women@googlegroups.com

· இன்னும் 5 வருடங்களாவது இந்தக்கட்டுரையை மாற்றி எழுத உதவி செய்யுங்கள்.

நீண்டு நெடித்துச்செல்லும் இந்த இலட்சியப்பாதையில் சத்தியத்தை வாக்கிலும் நோக்கிலும் சுமந்த பெண்கள் பார்வையாளர்கள் அல்ல,பங்காளர்கள் என்பதை மீண்டுமொரு முறை நிரூபிக்க நீங்கள் தயாராகி விட்டீர்களா?

வேர்களை வாசிக்கும் விழுதுகள்

2009-08-20T11:07:00.000-07:00

வேர்களை வாசிக்கும் விழுதுகள்-நூல் அறிமுகம்

சமீலா யூசுப் அலி

நூலின் பெயர்:வேர்களை வாசிக்கும் விழுதுகள்
ஆசிரியர்:ஹுமைரா மெளதூதி.
மொழிபெயர்ப்பு: அப்ஆன் அப்துல் ஹலீம்
வெளியீடு: அல்ஹஸனாத் வெளியீட்டகம்,கொழும்பு.
அச்சு:ஐ.பீ சீ பதிப்பகம் மாவனல்லை
அட்டை வடிவமைப்பு:கிண்ணியா அனீஸ்
விலை:170
பக்கங்கள்:148
முதற்பதிப்பு:ஜூலை 2009

உன் முன்னே
அடர்ந்திருக்கும் இருளை அகற்று!
கிழக்கிலிருந்து தோன்றும் சூரியனைப் போல் எழு!
நேற்றும் இன்றும்
கதையாக கழிந்து விட்டன!
நாளை உதயமாவதை எதிர்பார்த்திரு!
அல்லாமா இக்பால்

ஒரு சம்பிரதாயமான நூல் அறிமுகம் செய்து விட்டுப்போவதற்கு எந்த வகையிலும் தகுதி இல்லாத நூல் இது.
இந்த நூலை நான் வாசிக்கவேயில்லை;வாழ்ந்தேன்.

அந்தக் கணங்களில் நான் அனுபவித்த சத்தியத்தகிப்பின் சில துளிகளை இங்கு பதிவு செய்கிறேன்.
பெறுமதியும்,கனதியும் இலக்கியச்சுவையும் வாய்ந்த நூற்களை காலம் அடிக்கடி பிரசவித்துவருவதை மறுப்பதற்கில்லை.எனினும் உள்ளிழுக்கும் சுவாசக்காற்றையே சில நிமிடங்கள் நிறுத்தி,நாம் வாழ்ந்த வாழ்க்கையின் கனதியை எண்ணத்தராசில் நிறுக்கச்செய்யும் புத்தகங்கள் மிக மிக அரிதாகவே வெளிவருகின்றன.
கடந்த சில வருடங்களில் நான் வாசித்துக்குவித்த நூற்களின் எந்தப்பட்டியலிலும் சேராத நூல் ‘வேர்களை வாசிக்கும் விழுதுகள்’.சத்தியமாய்ச் சொல்வதாயின் அது உள்ளத்தில் ஏற்படுத்திய அதிர்வலைகளை பட்டியலிலுள்ள வேறெந்த புத்தகமும் ஏற்படுத்தவில்லை.

மெளலானா அபுல் அஃலா மெளதூதி.
சத்தியத்தின் சுவையை உணர்ந்த கொள்கைவாதி.
எந்த விலங்குகளாலும் பூட்டி வைக்க முடியாத கட்டற்ற காற்று,
வரண்டிருந்த நெஞ்சக்காடுகளில் தூய இஸ்லாத்தின் விதை தூவியதற்காய் ,தூக்குக்கயிற்றைக் கண்டு வந்தவர்.
அவரது’குத்பாப் பேருரைகள்’பலரை இஸ்லாத்துக்குள் இழுத்து வந்தது.
மெளலானா சொன்னார்.எழுதினார்.

அதை செய்தும் காட்டினார்.
கற்பாறை நெஞ்சுகளில் நீர் கசிய வைக்கும் எழுத்துக்கள் அவருடையவை.
ஹுமைரா மெளதூதி-

மெளலானாவின் குடும்பநந்தவனத்தில் முகிழ்த்த முதல் மலர்.
ஓர் இலட்சியத்தந்தையையும் ஓர் இலட்சியத்தாயையும் மட்டுமல்லாது ஒரு முன்மாதிரிப்பாட்டியையும் பெற்றது

அல்லாஹ் ஹுமைராவுக்கு வழங்கிய பேறு.

கடந்தாண்டு ஓகஸ்ட் தொட்டு டிஸம்பர் வரை ‘அல்முஜ்தமஃ’இதழில் சகோதரி ஹுமைரா தன் குடும்பத்தின் இலட்சியமும் சந்தோசமும் கலந்த வாழ்வினை உயிர்ப்போடு பதிவு செய்துள்ளார்.

அந்தப்பதிவுகளின் வசனங்களை மட்டுமல்லாது அதன் பின்னால் துடிக்கின்ற ஹுமைராவின் உள்ளத்தையும்

மொழிபெயர்க்க சகோதரர் அப்ஆன் முயற்சி செய்துள்ளார்.

தெள்ளிய தமிழில்,இடையறாது ஒலித்தோடும் காட்டாறு போன்றதாய தடங்களற்ற நடையில் அப்ஆனின் பேனா பயணப்பட்டிருக்கிறது.
சகோதரர் அப்ஆன் அப்துல் ஹலீம் ஜாமிஆ நளீமியா வளாகவாசி.

ஜம்மியத்தலபாவின் பாசறையில் வளர்ந்தவர்.

காற்றுக்குப் பதிலாக இகாமதுத்தீனை சுவாசிக்கும் குடும்பத்தின் வார்ப்பு.
அல்ஹம்துலில்லாஹ்.

மீன் குஞ்சுக்கு நீந்தக்கற்றுகொடுக்க வேண்டியதில்லை என்பது மீண்டுமொருமுறை நிரூபணமாகி இருக்கிறது.

‘வேர்களை வாசிக்கும் விழுதுகள்’எனக்குக் கிடைத்த போது சூரியன் தூங்கப்போய் விட்ட முன்னிரவு.

மீண்டும் சூரியன் துயில் கலைந்து எழுமுன் நூலின் வரிகளில் தீயை வாசிக்கும் மெழுகுதிரியாய் கரைந்து போனேன்.
அல்லாஹ்வின் அமானிதம் சுமக்க அச்சப்பட்ட மலைகள் போன்றே நூலில் கனதி தாங்காது உள்ளம் எரிமலை சுமந்தது.

நூலின் இறுதியில் பல நூற்றாண்டுகள் முதிர்ந்த பெருமூச்சு புறப்பட்டது.
’அல்ஹம்துலில்லாஹ்’வாய்விட்டுச்சொன்னேன்.

பெருமரம் சுமந்த ஜமா அத்தின் பாசறைக்குள் என் புலன் திறந்த கணங்களுக்காய் பெருமிதப்பட்டேன்.
சுட்டெரிக்கும் தீத்துணுக்கொன்றின் தகிப்பையும்

தோல் தாண்டி எலும்பு வருடும் பனிக்குளிர் இரவொன்றின் நெகிழ்வையும் மாறி மாறி அனுபவிக்கச்செய்த ஆக்கம் இது.

நூலின் இடுக்குகளில் கசியும் குருதித்துளிகள் ஒர் இலட்சியவாதியின் நெஞ்சில் உறுதியின் மழையை வர்ஷிக்கச்செய்கிறன..

மெளலானா மெளதூதி ஒரு ஜமா அத்துக்குள் சொந்தமானவர் அல்ல..

அவரை ஓரக்கண் கொண்டுபார்க்கும் கண்களுக்கு நேர்ப்பார்வை பார்க்கச் சொல்லிக்கொடுக்கிறது ‘வேர்களை வாசிக்கும் விழுதுகள்’
திருமணம் பலரது இலட்சிய வாழ்வில் தடைக்கல்லாகி விடுகிறது.

உலகமும் அது சார்ந்த ஆசைகளுமாய் காற்றில் எரிந்த கற்பூரமாய் சராசரி மனிதனாய் மரணித்து விடும் அவலம் நேர்ந்து விடுகிறது.

மெளலானாவின் மனைவி வெறும் மனையை ஆளும் தலைவியாக மட்டும் இல்லாது ஒரு இலட்சியக்குடும்பத்தின் அடித்தளமாய் அமைந்தார்.

இஸ்லாமிய இயக்க விருட்சத்தின் ஆணிவேராய் உழைத்தார்.

செல்வம் கொழிக்கும் மாளிகை வாழ்விலிருந்து தன் துணைவர் தேர்ந்தெடுத்த வலி மிகுந்த பாதையில் அவரது பயணம் தொடர்ந்தது.

‘அல்லாஹுத்த ஆலா எனக்களித்த இந்த வாழ்க்கையில் அவனது மார்க்கத்தை வாழ வைப்பதைத் தவிர எனக்கு வேறு இலக்குகள் ஏதும் கிடையாது.

அத்தகையதொரு பாதையைத்தான் நான் தெரிவு செய்திருக்கிறேன்.அதில் தொடர்ந்தும் பயணிப்பதா இல்லையா என்று மீள் பரிசீலனை செய்யவேண்டிய தேவையொன்று கிடையாது.’என்ற மெளலானாவின் வார்த்தைகளுக்குப் பதிலாக அவரது வருங்காலத்துணைவியின் தந்தை ஒரு மடல் எழுதுகிறார்,
‘நீங்கள் பெரும் கோட்டை கொத்தளங்களில் வாழ்ந்தாலும் சரி வீதியோர முகாம்களில் வாழ்ந்தாலும் சரி எங்களது மகள் எப்போதும் உங்களோடிருப்பாள்.நீங்கள் எங்கு சென்றாலும் வாழ்வின் கஷ்டங்களையும் துன்பங்களையும் அவள் உங்களோடு பகிர்ந்து கொள்வாள்”

ஆம்.தன் வாழ்வின் அந்திப்பொழுது வரை மெளலானாவின் அன்பு மனைவி அந்தச்சொற்களின் செயல்வடிவ உதாரணமாய்த் தான் இருந்தார்.

இப்படியாய் ஏராளமான சம்பவங்களும் அவை சார்ந்த உணர்வுகளுமாய் நூல் முழுக்க வித்தியாசமான ஒரு மணம் விரவிக்கிடக்கிறது.
நூலை வாசித்து முடித்த பின்னர் வரலாற்றை திருத்தி எழுதிய ஒரு அறிஞரின் ஆளுகையில், இதயத்தில் இறைவனைச் சுமந்த ஓர் இலட்சியவாதியின் குடும்பத்தில் ஓர் அங்கமாய் சில ஆண்டுகள் வசித்த உணர்வை ஆத்மார்த்தமாய் அனுபவிக்க முடிந்தது.

அல்ஹம்துலில்லாஹ்.
முதல் வரியிலிருந்து இறுதி வரி வரை உள்ளத்தை இழுத்துப்பிடித்து வைக்குமாய அதே கவர்ச்சி..

அதே தாளம் தப்பாத நடை.

இந்தப்புத்தகத்தைக் கையிலெடுக்கும் எவரும் முழுவதும் வாசிக்காமல் கீழே வைக்க மாட்டார்கள் என்றொரு உத்தரவாதத்தை தைரியமாகக் கூறலாம்.
‘பிறப்பும் பின்னணியும்’ என்பதிலிருந்து தொடங்கி ‘அமானிதத்திலிருந்து தோளும் கவலைகளிருந்து உள்ளமும் விடுதலையடைகின்றன’என்பது வரை ,15 சிந்திக்க வைக்கும் தலைப்புக்கள்.
நூல் அணிந்துரையில் இலங்கை ஜமாஅததே இஸ்லாமியின் அமீரும் நூல் பெயர்ப்பாளரின் தந்தையுமான உஸ்தாத ரஷீத் ஹஜ்ஜுல்
அ க்பர் அவர்கள் “மெளலானா மெளதூதி அவர்களின் தஜ்தீத் பணி,இயக்க வாழ்வுக்கான போராட்டங்கள் முதல் தூக்குமேடை வரை வெளியுலகம் கண்ட வரலாறு ஒன்று வெளிப்படையாக இருக்க ,அந்த வெளிப்படைகளிலிருந்து தூரமாகி வேறுபட்டு நிற்காத அவரது அற்புதமான அந்தரங்க வாழ்க்கையை வெளிச்சம் போட்டுக்காட்டுகிறார் அன்னாரின் மூத்த மகள் ஹுமைரா மெளதூதி’என்று உள்ளம் திறக்கிறார்.

மதிப்புரை வழங்கி இருப்பவர் ஜாமி ஆ நளீமியாவின் பிரதிப்பணிப்பாளார் அஷ்ஷெய்க் ஏ.ஸீ அகார் முஹம்மத் அவர்கள்.

’ஒரு கொள்கைவாதி.சமூக சீர்திருத்தவாதி,தாஇ,ஓர் உண்மம இறை அடியான் தன் வாழ்வை எவ்வாறு அமைத்துக்கொள்வார்.

அவரது தனிப்பட்ட வாழ்வு,குடும்ப வாழ்வு,சமூக உறவுகள் எவ்வாறு அமையும் என்பன பற்றியெல்லாம் அரிய விரும்பும் ஒருவர் இந்நூலை அவசியம் படிக்க வேண்டும்.

இந்நூலின் பல பக்கங்கள் என் கண்களை கசியவைத்தன;இன்னும் சில பக்கங்கள் எனக்குள் குற்ற உணர்வை ஏற்படுத்தின,

மொத்தத்தில் இவ்வாக்கம் என்னை,எனது வாழ்வை ஒருமுறை மறு பரிசீலனைக்கு உட்படுத்த உதவியது என்ற உண்மையை என்னால் இங்கு கூறாமலிருக்க முடியாது”என்ற
வரிகளைப்பார்க்கும் போது ,இந்தப்புத்தகம் அந்த வரிகளுக்கு முற்றிலும் தகுதியானது என்பதை சந்தேகமின்றி உணரலாம்.

மொழிபெயர்ப்பாளர் தன் முன்னுரையில்
“ஒருவரது வரலாற்றை யாரோ சொல்வதை ,எழுதுவதை விட
விட சொந்த மகள் அதனைச்சொல்வது,மெளதூதி என்ற மிகப்பெரும் ஆளுமையுடன் எம் உள்ளத்தை அப்படியே பிணைக்கச்செய்து விடுகிறது.”என்று தொடர்கிறார்.

‘வேர்களை வாசிக்கும் விழுதுகள்’தலைப்பைபோலவே உள்ளடக்கமும் அழகும் ஆழமும் நிரம்பியிருக்கிறது.
அட்டைப்படத்துக்கும் நூலுக்கும் இடையில் விருட்சத்துக்கும் விழுதுகளுக்குமிடையிலான தொடர்பினை ஒத்த ஒற்றுமையை உணரலாம்.

ஒவ்வொரு முஸ்லிமின் இதயத்திலும் திரும்பத் திரும்ப மீட்டப்பட வேண்டிய இந்த நூல் இஸ்லாத்தை உள்ளத்திலும் அதன் மூலம் இந்த உலகத்திலும் நிலைநாட்ட உழைக்கும் தாஈக்களின் கைந்நூலாகக் கொள்ளப்படக்கூடிய சகல தகுதிகளையும் கொண்டு விளங்குகின்றது.

நூலின் ஓரிடத்தில் சகோதரி ஹுமைரா இவ்வாறு விவரிக்கிறார்.
“தந்தை மரணிப்பதற்கு சில மாதங்களுக்கு முன்பு அரசியல் தலைவரொருவர் அவரைப்பார்த்துக் கிண்டலாக இப்படிக்கேட்டார்.”ஆயதுல்லாஹ் கொமைனி ஈரானில் ஒரு புரட்சியைத்தோற்றுவித்தார்.

ஆனால் உம்மால் பாகிஸ்தானில் ஒரு இஸ்லாமியப்புரட்சியைத்தோற்றுவிக்க முடியவில்லையே”அவரது கிண்டலான இந்தக்கேள்விக்கு தந்தை அமைதியாகவும் அறிவுபூர்வமாகவும் இப்படிப் பதிலளித்தார்.

”நான் ஒவ்வொரு நாளும் அல்லாஹ்வுக்காக செய்த பணிகளுக்குரிய கூலியைக் குறைவின்றித் தந்திருக்கிறான்.எனது பணியின் முடிவு எப்படியிருக்கும்;எந்த வடிவத்தில் வரும் என்பது எனக்குத்தெரியாது.

அல்லாஹ் தான் விரும்பியவர்களை விரும்பிய விதத்தில் விரும்பிய பணிகளுக்காகப் பயன்படுத்துவான்.எனது கடமை அந்தப்பணிகளை அல்லாஹ்வுக்காக செய்வது தான்.

அந்தப்பணியில் நான் எவ்வளவு தூரம் பயணிக்க வேண்டும் என்பது என்னுடைய கையிலில்லை.”

ஆம்.இருளின் பிடிக்குள் சிக்கியிருந்த சமூகத்தை மெளலானா அபுல் அஃலா மெளதூதி மாமனிதர் குர் ஆனிய சூரியன் கொண்டு மீட்டெடுத்தார்.

அவரது உடல் அழிந்தாலும்

அவரது உள்ளம் இன்னும் வாழ்கிறது

பல்லாயிரக்கணக்கான இளைஞர் யுவதிகளின்

கொள்கைப்பற்றிலும்

ஆன்ம வலிமையிலும்…..

‘வேர்களை வாசிக்கும் விழுதுகள்’நூலை மூட மனமின்றி மூடுகிறேன்.
ஆம்

இந்தப்புத்தகம் வாசிப்பிற்குரியதல்ல…
வாழ்தலுக்குரியது

நெஞ்சில் நிற்கின்ற சுவை..............1

2009-08-12T01:49:00.000-07:00

கடந்த வாரம் ஒரு ஓய்வான ஞாயிற்றுக்கிழமை.
வீட்டில் யாரும் இல்லை.
வழமையான பரபரப்புக்களின்றி மெதுவாக சமைப்போம் என்ற எண்ணத்துடன் அம்பையின்'காட்டில் ஒரு மான்' நூலை ஏழாவது தடவையாக மேய்ந்து கொண்டிருந்தேன்.

வாசலடியில் சின்னதாய் சந்தடி.
பெரியம்மா அவரது மகள்களிருவர் சாச்சியின் மகள் என வரவேற்பறை நாற்காலிகள் ஆக்கிரமிப்புக்குள்ளாகின.
கொஞ்சம் கதை,நிறைய சிரிப்பு இவற்றோடு சூடான தேநீர்.
மதியம் 12 மணியும் தாண்டி விட்டது.
பெரியம்மா போக வேண்டும் என்று எழுந்து விட்டார்.

"கொஞ்சம் நில்லுங்க..அவசரமா சமையல் செய்கிறேன்.ஆனா ஒன்று கருவாடும் போஞ்சியும் தான் பிரிஜ்ல இருக்கு...பரவாயில்லையா..."தயக்கத்துடன் தான் கேட்டேன்.

'ஓ அதுக்கென்ன.....நல்லம் தானே"
பின்னர் ஒருவர் தேங்காய் துருவ இன்னொருவர் வெங்காயம் நறுக்க் எங்கள் சின்னச் சமையலறை களைகட்டியது.

கருவாடு ஆக்குவதில் எனக்கு பெரிய அனுபவம் கிடையாது.கருவாட்டை சின்னதாக அரிந்து பொரிப்பேன்.அல்லது எண்ணெய்யில் கிழங்கும் தக்காளியும் சேர்த்து வதக்கி வைப்பேன்.

மாலைதீவிற்கு சென்ற குடும்ப நண்பரொருவர் வரும் போது கூடவே வாங்கி வந்த கருவாடு இருந்தது.பெரியம்மா கருவாட்டை முகர்ந்து பார்த்து விட்டு புதிதாய் இருப்பதாய் சொன்னார்.

காலையில் சமைத்த பருப்புக்கு இரண்டு உருளைக்கிழங்குகளை வெட்டிப் போட்டு ஆணத்தை கூட்டினேன்.ரைஸ் குக்கரில் சோறு 'சொத சொத'வென்று கொதித்துக்கொண்டிருந்தது.
போஞ்சிக்காயை முழுவதுமாக வேக விடாமல் லேசான பச்சை நிறமாக இருக்கும் போதே தேங்காய்பால் ஊற்றி இறக்கினோம்.
கருவாட்டை ஆக்கும் பொறுப்பை பெரியம்மாவிடமே ஒப்படைத்தேன்.
பெரியம்மாவின் சமையல் சுவையாக இருக்கும்.
கருவாட்டை கொதிக்கும் நீரில் கழுவி தோல் அகற்றி துண்டுகளாக்கினார்.
தக்காளி.வெங்காயம், பச்சைமிள்காய், கறிவேப்பிலை, கொஞ்சம் புளி, மஞ்சள் தூளும் மிளகாய்ப்பொடியும் கலந்து பாலில் வேக வைத்து கெட்டியான தேங்காய்ப்பால் ஊற்றினார்.
'
"என்ன மணம்...."கருவாட்டுக்குழம்பின் வாசம் நாசி துளைத்து வயிற்றில் அடங்கியிருந்த பசியைக் கிளறிவிட்டது.

நிலத்தில் பெரியதொரு விரிப்பை விரித்து எல்லோரும் அமர்ந்தோம்.
தட்டில் சோற்றை இட்டு கருவாட்டுக்குழம்பை ஊற்றிப்பிசைந்து வாயில் இட்டுக்கொண்ட போது ....
........................................................
சொல்ல வார்த்தைகள் இல்லை.
அப்படி ஒரு சுவை.

சந்தோஷமான மனிதர்களின் 100 இரகசியங்கள் 2

2009-07-16T07:25:00.000-07:00

சந்தோஷத்திற்கான தந்திரோபாயம் ஒன்றை மேற்கொள்ளுங்கள்.

பிறப்பிலேயே சிலர் மகிழ்ச்சியானவர்களாகவும் சிலர் மகிழ்ச்சியற்றவர்களாகவும் பிறந்து விடுவதாகத் தான் நாம் கருதிக்கொண்டிருக்கிறோம்.ஆனால் இவ்விரு வகை மனிதர்களும் அவர்களுக்குரிய மனோநிலைகளைத் தாமே உருவாக்கி அதனை நீரூற்றி வளர்க்கின்றனர்.

சந்தோஷமான மனிதர்கள் தங்களை மகிழ்ச்சியாக வைத்திருக்கின்றனர்.சந்தோஷமற்ற மனிதர்கள் தமக்குக் கவலை தரும் விடயங்களையே தொடர்ந்து செய்கின்றனர்.

ஆரோக்கியமான வியாபாரத்தின் முதல் அடையாளம் எது?ஆரோக்கியமான வியாபாரத்திட்டம்.
வியாபார ஆலோசனை நிறுவனங்களின் வாதம் இது.
ஒவ்வொரு வியாபாரமும் முதலில் அதன் நோக்கத்தை தீர்மானிக்க வேண்டும்;அதன் பிறகு அந்த நோக்கத்தை அடைவதற்கான ஒரு திட்டத்தை வரைய வேண்டும் என்று அவை கருதுகின்றன.
இதே நகர்வை மனிதர்களும் மேற்கொள்ளலாம்.உங்களுக்கு என்ன தேவை என்பதை உறுதியாக் அறிந்து கொள்ளுங்கள்.பின்னர் அதை அடைவதற்க்கான தந்திரோபாயத்தை பாவியுங்கள்.

ஆச்சரியபூர்வமாக சிறுவர்கள் இந்த விடயத்தில் எங்களை விட கெட்டிகாரர்கள்.குழந்தைகளுக்கு தெரியும் ஒரு ஐஸ்கிரீம் கிடைப்பதற்கு எந்தளவு அடம்பிடிக்க வேண்டும் என்பது.அதிகம் சப்தம் போடுவது எந்த நேரத்தில் பெற்றோரை அதிருப்தி அடையச் செய்யும் என்பதையும் அவர்கள் உணர்ந்தே உள்ளனர்.

குழந்தைகள், வாழ்க்கையில் சில் விதிகள் மற்றும் எதிர்வுக்கூறக்கோடிய நடத்தைக்கோலங்கள் இருப்பதை உணர்ந்திருக்கின்றனர்.அவர்களுக்குத் தேவையானவற்றைப் பெற்றுக்கொள்ள அவசியமான வழிமுறைகளையும் கையாள்கின்றனர்.

சந்தோஷமான வாழ்க்கை வாழ்வது என்பது ஒரு குழந்தை ஐஸ்கிரீம் கோர்னை பெற்றுக்கொள்வதற்காக செய்யும் முயற்சியை ஒத்தது.உங்களுக்கு என்ன தேவை என்பதை அறிந்துகொள்ளுங்கள்!
அதைப்பெற்றுக்கொள்வதற்கான பொருத்தமான உபாயத்தைப் பயன்படுத்துங்கள்!
உங்களை எது சந்தோஷப்படுத்துகிறது எது கவலைப்படுத்துகிறது என்பதைப்பற்றி சிந்தியுங்கள்.அதனை வைத்து நீங்கள் விரும்பியதை அடைவதற்கு முயற்சியுங்கள்.

......................................................................................................................................................
மகிழ்ச்சியான மனிதர்கள் ஒன்றன் பின் ஒன்றாக வெற்றிகளை அனுபவிப்பவர்கள் அல்ல;துக்கமான மனிதர்கள் தொடர்ச்சியாகத் தோல்விகளை அனுபவித்தவர்களும் அல்ல.ஆய்வுகளின் படி இந்த இருவகையான மனிதர்களும் கிட்டத்தட்ட ஒரே விதமான வாழ்க்கை அனுபவங்களையே கொண்டிருப்பது தெரிய வந்தது.சராசரி துக்கமான நபரொருவர் மற்றவர்களை விட இருமடங்கு அல்லது அதற்கும் அதிகமான நேரத்தை தன் வாழ்க்கையின் வெறுப்பான நிகழ்வுகளைச் சிந்திப்பதில் செலவிடுகிறான்.
அதே வேளை மகிழ்ச்சியான மனிதர்கள் தங்கள் தனிப்பட்ட வாழ்க்கைய மலர்ச்சிக்குள்ளாக்கும் தகவல்களை தேடுவதிலும் அதில் மகிழ்ச்சியடவதிலும் தமது காலத்தைச்செலவிடுகின்றனர்.

......................................................................................................................................................................

இன்றைய மின்னல் - 5

2009-07-16T00:40:00.000-07:00

எல்லாவற்றிலிருந்தும் ஏதாவதொன்றையும் ,ஏதாவதொன்றிலிருந்து எல்லாவற்றையும் கற்றுக்கொள்ளுங்கள்.

Thomas H. Huxley

இன்றைய மின்னல் - 4

2009-07-15T00:23:00.000-07:00

உங்களிடம் உள்ளது முழுமையும் எதிராளியிடம் சொல்லிவிடாதீர்கள்.

உங்களைப்பற்றி சொல்லாத இரகசியங்களை எப்போதும் வைத்திருங்கள்

ஹயா

சந்தோஷமான மனிதர்களின் 100 இரகசியங்கள் 1

2009-07-14T22:15:00.000-07:00

இங்கு கூறப்படும் 100 இரகசியங்களும் ,சந்தோசம் மற்றும் திருப்தியான வாழ்வு பற்றி ஆராய்ந்த விஞ்ஞானிகளின் ஆய்வு முடிவுகளிலிருந்து பெறப்பட்டவையாகும்.ஒவ்வொரு தலைப்பு சம்பந்தமாகவும் ஒன்றுக்கு மேற்பட்ட ஆய்வாளர்களின் முடிவுகள் பெறப்பட்டுள்ளன.
டேவிட் நைவன் PHd

உங்கள் வாழ்க்கைக்கு ஒரு நோக்கமும் அர்த்தமும் உண்டு

இந்த உலகத்தின் இடைவெளியை நிரப்புவதற்காக அல்லது யாரோ ஒருவர் இயக்கும் திரைப்படத்தில் ஒரு பின்னணிப்பாத்திரத்தில் நடிப்பதற்காக இங்கு வரவில்லை.

நீங்கள் பிறக்கவில்லை என்றால் இப்போது இருக்கும் உலகம் அப்படியே இருந்திருக்குமா?
நீங்கள் இல்லாவிட்டால் நீங்கள் சென்ற ஒவ்வொரு இடமும் வித்தியாசமாக இருந்திருக்கும் நீங்கள் சந்தித்த ஒவ்வொரு நபரும் இப்போதிருப்பதை விட வித்தியாசமாக இருந்திருப்பார்கள்.

நாங்கள் எல்லோரும் ஒருவருக்கொருவர் தொடர்பு பட்டவர்கள்.எங்களைச் சூழ இருப்பவர்களின் தீர்மானங்களால் பாதிக்கப்படுகிறோம்,அவ்வளவு ஏன்? சூழ இருப்பது ஒன்றே போதும் எங்களது வாழ்வில் ஒரு தாக்கத்தை ஏற்படுத்த..

பீட்டர் பிலடெல்பியாவில் தொழில் புரியும் ஒரு வழக்குறைஞர்.
அவரது நாய் டகெட் திடீரென கடுமையாக சுகவீனமுறுகிறது.முதுகுத்தண்டில் ஏற்பட்ட ஒரு வகையான புற்று நோயால் கொஞ்சம் கொஞ்சமாக டகெட் இன் உடல் செயலிழந்து வருகிறது.எந்த மிருகவைத்தியராலும் அதனைக்குண்ப்படுத்த முடியவில்லை.எப்படியாவது டகெட் ஐக்குணப்படுத்த வேண்டும் என்ற தேடுதலில் சிக்கினார் ஒரு குழந்தை நரம்பியல் சத்திரசிகிச்சை நிபுணர்.டொக்டர் பீட்டருக்கு உதவிசெய்வதாக வாக்களிக்கிறார்.பதிலாக தான் வேலை பார்க்கும் குழந்தை வைத்தியசாலைக்கு கணிசமான தொகை நன்கொடை தரவேண்டும் என்ற நிபந்தனை விதிக்கிறார்.

ஜெரி நீலக்கண்களும் பொன்மஞ்சள் கேசமும் கொண்ட 5 வயதுச் சிறுவன்.அவன் பீட்டரையோ டகெட் ஐயோ எப்போதும் சந்தித்திருக்கவில்லை.ஜெரிக்கும் முதுகுத்தண்டில் புற்று ஏற்பட்டிருந்தது.பீட்டர் வழங்கிய நன்கொடை மூலம் ஜெரியின் சத்திரசிகிச்சை வெற்றிகரமாக முடிந்தது.அவனது புற்றுக்கட்டி அகற்றப்பட்டது.
டகெட் இனுடைய சத்திரசிகிச்சையும் வெற்றியடைந்தது.

.................................................................................................................................................................................
வயதான அமெரிக்கர்களில் மேற்கொள்ளப்பட்ட ஆய்வில் ஒரு மனிதன் தன் வாழ்க்கைக்கு ஒரு நோக்கம் இருப்பதாகக் கருதுகிறானா இல்லையா என்பது மகிழ்ச்சியை அளவிடும் சிறந்த குறிகாட்டியாக இருப்பதாகத் தெரிய வந்தது.
ஒரு தெளிவான வரையறுக்கப்பட்ட குறிக்கோள் இல்லாத 10 பேரில் 7 பேர் தம் வாழ்க்கை குழப்பமாக இருப்பதாகக் கருதினார்கள்.ஆனால் ஒரு குறிக்கோள் கொண்டிருந்த மனிதர்கள் 10 பேரில் 7 பேர் தம் வாழ்க்கை பற்றி திருப்தி அடைந்தவர்களாகக் காணப்பட்டனர்.
..............................................................................................................................................

இன்றைய மின்னல் - 3

2009-07-14T10:10:00.000-07:00

வாழ்க்கை ஒரு நிலைக்கண்ணாடி தான்,

நீங்கள் அங்கு காண விரும்புவதை

முதலில் உங்களுக்குள் காண வேண்டும்!

Wally 'Famous' Amos

இன்றைய மின்னல் - 2

2009-07-13T10:42:00.000-07:00

உங்கள் கனவுகளை நனவாக்கிடும் மிகச்சிறந்த வழி

விழித்தெழுவதாகும்.

Paul Valery

காதல் குளத்தில் முதலில் கல்லெறிவது யார்?

2009-07-13T10:38:00.000-07:00

காதல் குளத்தில் முதலில் கல்லெறிவது பெண்கள் தான்.

இங்கு காதல்,குளம்,கல்லெறிதல் பற்றியெல்லாம் வித்தியாசமான கருத்துக்கள்,பார்வைக்கோணங்கள் முன்வைக்கப்பட்டன.

கல்லெறிந்தால் குளம் கலங்கும்....
அலைகள் உருவாகும். எறிந்த கல் அப்படியே ஆழத்துக்குப் போய் விடுவதுமுண்டு.அலைகளை உருவாக்கி ரசிப்பதுமுண்டு. கற்கள் அளவு ,வீச்சு ,நிறை இவற்றினால் ஒன்றுக்கொன்று வேறுபடும்.
குளத்தின் கொள்ளளவுக்கும் அதிர்வுக்கும் இடையில் கூட தொடர்பிருக்கிறது. சரி சுற்றி வளைத்து மூக்கு தொடாமல் விடயத்துக்கு வருகிறேன்.

`பெண் நாணமுடையவள் அவள் எப்படி காதல் குளத்தில் கல்லெறிவாள்` என்று உள்ளத்தில் கேள்வி, தூண்டில் முள்ளாய் தைக்கிறதா? பெண்ணின் நாணமே ஒரு கல் தான் என்பது என் கருத்து. இறைவன் பெண்ணைப் படைக்கும் போதே இத்தகைய இனிய கற்களை வைத்திருக்கிறான்.

காதல் என்றால் கல்யாணத்துக்கு முன் வரும் ஒன்று என்றே கருதி வருகிறோம்.திருமணத்துக்குப் பின்னும் அன்பும் இனிமையும் தொடருமானால் அது தான் காதல். தன் இனிய துணைவனின் காதல் குளத்தில் பெண் எறியும் கற்களைப் பாருங்கள். துடுக்குத்தனம்,மென்மையான பேச்சு,ஊடல், அச்சம்,மடம்,நாணம்,பயிர்ப்பு இவையெல்லாம் என்ன?

இவற்றால் குளம் அதிராதா? பெண்ணின் கோபமும் அலட்சியமும் கூட ஆண் மனதில் அலையாக மாறி அலைக்களிப்பதை நாம் கண்டதில்லையா? ஒன்று...... பெண்கள் வேண்டுமென்றே கல்லெறிவதும் உண்டு. தங்களை அறியாமலே கல்லெறிவதும் நடக்கிறது. அவளே ஒரு கல்லாயும் சமயங்களில் இருப்பதுண்டு. பெண்ணின் பார்வை -அது தான் பாராங்கல். நிலவின் குளிர்ச்சியோடு வரும் அந்த பார்வை ஆண்மனதில் ஆயிரம் மின்னல் அதிர்வு தருகிறது. பார்வை தாழ்த்தி போனாலும் உடலின் அசைவுகளும் சங்கீதமான குரலும் காதல் குளத்தில் கல் வீசிச்செல்கின்றன.

பெண் தன் உடல் மறைத்து உடையணிந்தாலும், அந்நிய ஆணுக்கும் பெண்ணுக்கும் பார்வை தாழ்த்துமாறு சொல்லுகிறது இஸ்லாம்.இதன் பின்னணியில் பெண்,அவள் அமைதியாய் ஆர்ப்பாட்டமில்லாமல் இருந்தால் கூட அவளே ஒரு கல்லாய் இருக்கிறாளோ என்று எண்ணத்தோன்றுகிறது.எனவே கல்லெறிவது ஒன்றும் பெண்ணின் தவறு அல்ல அது அவளின் படைப்பின் நேர்த்தி.பெண் நினைத்தால் எறியும் கல்லின் வீச்சத்தைக் கொஞ்சம் குறைத்துக் கொள்ளலாம்...
அவ்வளவு தான்.

இங்கு நான் ஒன்றை சொல்லியே ஆக வேண்டும். நான் படித்தது புகழ் பெற்ற முஸ்லிம் கலவன் பாடசாலை ஒன்றில்.
வகுப்புக்கள் ஆண்கள்,பெண்களுக்கு வேறு வேறாக இருக்கும்.ஒவ்வொரு நாளும் சலவை செய்து அழுத்திய வெள்ளுடைகளோடு தான் மேல்வகுப்பு மாணவிகள் வருவார்கள்.ஆனால் ஆண்களோடு பேசுவது மிகக் குறைவாக அல்லது இல்லை எனலாம்.

அப்படியென்றால் ஏன் உடையிலும் நடையிலும் அத்தனை கரிசனை? கொழும்பில் சர்வதேச பெண்கள் பாடசாலை ஒன்றில் ஒரு வருடம் தங்கிப் படித்த போது விடை கிடைத்தது.
அங்கு நான் அழுத்திய சீருடையோடு அழகாக செல்வேன். ஆனால் என் சக தோழிகள் எந்தக் கவனமும் இல்லாமல் ஏனோ தானோ என்று வருவார்கள்.இத்தனைக்கும் அங்கு படிக்கும் மாணவிகளில் பெரும்பான்மையினர் நாகரீகம் துள்ளி விளையாடும் மேல்தட்டு வர்க்கத்தினர்.
வகுப்பு முடிந்ததும் யாரும் பொது பஸ்களில் செல்வதில்லை.சொந்த வாகனம் வரும்.அங்கு ஒரு ஆண் ஆசிரியரோ,கடைநிலை ஊழியரோ கூட இல்லை.எனவே அலங்காரத்தைப் பற்றி யாரும் அலட்டிக்கொள்வதுமில்லை.
இதே தோழிகள் பாடசாலைக்கு வெளியே அலங்காரமில்லாமல் செல்வதில்லை.பெண்கள் கவர்ச்சியான உடை அணிவதன் நோக்கங்களில் ஆண்களின் கவன ஈர்ப்பும் முக்கிய இடம் பெறுகிறது.எனவே இங்கு எது கல் என்பதைத் தெளிவாகப் புரிந்து கொண்டாலே விவாதம் முடிவுக்கு வந்து விடும்.

காதல் குளத்தில் எறியப்படும் கல்லை விட எறியப்பட்டதால் ஏற்பட்ட அதிர்வலைகளே கண்ணுக்குப் புலப்படும்.பெணகள் கல்லை எறிந்து விட்டு ஒன்றும் அறியாதவர்கள் போல் இருப்பார்கள்;ஆண்களின் உசுப்ப பட்ட மனக்குளத்தின் அதிர்வலைகளே எல்லோருடைய வெற்றுக் கண்களுக்கும் புலப்படும்.உடனே `காதல் குளத்தில் கல்லெறிபவர்கள் ஆண்களே ` என்று முடிவுக்கு வந்து விடுவோம்.

பறவைகளிலும் மிருகங்களிலும் ஆண்வர்க்கத்துக்குத் தான் அதிக கவர்ச்சியும்,காதல் குளம் வீசக் கற்களும் இறைவன் கொடுத்திருக்கிறான்.இதனை யாரும் மறுக்க முடியாது.ஆனால் மனித வர்க்கத்தில் இதற்கு நேரெதிராய் பெண்ணினத்துக்கே அசாதாரண ஈர்ப்புச்சக்தியும் உளம் கலக்கும் கற்களும் தரப்பட்டிருக்கின்றன.இது அறிவியல் உண்மை.

தலை நிமிர்ந்து யாரையும் பார்க்காத பெண்ணால் குளம் அதிர்ந்த ஆண் பற்றி நான் கேள்விப்பட்டிருக்கிறேன். என் எதிரணித்தோழர்கள் தலைப்பைப் புரிவதில் தவறு விட்டிருக்கிறார்கள் என்றே நினைக்கிறேன்.
வரலாறு நெடுகிலும் காதல் குளத்தில் கல்லெறிந்த பெண்களையும் அவர்களால் குளம் அதிர்ந்த ஆண்களையும் நிறையவே காணலாம்.

கற்கள் அதிர்வதில்லை.
கற்பட்ட குளமே அதிர்கிறது.
பெண் காதலை முதலில் சொல்வதில்லை,ஆனால் அவளது அங்க அசைவுகள் அனைத்தும் இதை சொல்லாமல் சொல்கின்றன.இனி காதல் குளம் கலங்குகின்றது. ஆண் காதலை சொற்களால் தெளிவாக வெளிப்படுத்துகிறான்.
குளத்தில் எறியப்பட்ட கல் அமைதி காக்கிறது.